ភ្នំពេញ ៖ បើទោះបីជាស្ថិតនៅក្នុងបរិការណ៍នៃភាពមិនប្រាកដប្រជាសេដ្ឋកិច្ចសកលយ៉ាងណាក្ដី ប៉ុន្តែសម្រាប់ដំណើរវឌ្ឍនភាពតំបន់សេដ្ឋកិច្ចពិសេស (SEZ) នៅក្នុងប្រទេសកម្ពុជា នៅតែបន្តពង្រីកដើម្បីជួយសម្រួល និងទាក់ទាញការវិនិយោគ ក៏ដូចជាផ្តល់ទំនុកចិត្ត ផលប្រយោជន៍ដល់បណ្តាវិនិយោគិន​នៅលើទឹកដីកម្ពុជា។ ជាក់ស្តែង គិតត្រឹមចុងឆមាសទី១ ឆ្នាំ២០២៦ កម្ពុជាមានតំបន់សេដ្ឋកិច្ចពិសេសសរុប ៦៥កន្លែង និងកំពុងមានដំណើរការយ៉ាងមមាញឹកចំនួន ៣៦ ខណៈដែលខេត្តស្វាយរៀងមានចំនួន ១៣កន្លែង កំពុងមានសកម្មភាពព្រមគ្នាទាំងអស់ និងក្លាយជាប៉ូលដ៏ទាក់ទាញផ្នែកឧស្សាហកម្មធុនធ្ងន់ឈានមុខគេប្រចាំប្រទេស។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ប្រាប់បណ្តាញព័ត៌មាន AMS ថា រាជរដ្ឋាភិបាលបានជំរុញឱ្យមានការបង្កើតតំបន់សេដ្ឋកិច្ចពិសេសក្នុងខេត្តជាប់ព្រំដែន ក៏ដូចជាបង្កើនកិច្ចសហប្រតិបត្តិការជាមួយប្រទេសជិតខាង ដើម្បីជំរុញឱ្យវិនិយោគិនបរទេសមានភាពជឿជាក់ បង្ហាញពីជំនឿទុកចិត្តមកលើរាជរដ្ឋាភិបាលកម្ពុជាដែលមើលឃើញពីឱកាសចំណេញ និងចូលទៅបណ្តាក់ទុននៅទីនោះ។
អ្នកឧកញ៉ា បានបញ្ជាក់ថា ៖

« ថ្មីៗនេះ រំហូរនៃគម្រោងវិនិយោគចូលទៅខេត្តស្វាយរៀងមានច្រើន ដូចជា រោងចក្រផលិតសំបកកង់រថយន្ត គ្រឿងបង្គុំ ឧស្សា​ហកម្មយានយន្ត គ្រឿងអេឡិចត្រូនិក ការដំឡើងកង់អគ្គិសនី ការផលិតសំបកកង់រថយន្ត និងគ្រឿងបង្គុំសង្ហារិមជាដើម ព្រមគ្នាជាមួយនឹងរោងចក្រកាត់ដេរសម្រាប់នាំចេញតាមច្រកនៅកំពង់ផែប្រទេសវៀតណាម ដើម្បីបន្តចេញទៅទីផ្សារអន្តរជាតិ»។

អ្នកឧកញ៉ា លឹម ហេង បន្តថា វិនិយោគិនទាំងក្នុង និងក្រៅប្រទេស បានសម្លឹងឃើញខេត្តស្វាយរៀងជាទីតាំងមានសក្តានុពលវិនិយោគលើវិស័យផ្សេងៗជាច្រើន ដោយសារលក្ខខណ្ឌភូមិសាស្រ្តមានភាពអំណោយផល និងមានវត្ថុធាតុដើមច្រើន ងាយស្រួលទាំងការផ្គត់ផ្គង់សង្វាក់ផលិតកម្ម ហើយងាយស្រួលទាំងការនាំចេញផលិតផលក្រោយការផលិត។

បណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃរាជបណ្ឌិត្យសភាកម្ពុជា បានកតសម្គាល់ បើគិតពីខេត្តស្វាយរៀងទៅកាន់ទីផ្សារវៀតណាម មានផលចំណេញច្រើនសម្រាប់សេវាដឹកជញ្ជូន និងភស្តុភាកម្ម។ ចំណុចនេះគឺមានផលចំណេញច្រើនក្នុងការដឹកជញ្ជូនទៅដល់កំពង់ផែសមុទ្រវៀតណាម។ ដូច្នេះទើបទាក់ទាញគម្រោងវិនិយោគធំៗ ក្នុងវិស័យឧស្សាហកម្មធុនធ្ងន់ទៅកាន់ខេត្តស្វាយរៀងច្រើន។

បណ្ឌិត ហុង វណ្ណៈបញ្ជាក់ថា ៖ « ជាធម្មតាទេ បើប្រៀបធៀប ជាមួយតំបន់សេដ្ឋកិច្ចក្រុងព្រះសីហនុ គឺមានផលចំណេញម៉្យាងម្នាក់ ។ សម្រាប់ការវិនិយោគ ផ្លូវណា ច្រកណា ដែលមានផលចំណេញជាង អ្នកវិនិយោគគឺគេអាចសម្រេចចិត្តទៅតាមមធ្យោបាយ ឬផ្លូវនោះហើយ»។

លោកបណ្ឌិត បានបន្ថែមថា ទោះជាយ៉ាងណាត្រូវតែមានការលើកចិត្តបន្ថែមដល់សេវាកម្មអ្នកដឹកជញ្ជូន ស្ថាប័នពាក់ព័ន្ធ ពោលគឺត្រូវធ្វើយ៉ាងណាឱ្យវិនិយោគិនមានជំនឿទុកចិត្ត ដោយការលើកទឹកចិត្តពីគោលនយោបាយ ដើម្បីទទួលប្រយោជន៍ពីការវិនិយោក ហើយវា៏ជួយដល់រាជរដ្ឋាភិបាលវិញ តាមរយៈការបង្កើតឱកាសការងារជូនប្រជាពលរដ្ឋកម្ពុជា និងភាពប្រកួតប្រជែង៕