ភ្នំពេញ ៖ សម្តេចតេជោ ហ៊ុន សែន បានបញ្ជាក់ថា រាជរដ្ឋាភិបាលចង់ប្រែក្លាយកម្ពុជាទៅជាប្រទេសកែច្នៃ និងនាំចេញគ្រាប់ស្វាយចន្ទីដ៏ខ្លាំងក្លាមួយ ខណៈដែលបច្ចុប្បន្ននេះ កម្ពុជាបានធ្វើការនាំចេញគ្រាប់ស្វាយចន្ទីមិនទាន់កែឆ្នៃរហូតដល់ប្រមាណ ១លានតោនក្នុងមួយឆ្នាំ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងពិធីប្រគល់សញ្ញាបត្រដល់គរុនិស្សិតបច្ចេកទេស និង​និស្សិត​ដែលបានបញ្ចប់ការសិក្សាដោយជោគជ័យពីវិទ្យាស្ថានជាតិ​បណ្តុះ​បណ្តាលបច្ចេក​ទេសនាព្រឹកថ្ងៃទី២៧​​ ខែកុម្ភៈ ឆ្នាំ២០២៣ បានបញ្ជាក់ថា ៖

“នៅថ្ងៃខាងមុខបើកម្ពុជាមានលទ្ធភាព កម្ពុជាអាចក្លាយទៅជាប្រទេសដែលចែកចាយនូវគ្រាប់ស្វាយចន្ទី ដែលសឹងនឹងក្លាយទៅជាអ្នកខ្លាំងមួយក្នុងចំណោមអ្នកខ្លាំងនៃការចែកចាយ ព្រោះមួយឆ្នាំកម្ពុជានាំចេញគ្រាប់ស្វាយចន្ទីដែលមិនទាន់កែច្នៃ១លានតោន…..យើងកែច្នៃខ្លួនឯងបានតិចតួចណាស់ ដែលយកមកតាំងពិព័រណ៍លក់”

ឯកឧត្ដមបណ្ឌិត សួង​ ណយ ជាអ្នកជំនាញខាងវិស័យកសិកម្មម្នាក់នៅប្រភេទកម្ពុជាបានបង្ហាញពីទស្សនទានផ្ទាល់ខ្លួនគាំទ្រប្រសាសន៍របស់សម្ដេចតេជោ ហ៊ុន សែន ទៅលើការពង្រឹង និងពង្រីកលទ្ធភាពនៃការកែច្នៃធនធានវត្ថុធាតុដើមក្នុងស្រុកជាចម្បង។ ជាក់ស្ដែងដូចជា ប្រភេទគ្រាប់ស្វាយចន្ទីដែលកំពុងមានតម្រូវការនាំចេញទៅលើទីផ្សារអន្តរជាតិ ជាពិសេសទីផ្សារប្រភេទចិនផ្ទាល់តែម្ដង។

ឯកឧត្ដមបានបញ្ជាក់ផងដែរថា ៖

“ដើម្បីគាំទ្រទៅលើគម្រោងទាំងអស់នោះ កម្ពុជាចាំបាច់បង្កើតឱ្យមានតំបន់ដាំដុះឱ្យបានត្រឹមត្រូវ មានវិសាលភាពល្អជាងមុន ធានាបាននូវផលិតភាពនៃការដាំដុះឱ្យបានល្អ។ ក្រោយការប្រមូលផល ត្រូវយកចិត្តទុកដាក់ទៅលើបច្ចេកទេស​ ក៏ដូចជាគុណភាពនៃផលិតផលប្រកាន់ភ្ជាន់នូវអនាម័យ និងស្តង់ដារដែលទីផ្សារអន្តរជាតិតម្រូវ”

ប​ន្ថែមលើនេះ អ្នកជំនាញខាងលើបន្តថា បណ្ដាក្រុមហ៊ុនដែលធ្វើការនាំចេញ ក៏ដូចជាកសិករដែលមានការពាក់ព័ន្ធផ្ទាល់នោះ ត្រូវតែបង្កើននៃការកែច្នៃរបស់ខ្លួនឱ្យបានសមស្របទៅតាមស្តង់ដាររបស់ខ្លួនដែលបានកំណត់ ទាំងគុណភាព និងអនាម័យ ធ្វើយ៉ាងណាផ្គត់ផ្គង់នូវតម្រូវការទីផ្សារដែលគេចង់បាន។

តួយ៉ាង សហគ្រាស ឡឹង ម៉ានុត ដែលជាសហគ្រាកែច្នៃ និងចម្អិនគ្រាប់ស្វាយចន្ទី ស្ថិតនៅក្នុងភូមិតាអុង ឃុំតាអុង ស្រុកចំការលើ ខេត្តកំពង់ចាម ដែលកំពុងប្រមូលទិញក៏ដូចជាកែច្នៃគ្រាប់ស្វាយចន្ទីក្នុងតំបន់ប្រកបដោយគុណភាព និងស្តង់ដារ ដើម្បីលក់នៅលើទីផ្សារទាំងការបោះដុំ លក់រាយ ក៏ដូចជាដាក់លក់នៅលើផ្សារទំនើបនានាផងដែរ។

អ្នកស្រី ឡឹង ម៉ានុត ជាម្ចាស់សហគ្រាសខាងលើបានមានប្រសាសន៍ឱ្យដឹងថា ​៖

“គ្រាប់ស្វាយចន្ទីរបស់សិប្បកម្មយើងជាផលិតផលក្នុងស្រុកពិតៗ កែច្នៃប្រកបដោយគុណភាព និងមានទីផ្សារល្អ ហើយវាជាកសិផលរបស់កសិករយើង ដែលបច្ចុប្បន្នយើងអាចផ្គត់ផ្គង់បានពេញមួយឆ្នាំតែម្ដង ហើយរាល់ដំណើរការរបស់សិប្បកម្មក៏បានចូលរួមចំណែកនៅក្នុងការកាត់បន្ថយភាពក្រីក្រ ការធ្វើចំណាកស្រុករបស់ពលរដ្ឋក្នុងតំបន់តាមរយៈការផ្ដល់ឱកាសការងារ។”

អ្នកស្រីបន្ថែមថា ៖

“តាមរយៈសហគ្រាសយើងកំពុងផ្គត់ផ្គង់នូវគ្រាប់ស្វាយចន្ទីដែលមានគុណភាព និងអនាម័យទាំងនៅតាមម៉ាត ក៏ដូចជាផ្សារទំនើបនានា។ បន្ថែមពីលើនេះ សហគ្រាសស្ថិតក្នុងស្រុកចំការលើនេះ ក៏បានចូលរួមចំណែកសហការជាមួយសហគមន៍ដាំស្វាយចន្ទីដែលមានសមាជិកជាង ៣០គ្រួសារ និងផ្ដល់ការងារជូនប្រជាជនក្នុងតំបន់ប្រមាណ ១៥នាក់ផងដែរ៕”