ភ្នំពេញ ៖ មុខរបរលក់ផ្កាអង្គារសិល្ប៍ និងផ្កាហ្វុងស៊ុយមួយចំនួនទៀតដែលគេនិយមទិញសម្រាប់ដាក់តាំងលម្អ និងសែនព្រេនក្នុងពិធីបុណ្យចូលឆ្នាំថ្មីប្រពៃណីជនជាតិចិន-វៀតណាម ត្រូវបានគេកត់សម្គាល់ថា បានធ្លាក់ថ្លៃចុះជាបន្តបន្ទាប់ចាប់តាំងពីឆ្នាំ២០២០ រហូតមកទល់ឆ្នាំ២០២៤កន្លងទៅ។ ដោយឡែក សម្រាប់ឆ្នាំ២០២៥នេះ បើគិតទៅនៅមិនដល់មួយសប្តាហ៍ទៀតនោះទេ ពិធីសែនព្រេនបុណ្យចូលឆ្នាំថ្មីប្រណីនៃជនជាតិចិន-វៀតណាម នឹងចូលមកដល់ ខណៈដែលសកម្មភាពនៃការដាក់តាំងលក់ដើមផ្កាដូចដែលបានលើកឡើងខាងលើក៏ចាប់ផ្តើមមានជាបណ្តើរៗហើយ។

លោក ចុន សារឹម ឈ្មួញលក់ផ្កាអង្គាសិល្ប៍នៅម្តុំគល់ស្ពានជ្រោយចង្វាខាងកើតបានឱ្យដឹងថា មុនរយៈពេល១៥ថ្ងៃនៃពិធីសែនបុណ្យចូលឆ្នាំចិន លោកតែងកុម្ម៉ងទិញផ្កាអង្គារសិល្ប៍ដែលដុះតាមធម្មជាតិពីប្រជាជនដែលរស់នៅតំបន់ភ្នំក្រវ៉ាញ ខេត្តពោធិ៍សាត់ យកមកលក់ឱ្យម៉ូយនៅម្តុំគល់ស្ពានជ្រោយចង្វារ ដោយលក់ក្នុងតម្លៃចាប់ពី ៥ដុល្លារ ឬ១០ដុល្លារ ឡើងទៅដល់តម្លៃជាង ១០០ ឬ ២០០ដុល្លារ ក៏មានដែរ អាស្រ័យទៅតាមទំហំដើមតូច ឬធំ ហើយមកទល់ថ្ងៃ២៤ខែមករា ឆ្នាំ២០២៥ នេះ ការលក់ចេញបានជាបណ្តើរៗ ប៉ុន្តែមិនទាន់ដាច់ខ្លាំងទេ ហើយជាបទពិសោធរាល់ឆ្នាំទាល់តែនៅដល់រយៈពេល២ ឬ ៣ថ្ងៃ មុនថ្ងៃសែនទៀបមានគេសម្រុកទិញច្រើន។

អ្នកលក់ផ្កាហ្វុងស៊ុយរូបនេះបាននិយាយថា ៖ «ឆ្នាំនេះ ខ្ញុំបានបញ្ចេញទុនប្រមាណជា ៣០០០ដុល្លារប៉ុណ្ណោះ តិចជាងឆ្នាំកន្លងទៅ ខណៈដែលកាលពីប៉ុន្មានឆ្នាំមុនដើមទុនសម្រាប់ទិញផ្កាទុកលក់បន្តមានទំហំរហូតដល់ចន្លោះពី ៥០០០ ទៅ ៨០០០ដុល្លារ។ គិតតាំងពីឆ្នាំ២០២០មក និន្នាការនៃការលក់ផ្កាហ្វុងស៊ុយឬផ្កាអង្គារសិល្ប៍មានការថយចុះជាលំដាប់ ហើយបើតាមខ្ញុំគិតនៅមិនទាន់មានសញ្ញាណឡើងវិញខ្លាំងដូចឆ្នាំ២០២៩នោះទេ ប៉ុន្តែ ខ្ញុំរំពឹងថា ឆ្នាំនេះល្អជាងកាលពី ២ ឬ ៣ឆ្នំាមុន ហើយខ្ញុំក៏សម្រិតសម្រាំងយកតែផ្កាល្អមកលក់តែប៉ុណ្ណោះ»។

