សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមឆមាសទី១ ឆ្នាំ២០២៦ កម្ពុជារកចំណូលបានប្រមាណ ១,៧៥១លានដុល្លារអាម៉េរិក ពីការនាំចេញគ្រាប់ស្វាយចន្ទីឆៅទៅកាន់ទីផ្សារអន្តរជាតិ ដែលបង្ហាញពីភាពរឹងមាំឈរលំដាប់ថ្នាក់លេខ ០១ ក្នុងចំណោមបណ្តាប្រទេសនៅតំបន់អាស៊ាន បន្ទាប់ពីវ៉ាដាច់ប្រទេសឥណ្ឌាកាលពីឆ្នាំ២០២៤។
យោងតាមទិន្នន័យក្រៅផ្លូវការរបស់សមាគមស្វាយចន្ទីកម្ពុជា(សសក)បានបង្ហាញថា កម្ពុជាបាននាំចេញគ្រាប់ស្វាយចន្ទីឆៅចំនួន ១,០៣ លានតោន ទៅកាន់ប្រទេសវៀតណាមនៅឆមាសទី០១ ឆ្នាំ២០២៦ ដោយរកចំណូលបានប្រហែល ១,៧៥១ លានដុល្លារអាមេរិក កើនឡើងប្រមាណជា ២៨ភាគរយ ធៀបនឹងរយៈពេលដូចគ្នាកាលពីឆ្នាំមុន។
លោក អួន ស៊ីឡុត ប្រធានសមាគមស្វាយចន្ទីកម្ពុជា មានប្រសាសន៍ថា ទោះបីជាលទ្ធផលនៃការនាំចេញមានភាពរឹងមាំក៏ដោយ ប៉ុន្តែកម្ពុជានៅតែបន្តកែច្នៃទិន្នផលស្វាយចន្ទីក្នុងស្រុក ក្នុងសមាមាត្រធៀបមួយដ៏តិចតួចនៅឡើយ។
លោកបានបន្តថា៖
«ទោះបីជាកម្ពុជានៅតែជាប្រទេសផ្គត់ផ្គង់គ្រាប់ស្វាយចន្ទីឈានមុខគេក៏ដោយ ការបង្កើនការកែច្នៃក្នុងស្រុកនឹងក្លាយជាកត្តាចាំបាច់បំផុត ដើម្បីចាប់យកតម្លៃបន្ថែម បង្កើតឱកាសការងារកាន់តែច្រើន និងពង្រឹងភាពប្រកួតប្រជែងរបស់កម្ពុជានៅក្នុងឧស្សាហកម្មស្វាយចន្ទីសកល»។
តាមរយៈតួលេខខាងលើនេះបង្ហាញថា កម្ពុជាឈរលំដាប់លេខ ០២ នៅលើពិភពលោក បន្ទាប់ពីប្រទេសកូឌីវ័រ ខណៈរយៈពេល ៥ខែដំបូងនៃឆ្នាំ២០២៦ ប្រទេសមួយនេះបាននាំចេញសាច់គ្រាប់ស្វាយចន្ទីកែច្នៃរួច ក្នុងកម្រិតឯកទគ្គកម្មរហូតដល់ ៤៤,៤០៣ តោន ដែលកើនឡើង ៥១ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។
ក្រុមអ្នកជំនាញឧស្សាហកម្មចន្ទីបានលើកឡើងថា នៅពេលដែលការប្រកួតប្រជែនៅក្នុងទីផ្សារស្វាយចន្ទីសកលកាន់តែមានភាពស្វិតស្វាញ បណ្តាប្រទេសផលិតកម្មទាំងឡាយណា ដែលវិនិយោគលើការកែច្នៃក្នុងស្រុក និងការបង្កើតតម្លៃបន្ថែម នឹងមានជំហរកាន់តែប្រសើរ ក្នុងការទាញយកផលប្រយោជន៍ពីកំណើនរយៈពេលវែង និងការប្រែប្រួលនៃរចនាសម្ព័ន្ធទីផ្សារ។
លោក Jim Fitzpatrick អ្នកវិភាគឧស្សាហកម្មមានប្រសាសន៍ថា៖
«រយៈពេលប៉ុន្មានសប្តាហ៍ខាងមុខនេះ នឹងកំណត់ថា តើតម្រូវការដ៏ខ្លាំងក្លានឹងរុញច្រានតម្លៃសាច់គ្រាប់ឱ្យកាន់តែខ្ពស់ ឬក៏ការទិញដោយប្រុងប្រយ័ត្ននឹងពន្យារពេលនៃការហក់ឡើងថ្លៃនៅវគ្គបន្ទាប់»។
ដោយរងការគំរាមកំហែងពីការប្រែប្រួលអាកាសធាតុ នៅរយៈពេល ០៤ឆ្នាំជាប់ៗគ្នា នៅរយៈពេលចុងក្រោយ ក្រសួងកសិកម្ម រុក្ខាប្រមាញ់ និងនេសាទ រួមនឹងសមាគមស្វាយចន្ទីកម្ពុជា បានចុះបង្រៀនកសិករឱ្យចេះធ្វើកសិកម្ម ពិសេសដំណាំស្វាយចន្ទី ឱ្យមានភាពបន្សាំទៅនឹងការប្រែប្រួលអាកាសធាតុនេះ តាមរយៈការបណ្តុះបណ្តាលដល់កសិករប្រមាណជាជិត ៩,០០០នាក់ ក្នុងខេត្តគោលដៅទាំង១០ រួមមានកំពង់ធំ រតនគីរី ក្រចេះ និងស្ទឹងត្រែងជាដើម ដើម្បីឱ្យពួកគាត់មានជំនាញបច្ចេកទេសដាំដុះ អាចសម្របខ្លួនទៅនឹងការប្រែប្រួលអាកាសធាតុ ពិសេសមានសមត្ថភាពផលិតជីកសិកម្មបានដោយខ្លួនឯងកាត់បន្ថយលើថ្លៃដើមផលិត ជំរុញដល់ការដាំដុះកើនឡើងពីមួយឆ្នាំទៅមួយឆ្នាំ និងបង្កើនការនាំចេញ។
បើតាមតួលេខរបស់សមាគមស្វាយចន្ទីរកម្ពុជា បង្ហាញថា ក្នុងឆ្នាំ២០២៥ កម្ពុជាមានផ្ទៃដីដាំដំណាំស្វាយចន្ទីរចំនួនជិត ៨០០,០០០ហិកតា ខណៈដែលផ្ទៃដីប្រមូលផលមានជាង ៦៣០,០០០ ហិកតា នៅខេត្តគោលដៅចំនួន១០ នៅទូទាំងប្រទេស។
គួរបញ្ជាក់ថា នៅក្នុងឆ្នាំ២០២៥ កម្ពុជាផលិតគ្រាប់ស្វាយចន្ទីសរុបចំនួន ១ ២០០ ០០០តោន ក្នុងនោះ មានគ្រាប់ស្វាយចន្ទីឆៅប្រមាណ ១ ០២០ ៧៥៧តោន ត្រូវបាននាំចេញទៅកាន់ទីផ្សារអន្តរជាតិ ផ្ដល់ចំណូលដល់កម្ពុជាប្រមាណ ១,៥ ពាន់លានដុល្លារ៕
Account
Security
Favourite Content