សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សំបកកង់ម៉ូតូចាស់ៗដែលអស់គុណភាពសម្រាប់ប្រើប្រាស់ ភាគច្រើនត្រូវបានគេបោះចោលរហូតក្លាយទៅជាក្ដីកង្វល់ដែលជះឥទ្ធិពលអវិជ្ជមានដល់បរិស្ថាន ខណៈដែលការកែច្នៃសម្រាប់ប្រើប្រាស់ឡើងវិញមានភាគរយតិចតួចបំផុត។ ដោយឡែក សម្រាប់តែបុរសម្នាក់នេះ បានយកសំបកកង់ម៉ូតូចាស់ទាំងនោះ កែច្នៃបង្កើតជារូបសត្វធំៗសម្រាប់ដាក់តាំងលម្អជាច្រើន ហើយអាចលក់បានក្នុងតម្លៃថ្លៃគួរសម។
លោក មាន ទិដ្ឋភាព វ័យ ៣៧ឆ្នាំ ជាម្ចាស់សិប្បកម្មផលិតរូបសត្វចេញពីសំបកកង់ចាស់ៗបានប្រាប់ AMS Economy ថា៖
«សម្រាប់ការផលិតរូបសត្វពីសំបកកង់ចាស់ៗនេះ យើងចាប់ផ្ដើមដំបូងកាលពីឆ្នាំ២០១៩ ដោយគ្រានោះយើងធ្វើត្រឹមរូបចម្លាក់សត្វមានទំហំតូចប៉ុណ្ណោះ ប៉ុន្តែក្រោយមក ដោយមានការចាប់អារម្មណ៍ពីសំណាក់ម្ចាស់រមីណយដ្ឋាន ក៏ដូចជាអ្នកដែលមានធនធានមួយចំនួនកុម្មង់ឱ្យធ្វើរូបទំហំធំ ក៏ចាប់ផ្តើមធ្វើតាមការចង់បានរបស់ភ្ញៀវ ឬអតិថិជន»។
លោកបន្តថា ៖
«សម្រាប់ការផលិត យើងត្រូវការរយៈពេលយូរ ដោយរូបមួយអាចចំណាយពេលដល់ទៅមួយខែក្នុងការចៀរ កាត់ បិត រុំ ធ្វើយ៉ាងណាឱ្យកម្ទេចសំបកកង់ទាំងឡាយប្រែក្លាយទៅជារូបផ្សេងៗតាមការកម្ម៉ង់។ ឯតម្លៃវិញ រូបសត្វនីមួយៗអាចមានតម្លៃចាប់ពី ៨០០-៣០០០ដុល្លារអាស្រ័យតាមទំហំ»។
លោកបានបន្តឱ្យផងដែរថា ចំពោះអតិថិជនរបស់លោកភាគច្រើនជាអ្នកនៅតាមបណ្ដាខេត្ត ដូចជា កោះកុង កំពង់ឆ្នាំង ពោធិ៍សាត់ បាត់ដំបង កំពង់ចាម កំពង់ស្ពឺ និងសៀមរាបជាដើម ដែលគេទិញយកទៅដាក់តាំងលម្អតាមសួន ឬទីធ្លាផ្សេងៗដែលជាផ្នែកមួយជួយបន្ថែមភាពស្រស់ស្អាតផង និងកាត់បន្ថយកាកសំណល់ក្នុងបរិស្ថានផង។
ពាក់ព័ន្ធនឹងវត្ថុធាតុដើមវិញ ដើម្បីអាចផលិតចេញជារូបសត្វនីមួយៗបាន គេត្រូវការប្រើសំបកកង់ម៉ូតូចាស់ៗ ដែលពីមុនគេដើរប្រមូលទិញនៅតាមកន្លែងប៉ះកង់-ម៉ូតូនានា ប៉ុន្តែបច្ចុប្បន្ននេះ មានអ្នកដើរប្រមូលទិញយកមកលក់ឱ្យសិប្បកម្មរបស់លោកដល់កន្លែងតែម្ដង។
គួរបញ្ជាក់ដែរថា លោក ទិដ្ឋភាព បានរៀនចប់សាលាវិចិត្រសិល្បថ្នាក់មធ្យមសិក្សាផ្នែកវិចិត្រកម្ម ហើយជំនាញក្នុងការផលិតនេះគឺកើតចេញពីមូលដ្ឋានគ្រឹះផ្នែកគំនូរ រួមផ្សំនឹងការកែច្នៃ ក៏ដូចជាយកគំនិតបន្ថែមពីរបទេសមកច្នៃផលិតបន្ថែមចេញជារូបសត្វធំៗគ្រប់ប្រភេទ។ យ៉ាងណាមិញ អាជីវកម្មមួយនេះក៏មានភាពប្រឈមនឹងផលលំបាកខ្លះដែរ ដូចជាផលលំបាកក្នុងការចៀរបំបែកសំបកកង់ដើម្បីយកមកផលិត។ ប៉ុន្តែទោះជាយ៉ាងណា លោកនៅតែព្យាយាម ត្បិតវាជាអាជីវកម្មកែច្នៃដែលលោកស្រឡាញ់ ហើយអាចចូលរួមកាត់បន្ថយសំណល់ និងថែរក្សាបរិស្ថានផងដែរ៕
Account
Security
Favourite Content