ភ្នំពេញ៖  សហព័ន្ធស្រូវអង្ករកម្ពុជាបានព្យាករណ៍ថា ការនាំចេញអង្កររបស់កម្ពុជាម្រាប់ឆ្នាំ២០២៣ នឹងកើនឡើងប្រមាណពី ៥ ទៅ ១០ ភាគរយបើធៀបនឹងឆ្នាំមុន។ ការនាំចេញបានកើនឡើងប្រហែល ៦៧០ ០០០ តោនដែលស្មើនឹង៩៥ ភាគរយនៃគោលដៅនាំចេញ ដែលបានគ្រោងទុកសម្រាប់ឆ្នាំ២០២៣ ចំនូន៧០០.០០០ តោន។

ឧកញ៉ា សុង សារ៉ន ​ ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា បានបញ្ជាក់កាលពីពេលថ្មីៗនេះថា ការនាំចេញអង្ករពេញមួយឆ្នាំ២០២៣នេះ នឹងមានកំណើនប្រមាណពី ៥% ទៅ ១០% បើធៀបទៅនឹងឆ្នាំ២០២២​ ពោលគឺអាចនាំចេញក្នុងរង្វង់ប្រមាណ ៦៧ម៉ឺនតោន ឬស្មើនឹង ៩៥% នៃផែនការដែលបានចេញ ៧០ម៉ឺនតោន។

ឧកញ៉ា សុង សារ៉ន បានគូសបញ្ជាក់ថា ៖

«កំណើនឆ្នាំ២០២៣នេះ ខ្ញុំគិតថានឹងមានកំណើនប្រហាក់ប្រហែលពី ៥% ទៅ ១០% ហើយជាកំណើនមួយ ដែលយើងទទួលយកបាន តែនិយាយត្រង់ទៅ អង្ករយើង គឺល្អជាងប្រទេសជិតខាងទាំងគុណភាព ទាំងតម្លៃ គឺល្អប្រសើរ។ កំណើនប្រមាណពី ៥% ទៅ ១០% នេះ ប៉ុណ្ណឹងយើងគិតថាល្អ សម្រាប់យើងដែលស្រូវពុំមាននាំចេញគ្រប់គ្រាន់ ហើយយើងត្រូវប្រកួតប្រជែងជាមួយប្រទេសវៀតណាម ក្នុងការប្រមូលទិញស្រូវ ហើយយើងដឹងស្រាប់ហើយថាវៀតណាម ជាប្រទេសមានការរីកចម្រើនខ្លាំងជាងយើង ដោយប្រទេស​នេះ​ដើរលឿនជាងយើង​ក្នុង​ការសម្ងួត​ស្រូវ ឃ្លាំងស្តុកទុក ការដឹកជញ្ជូន និង​ហេដ្ឋារចនាសម្ព័ន្ធកំពង់ផែ​»។

លោក ឧកញ៉ា បានបញ្ជាក់បន្ថែមថា កំណើននៃការនាំចេញអង្ករតិចតួចនេះ ​ដោយសារកម្ពុជាមិនមានស្រូវគ្រប់គ្រាន់ សម្រាប់នាំចេញនៅ​រយៈពេលចុងក្រោយនេះ ​ព្រោះបណ្តា​រោងម៉ាស៊ីន ដែលជាសមាជិករបស់សហព័ន្ធ ត្រូវប្រកួតប្រជែងទិញស្រូវពីកសិករ ជាមួយឈ្មួញវៀតណាម ខណៈ​តម្លៃអង្ករ និងស្រូវបានកើនឡើង ហើយកម្ពុជាព្យាយាមនាំចេញក្នុងកម្រិត​គិតគូរ ដើម្បីកុំឱ្យមានការខាតបង់ ដល់ឧស្សាហកម្មស្រូវអង្ករ ដល់កសិករ និងអាចធ្វើឱ្យរោងម៉ាស៊ីន អាចរស់បានបើទោះបីជាពួកគេរងការខាតបង់តិចតួច។ តែយ៉ាងណាម្ចាស់រោងម៉ាស៊ីននា​នា ត្រូវតែខិតខំប្រមូលទិញស្រូវពីកសិករ បើមិនដូច្នេះទេ មិនអាចប្រកួតប្រជែងជាមួយវៀតណាមបានឡើយ។

លោកឧកញ៉ា បន្ថែមថា តម្លៃស្រូវអង្ករនៅឆ្នាំ២០២៤ នឹងបន្តឡើងទៀត ដែលកម្ពុជាអាចនឹងខ្វះខាតស្រូវ និងអង្ករ សម្រាប់នាំចេញសម្រាប់ឆ្នាំនេះ ក៏នឹងជះឥទ្ធិពលដល់ការនាំចេញនៅឆ្នាំក្រោយផងដែរ។ នៅក្នុងត្រីមាសទី១ ដើមឆ្នាំ២០២៤ ដោយសារការប្រមូលផលស្រូវ​នៅដើមឆ្នាំពីខែមករា ដល់ខែមីនា មិនមានចំនួនច្រើនគ្រប់គ្រាន់សម្រាប់ការនាំចេញ​។ តែយ៉ាងនេះក្តី លោករំពឹងថា ចាប់ពីត្រីមាសទី២ ឆ្នាំ២០២៤ទៅ ​​សន្ទុះនៃនាំចេញនឹងកើនឡើងវិញ​ នៅពេលរដូវប្រមូលផលស្រូវប្រាំង​មកដល់។

លោកឧកញ៉ា សុង សារ៉ន បានបន្ថែមថា ទោះបីបច្ចុប្បន្នកម្ពុជាកំពុងជួបបញ្ហាប្រឈមក្នុងការទិញអង្ករសម្រាប់នាំចេញ និងប្រកួតប្រជែងជាមួយប្រទេសជិតខាងនោះ ក៏មានការទទួលស្គាល់កាន់តែច្រើនឡើងអំពីគុណភាព និងតម្លៃប្រកួតប្រជែងរបស់អង្ករកម្ពុជា ខណៈដែលឧស្សាហកម្មបន្តដោះស្រាយភាពស្មុគស្មាញទាំងនេះ ខ្លួននៅតែប្តេជ្ញាចិត្តចំពោះកំណើនប្រកបដោយនិរន្តរភាព ដែលផ្តល់អត្ថប្រយោជន៍ដល់កសិកររោងម៉ាស៊ីនកិនស្រូវ ធានានូវនិរន្តរភាពនៃឧស្សាហកម្មរបស់យើង និងសេដ្ឋកិច្ចទាំងមូល។

យោងតាមរបាយការណ៍ សហព័ន្ធស្រូវអង្ករកម្ពុជា នៅរយៈពេល ១១ខែ ក្នុងឆ្នាំ២០២៣ កម្ពុជានាំចេញអង្ករបានជិត ៦០ម៉ឺនតោន ​មានកំណើនប្រមាណ ៦%​ បើធៀបនឹងឆ្នាំមុន ទទួលបានទឹកប្រាក់ ៤២០លានដុល្លារ ខណៈនាំចេញស្រូវវិញ ជិត៤លានតោន ​ទទួលបានទឹកប្រាក់ជាង ១ ១០០លានដុល្លារ​៕