ភ្នំពេញ ៖ ក្រុមហ៊ុនយូនីលីវើ (ខេមបូឌា ) លីមីតធីត – Unilever (Cambodia) Limited  ​ដែល​ធ្លាប់នាំចូល​ផលិតផលពីប្រទេសថៃ​នាពេលកន្លងមកបានប្រកាស​លែងនាំចូលផលិតផលពីប្រទេសថៃ ហើយគ្រោងងាកមក​រៀបចំខ្សែច្រវាក់​ផលិតកម្មរបស់ខ្លួននៅក្នុងប្រទេស​កម្ពុជា នៅចុងឆ្នាំ ២០២៦នេះ។

យោងតាមសេចក្ដីប្រកាសព័ត៌មានរបស់​ក្រុមហ៊ុន​ យូនីលីវើ​ (ខេមបូឌា) លីមីធីត ដែលជា​ក្រុមហ៊ុន​បុត្រសម្ព័ន្ធរបស់​ក្រុមហ៊ុន​យូនីលីវើ​ ចក្រភពអង់គ្លេស​ បានឱ្យដឹងថា បច្ចុប្បន្ននេះ ក្រុមហ៊ុនរបស់ខ្លួនបាននាំផលិតផល ១០០% ពីប្រទេស​ហ្វីលីពីន ឥណ្ឌូនេស៊ី ចិន វៀតណាម ម៉ាឡេស៊ី​និ​ងប្រទេស​ឥណ្ឌា ដើម្បីផ្គត់ផ្គង់ក្នុងទីផ្សារកម្ពុជា។

ពន្យល់លើមូលហេតុដែលសាធារណជនឃើញមានលេខកូដ ៨៥៥ លើផលិតផលរបស់ខ្លួន ក្នុងទីផ្សារកម្ពុជា Uniliver Cambodia បានបញ្ជាក់ថា ផលិតផលទាំង​នោះ គឺជា​ស្តុកចាស់​នៅសេស​សល់ មិនមែនជាផលិតផលនាំចូលថ្មីនោះទេ។

បើតាម​សេចក្ដីជូនដំណឹង​របស់ក្រុមហ៊ុន​បានឱ្យដឹងថា តាមរយៈប្រតិបត្តិការអាជីវកម្ម​របស់ក្រុមហ៊ុន​នៅក្នុងព្រះរាជាណាចក្រកម្ពុជា ក្រុមហ៊ុន​យូនីលីវើ​ (ខេមបូឌា) លីមីតធីត ត្រូវបាន​ទទួលស្គាល់​ពីអាជ្ញាធរ​ពាក់ព័ន្ធ ចំពោះការអនុវត្ត​តាមច្បាប់ ការ​បង់ពន្ធ និងការរួម​ចំណែក​របស់ក្រុមហ៊ុន​ចំពោះសេដ្ឋកិច្ច​ និងសង្គម​កម្ពុជា។

លោកឧកញ៉ា​តែ តាំង​ប៉ ប្រធានម្ព័ន្ធសមាគមសហគ្រាស​ធុន​តូច និងមធ្យមកម្ពុជា​ ( SME ) បានមានប្រសានស៍ថា​ ចាប់តាំងពីប្រជាពលរដ្ឋ​កម្ពុជា​ធ្វើពហិកា​លើ​ផលិតផល​ថៃ ដោយសារតែការឈ្លានពានរបស់ថៃមក​លើ​ដែនអធិបតេយ្យភាពកម្ពុជា មាន​ក្រុមហ៊ុន​ដែលធ្លាប់ចូលផលិតផលពីថៃជាច្រើន បានងាកមក​ផលិត​នូវទំនិញ​ក្នុងស្រុក​ដើម្បីផ្គត់ផ្គង់វិញ ហើយកំណើន​រោងចក្រ​សហគ្រាស​ផលិតទំនិញនៅក្នុងប្រទេស​កម្ពុជា​រំពឹង​ថា​កើនឡើង​ខ្ពស់​នៅចុងឆ្នាំ ២០២៧។

លោកឧកញ៉ា​បន្តថា ទិន្នាការ​ធុរជន​ដែល​ចាប់ផ្ដើម​ផលិតទំនិញនៅក្នុងប្រទេស​កម្ពុជា ដោយ​កាត់បន្ថយការ​នាំចូលពីបរទេស មិនថា​តែមកពីប្រទេសថៃ ឬប្រទេស​ផ្សេងទៀត គឺស្រប​ទៅនឹង​យុទ្ធសាស្ត្រ​របស់រាជរដ្ឋាភិបាលកម្ពុជា ដែល​កន្លងមក​បានខិតខំជំរុញឱ្យសហគ្រិនក្នុងស្រុក​ពង្រីក​ និងពង្រឹង​គុណភាពផលិតផល​ក្នុងស្រុកឱ្យ​បានច្រើន​កាត់បន្ថយការ​នាំចូល​ ពីព្រោះថា​ផលិតនៅក្នុងប្រទេស​នឹងធ្វើឱ្យ​ចំណេញខ្ពស់ បង្កើត បង្កើត​ប្រាក់ចំណូលបន្ថែម ដល់ពលរដ្ឋ​ក្នុងស្រុកតាមបង្កើតការងារ ការទិញ កសិផល​ពីកសិករ​ ដើម្បីបម្រើ​ខ្សែច្រវាក់ផលិតកម្ម​។

បើតាមលោក​ឧកញ៉ា​បានបញ្ជាក់ថា ការពហិការបស់​ពលរដ្ឋខ្មែរ​លើ​ផលិតផល​ថៃ គឺជា​ឱកាស​ដ៏ល្អបំផុត​សម្រាប់សហគ្រិនក្នុង​ស្រុកពង្រឹង និងពង្រីកផលិតផលរបស់ខ្លួន ដើម្បីជំនួសឱ្យផលិតផល​របស់ថៃ និងជាឱកាស​ក្នុងការពង្រឹង​សេដ្ឋកិច្ច​កម្ពុជា​ឱ្យកាន់តែខ្លាំង ដោយមិនចាំបាច់ពឹងលើផលិតផល​បរទេសទៀត៕