ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ និងធនាគារវឌ្ឍនៈអាស៊ីចំកាត់ (ABA) តំណាងវិស័យឯកជន បានសហការ​គ្នា​តាមរយៈការចុះអនុស្សរណៈនៃការយោគយល់គ្នា ដើម្បីជំរុញ​ការ​អភិវឌ្ឍ​វិស័យសេដ្ឋកិច្ច​ឌី​ជី​ថ​ល​ និង​បច្ចេកវិទ្យា​ហិរញ្ញវត្ថុ​នៅ​កម្ពុជា។ នេះបើយោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ២៦ ខែមេសា ឆ្នាំ ២០២៣។

ក្រសួងសេដ្ឋកិច្ច និងហិរញ្ញវត្ថុតំណាងដោយ ឯកឧត្តមបណ្ឌិត គង់ ម៉ារី អនុរដ្ឋលេខាធិការ និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការសេដ្ឋកិច្ច និងធុរកិច្ចឌីជីថល បានចុះហត្ថលេខាលើអនុស្សរណៈយោគយល់ស្តីពី “កិច្ចសហការក្នុងក្របខណ្ឌការអភិវឌ្ឍសេដ្ឋកិច្ចឌីជីថល និង បច្ចេកវិទ្យាហិរញ្ញវត្ថុនៅកម្ពុជា” ជាមួយធនាគារ ABA តំណាងដោយ លោក Askhat Azhikhanov នាយកប្រតិបត្តិធនាគារ ABA ដើម្បីចូលរួមលើកកម្ពស់ការអភិវឌ្ឍវិស័យសេដ្ឋកិច្ចឌីជីថល និងបច្ចេកវិទ្យាហិរញ្ញវត្ថុនៅកម្ពុជាឱ្យកាន់តែរស់រវើក និងស្របតាមគោលនយោបាយ និងនិន្នាការជាតិ តំបន់ និងសាកល។

ក្រសួងបានបញ្ជាក់ថា កន្លងមក ក្រសួងសេដ្ឋកិច្ច និងហិរញ្ញវត្ថុធ្លាប់បានសហការជាមួយធនាគារ ABA លើការងារមួយចំនួនរួចហើយក្នុងវិស័យឌីជីថល និងបច្ចេកវិទ្យាហិរញ្ញវត្ថុ។ យ៉ាងណាមិញ, ការចុះអនុស្សរណៈនៃការយោគយល់គ្នានេះ នឹងជំរុញ និងពង្រីកកិច្ចសហការកាន់តែល្អប្រសើរដូចជា ៖ (១) ការចែករំលែកចំណេះដឹង បទពិសោធន៍ និងការបណ្ដុះបណ្ដាល, (២) ការចូលរួមប្រើប្រាស់ថ្នាលឌីជីថលគន្លឹះ និង (៣) ការគាំទ្រលើសកម្មភាព និងកម្មវិធីផ្សេៗទៀត ទាំងផ្នែកហិរញ្ញវត្ថុ និងមិនមែនហិរញ្ញវត្ថុសំដៅជំរុញ និងអភិវឌ្ឍសេដ្ឋកិច្ចឌីជីថល និងបច្ចកវិទ្យាហិរញ្ញវត្ថុនៅកម្ពុជា។

តាម​រយៈ​អនុស្សរណៈ​យោគយល់​គ្នា​នេះ​ ធនាគារ​ ABA​ បញ្ជាក់​ពី​ការ​ប្តេជ្ញា​ចិត្ត​របស់​ខ្លួន​ក្នុង​ការ​គាំទ្រ​ និង​អនុវត្ត​កម្មវិធី​នានា ​នៅ​ក្នុង​វិស័យ​បច្ចេកវិទ្យា​ហិរញ្ញវត្ថុ​ និង​សេដ្ឋកិច្ច​ឌី​ជី​ថ​ល​ ស្រប​តាម​ក្របខ័ណ្ឌ​គោលនយោបាយ​សេដ្ឋកិច្ច​ និង​សង្គម​ឌី​ជី​ថ​ល​កម្ពុជា​ ២០២១-២០៣៥​ និង​គោលនយោបាយ​រដ្ឋាភិបាល​ឌី​ជី​ថ​ល​កម្ពុជា​ ២០២២-២០៣៥។​ ធនាគារ​ ក៏​នឹង​ចូលរួម​ក្នុង​ការ​ប្រើប្រាស់​ និង​ផ្តល់​ការ​ចូល​ប្រើប្រាស់​ផលិតផល​ព័ត៌មានវិទ្យា​ (IT)​ ដូច​ជា​ប្រព័ន្ធ​ ចេញ​វិក្កយបត្រ​អេ​ឡិ​ក​ត្រូ​និក​ (e-Invoicing) ថ្នាលផ្លាស់ប្តូរទិន្នន័យកម្ពុជា (CamDX) និង​ប្រព័ន្ធ​សម្គាល់​អត្តសញ្ញាណ​អតិថិជន​ CamDigiKey​ ផង​ដែរ​។ ជា​ផ្នែក​នៃ​កិច្ចសហការ​នេះ​ ធនាគារ​ ABA​ បាន​ក្លាយជា​សមាជិក​ថ្នាល​ផ្លាស់​ប្តូរ​ទិន្នន័យ​កម្ពុជា​ (CamDX)​ ជា​ផ្លូវការ​ ដែល​ជា​ថ្នាល​ផ្លាស់​ប្ដូរ​ទិន្នន័យ​មួយ​ឈរ​នៅ​កណ្ដាល​ ដើម្បី​ផ្ដល់​សេវាកម្ម​អន​ឡាញ​ជូន​ស្ថាប័នរដ្ឋ​ និង​ឯកជន​។​ ​

