សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អាជីវកម្មខ្នាតតូច ឬអាជីវកម្មក្រៅប្រព័ន្ធ ជាប្រភេទអាជីវកម្មដែលប្រើប្រាស់ទុនតិច ហើយភាគច្រើនមិនបានចុះក្នុងបញ្ជីអាជីវកម្ម។ អាជីវកម្មប្រភេទនេះអាចរួមមានការលក់ម្ហូបអាហារតាមរទេះ លក់អីវ៉ាន់ចាប់ហួយ របរម៉ូតូដុប ជាងជួសជុលម៉ូតូ និងអ្នករត់កង់បីជាដើម។ យ៉ាងណាក៏ដោយ អាជីវកម្មប្រភេទនេះច្រើនតែជួបប្រទះបញ្ហាក្នុងការរកប្រាក់ចំណេញ ងាយបើក តែក៏ងាយនឹងបិទទៅវិញផងដែរ ប្រសិនបើម្ចាស់អាជីវកម្មនីមួយៗមិនមានផែនការច្បាស់លាស់។
អ្នកស្រី សុធារី នាយិការក្រុមហ៊ុន 3s Consultant បានមានប្រសាសន៍ថា អាជីវកម្មខ្នាតតូច ឬអាជីវកម្មក្រៅប្រព័ន្ធនេះ ច្រើនតែជួបបញ្ហាដោយសារតែពួកគាត់មិនចេះរៀបចំផែនការហិរញ្ញវត្ថុ និងរបាយការហិរញ្ញវត្ថុឱ្យបានច្បាស់លាស់។
អ្នកស្រីបានមានប្រសាសន៍បន្តទៀតថា គ្រប់អាជីវកម្មទាំងអស់គួរតែមានរបាយការណ៍ហិរញ្ញវត្ថុផ្ទាល់ខ្លួន ពីព្រោះវាមានអត្ថប្រយោជន៍ច្រើន ដោយវាបានបង្ហាញពីចំណាយ ចំណូលច្បាស់លាស់ដល់ម្ចាស់អាជីវកម្ម។ មិនត្រឹមតែបង្ហាញពីចំណូល ចំណាយនៃអាជីវកម្មមួយប៉ុណ្ណោះទេ ការធ្វើរបាយការណ៍ហិរញ្ញវត្ថុនេះ ក៏អាចឱ្យម្ចាស់អាជីវកម្មស្វែងយល់ពីទីផ្សារឱ្យកាន់តែប្រសើរជាងមុនទៀតផង។
តាមការសង្កេតរបស់អ្នកស្រី នៅពេលដែលម្ចាស់អាជីវកម្មមួយមិនមានរបាយការណ៍អាជីវកម្ម ពួកគេនឹងពិបាកក្នុងការរកកម្ចី ម្យ៉ាងទៀតពួកគេក៏មិនបានដឹងថាខ្លួនឯងកំពុងស្ថិតក្នុងស្ថានភាពហិរញ្ញវត្ថុកម្រិតណា។
ត្រង់ចំណុចនេះ អ្នកស្រីបានសង្កត់ធ្ងន់ថា៖
« ចំណុចសំខាន់ៗដែលម្ចាស់អាជីវកម្មគួរមាន គឺគាត់ចេះប្រើទុនបង្វិល តាមរយៈការប្រើប្រាស់វិធីលំហូរសាច់ប្រាក់ ឬក៏កម្ចី និងទុនបម្រុង ព្រោះទុនបង្វិលនេះវាមានអត្ថប្រយោជន៍ច្រើន ប៉ុន្តែក៏ទាមទារឱ្យអ្នកប្រើប្រាស់យល់ដឹងច្រើនផងដែរ។»
សម្រាប់ករណីដែលអាជីវកម្មមួយមិនអាចកំណត់ប្រាក់ចំណេញបាន អ្នកស្រីលើកទឹកចិត្តឱ្យម្ចាស់អាជីវកម្មចេះធ្វើរបាយការណ៍ឱ្យបានត្រឹមត្រូវ និងបើអាចគួរតែចំណាយប្រាក់ខ្លះក្នុងការទទួលសេវាកម្មប្រឹក្សាយោបល់អាជីវកម្ម។
ជាចុងក្រោយ អ្នកស្រីបានបន្តលើកទឹកចិត្តឱ្យម្ចាស់អាជីវកម្មគ្រប់រូបចាប់ផ្ដើមធ្វើរបាយការណ៍ និងត្រូវត្រួតពិនិត្យជាប្រចាំ។ កាន់តែចាំបាច់ទៀតនោះ ពួកគេត្រូវចេះគ្រប់គ្រងបំណុលឱ្យបានត្រឹមត្រូវ និងកំណត់ចំណូល ចំំណាយឱ្យបានច្បាស់លាស់ផងដែរ៕
Account
Security
Favourite Content