ស្រដៀងគ្នានេះ អាជីវករម្នាក់ទៀត ឈ្មោះ ប៊ុន សុភក្រ័ត ជាម្ចាស់ហាងផ្កាផ្ទះវ័រ ស្ថិតនៅសង្កាត់ព្រៃជីស័ក មុខព្រលានយន្តហោះពោធិចិនតុង បានលើកឡើងថា ឆ្នាំនេះរបរលក់ផ្កាអង្គារសិល្ប៍ហាក់មានសភាពស្ងប់ស្ងាត់ជាងឆ្នាំមុនៗ ពោលគឺស្ងប់ស្ងាត់តាំងពីប្រមាណ៣ឆ្នាំមុន ដោយកាលពីឆ្នាំ២០២០ អាជីវករខាងលើនេះបានបញ្ចេញទុនរហូតដល់ជាង ១០ ០០០ដុល្លារឯណោះ ដើម្បីទិញផ្កាមកស្តុកទុកលក់នៅពេលជិតដល់ថ្ងៃមាឃចិនម្តងៗ។

លោកបានបញ្ជាក់ថា ៖ « ដោយសារការលក់មានការធ្លាក់ចុះជាបន្តបន្ទាប់នោះ សម្រាប់ឆ្នាំ២០២៥នេះ លោកដាក់ដើមទុនប្រមាណជាង ៣០០០ដុល្លារ ទិញផ្កាអង្គារសិល្ប៍ ដើមក្រូចភ្នំ(ក្រូចជ្រក់) និងដើមឈើមួយចំនួនទៀតទុកគ្រាន់លក់កំដរហាងកុំឱ្យស្ងាត់»។

លោក រិទ្ឋិ ភារម្យ សាស្រ្តាចារ្យបង្រៀន និងគ្រប់គ្រងនៅសាលាឯកជនមួយក្នុងរាជធានីភ្នំពេញបាននិយាយថា សម្រាប់ពិធីបុណ្យចូលឆ្នាំចិន ឆ្នាំ២០២៥នេះ លោកបានទិញដើមផ្កាអង្គារសិល្ប៍ធំៗចំនួន ០៣ដើម ដោយក្នុងមួយដើមមានតម្លៃ ១០០ដុល្លារ យកទៅដាក់តាំងលម្អនៅសាលាដែលមានចំនួន០៣អាគារ​ ។

លោកបានបញ្ជាក់ថា ស្ទើរតែរាល់ឆ្នាំ នៅពេលដល់រដូវ ឬពិធីចូលឆ្នាំចិន លោកតែងទិញដើមផ្កាមកដាក់តាំងលម្អសាលាដើម្បីឱ្យមានសោភ័ណភាព ទោះបីមិនសូវមានជំនឿទៅលើហ្វុងស៊ុយ ប៉ុន្តែយ៉ាងហោចណាស់ក៏បានបង្កើតភាពស្រស់ស្អាតនៅក្នុងបរិវេណសាលានាឱកាសបុណ្យចូលឆ្នាំថ្មីប្រពៃណីជនជាតិចិន-វៀតណាមនេះផងដែរ។

យ៉ាងណាក៍ដោយ តាមរយៈកិច្ចសម្ភាសន៍ខ្លីជាមួយអាជីវករដែលជាអ្នកលក់ដើមផ្កាហ្វុងស៊ុយ ឬផ្កាអង្គារសិល្ប៍ខាងលើបានបង្ហាញថា និន្នាការនៃការទិញ-លក់ដើមផ្កាដែលមានជំនឿលើករាសីបានធ្លាក់ចុះ ខណៈដែលការធ្លាក់ចុះនេះបានកើតមានតាំងពីអំឡុងឆ្នាំ២០២០មកម្ល៉េះ ដែលអាជីវករបានលើកឡើងថាអាចបណ្តាលមកពីបញ្ហាប្រាក់ចំណូលរបស់ប្រជាជន ហើយមួយចំណែកទៀតក៏អាចបណ្តាលមកពីជំនឿទៅលើពណ៌រាសីប្រចាំឆ្នាំផងដែរ ដូចជា កាលពីឆ្នាំកន្លងទៅ ដើមផ្កាអង្គារសិល្ប៍ និងដើមផ្កាស្បៃរឿងពណ៌លឿង ពណ៌ក្រហម ត្រូវលក់ចោលស្ទើរទាំងអស់ ព្រោះជំនឿពណ៌រាសី គឺពណ៌ខៀវ៕ អត្ថបទ ៖ ឈុនហ៊ាត