លោក​ Askhat​ Azhikhanov​ បានថ្លែង​ថា​ ​កិច្ចសហការ​ជាមួយ​ក្រសួង​សេដ្ឋកិច្ច​ និងហិរញ្ញវត្ថុ​ ឆ្ពោះទៅ​គោលដៅ​រួម​ គឺ​ការ​លើកកម្ពស់​សេដ្ឋកិច្ច​ឌី​ជី​ថ​លន​វា​នុ​វត្ត​ន៍ ប្រកបដោយប្រពល​ភាព​ក្នុង​ប្រទេស​។​ ​

លោក​បានបន្ថែម​ថា​ “ABA​ តែងតែ​ប្តេជ្ញា​ក្នុង​ការ​ប្រើ​បច្ចេកវិទ្យា​ និង​នវានុវត្តន៍​ ដើម្បី​ផ្តល់​នូវ​ដំណោះស្រាយ​ហិរញ្ញវត្ថុ​ប្រកបដោយ​គុណ​តម្លៃ​ និង​មាន​ប្រសិទ្ធភាព​ ជូន​ដល់​អតិថិជន​។​ យើងខ្ញុំ​ជឿជាក់​យ៉ាង​មុតមាំ​ថា​ ការ​សហការ​ជាមួយ​ក្រសួង​សេដ្ឋកិច្ច​ និង​ហិរញ្ញវត្ថុ​ នឹង​អាច​ឲ្យ​យើងខ្ញុំ​បង្កើត​ឱកាស​កាន់តែ​ច្រើន​ជូន​ដល់​អតិថិជន​ និង​ព​ន្លឿ​ន​វឌ្ឍនភាព​នៅ​ក្នុង​ប្រព័ន្ធ​អេកូឡូស៊ី​នៃ​បច្ចេកវិទ្យា​ហិរញ្ញវត្ថុ​ទាំងមូល​។​

ឯកឧត្តមបណ្ឌិត គង់ ម៉ារី ក៏បានលើកឡើងដែរថា កិច្ចសហការបែបនេះ នឹងបង្កើតជាគំរូនៃសហថាមពល (Synergy) និងសហបង្កើតថ្មី (Co-creation) រវាងរាជរដ្ឋាភិបាល និងវិស័យឯកជន ដែលនឹងធ្វើឱ្យមានការបង្កើតនូវសេវា និងផលិតផលថ្មីៗ សំដៅលើកម្ពស់ការផ្តល់សេវាសាធារណៈកាន់តែមានប្រសិទ្ធភាព ផ្អែកលើបច្ចេកវិទ្យា និងនវានុវត្តន៍។ សូមបញ្ជាក់ផងដែរថា បច្ចុប្បន្ន សមាជិកកចំនួន ១៤ ពីស្ថាប័ននានា បាន និងកំពុងប្រើប្រាស់ថ្នាល CamDX សម្រាប់ការផ្លាស់ប្តូរទិន្នន័យអត្តសញ្ញាណកម្មរបស់រាជរដ្ឋាភិបាល ដើម្បីប្រើប្រាស់ក្នុងក្របខណ្ឌសម្គាល់អត្តសញ្ញាណអតិថិជនឌីជីថល (E-KYC) ។ ធនាគារ និងក្រុមហ៊ុនជាច្រើនទៀត បាន និងកំពុងបង្ហាញចំណាប់អារម្មណ៍ ហើយខ្លះទៀតកំពុងស្ថិតក្នុងការបំពេញលក្ខខណ្ឌផ្សេងៗដើម្បីក្លាយជាសមាជិកថា្នល CamDX ផងដែរ៕