សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានបន្តយកចិត្តទុកដាក់គិតគូរ ស្វែងយល់បន្ថែម អំពីបញ្ហារៀបចំសណ្ដាប់ធ្នាប់ក្នុងរាជធានីភ្នំពេញ ឱ្យមានរបៀបរៀបរយ និងបញ្ចៀសការកកស្ទះ នាពេលខាងមុខ ដើម្បីធានាបាននូវសុខភាពផ្លូវកាយ ផ្លូវចិត្តរបស់ពលរដ្ឋ ។
នៅក្នុងកិច្ចប្រជុំស្ដីពីការពិភាក្សាបញ្ហាសណ្ដាប់ធ្នាប់ក្នុងរាជធានីភ្នំពេញ កាលពីពេលថ្មីៗនេះ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ការជួបជុំគ្នានាពេលនេះ គឺដើម្បីពញ្ញាក់ស្មារតីដល់ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ និងមន្ត្រីជំនាញអំពីបញ្ហានានាជុំវិញការរៀបចំទីក្រុងដែលនៅមានសេសសល់ច្រើន គួរគិតគូរយកចិត្តទុកដាក់ស្វែងយល់រកដំណោះស្រាយឱ្យមានរបៀបរៀបរយ និងបញ្ចៀសការកកស្ទះនាពេលខាងមុខ ដើម្បីធានាបាននូវសុខភាពផ្លូវកាយ ផ្លូវចិត្តរបស់ប្រជាពលរដ្ឋក្នុងរាជធានីភ្នំពេញ។
ឯកឧត្តមបានមានប្រសាសន៍ថា ៖
«មានការរៀបចំសណ្តាប់ធ្នាប់របស់ប្រជាពលរដ្ឋដែលរស់នៅលើប្រឡាយ ការដោះស្រាយបញ្ហាសំណង់នៅលើចិញ្ចើមផ្លូវរឺដងផ្លូវដែលអាចបង្កការកកស្ទះ រៀបចំរង្វង់មូលចរាចរណ៍ បំពាក់ភ្លើងស្តុបចរាចរណ៍បន្ថែម ក៏ជាអាទិភាពមួយនៃការងាររបស់យើង ធ្វើយ៉ាងណា ធានាបាននូវការធ្វើចរាចរណ៍ដោយរលូននៅលើដងផ្លូវ ធានាបាននូវសុខភាពផ្លូវកាយផ្លូវចិត្តរបស់អ្នកធ្វើដំណើរតាមដងផ្លូវនិងប្រជាពលរដ្ឋក្នុងរាជធានីភ្នំពេញ»។
ឯកឧត្តមឧបនាយករដ្ឋមន្ត្រី បានបញ្ជាក់ថា ការសិក្សាអំពីបញ្ហាសណ្តាប់ធ្នាប់ក្នុងរាជធានីភ្នំពេញ គឺជាបញ្ហាសំខាន់មួយក្នុងគោលបំណងដើម្បីប្រមូលបានព័ត៌មានទាក់ទិនទៅនឹងសណ្ដាប់ធ្នាប់ក្នុងទីក្រុងនិងដើម្បីឱ្យក្រុមការងារបានយល់ច្បាស់ពីអ្វីទៅដែលហៅថាការរៀបចំសណ្ដាប់ធ្នាប់ក្នុងទីក្រុង ហើយត្រូវផ្ដោតការយកចិត្តទុកដាក់ស្វែងយល់បន្ថែមលើបញ្ហានេះ និងត្រូវរួមគ្នាដោះស្រាយ។ កិច្ចការទាំងអស់នេះគឺសំដៅទៅលើការរៀបចំក្រុងនាពេលអនាគត ដូច្នេះ ត្រូវកំណត់ចំណុចគោលនានាដែលត្រូវដោះស្រាយក្នុងគោលនយោបាយរៀបចំក្រុង។
តាមរយៈកិច្ចប្រជុំនេះដែរ ក្រសួងរៀបចំដែនដី នគរូបនីយកម្ម និងសំណង់ បានសាកល្បងស្រង់ និងវាយតម្លៃបញ្ហាប្រឈមនៅតាមបណ្តាទីប្រជុំជននៅរាជធានីភ្នំពេញ ក្នុងនោះក្រុមការងារបានពិនិត្យឃើញនូវបញ្ហាប្រឈមមួយចំនួនដូចជា៖ ១. សំណង់អគារចាស់ទ្រុឌទ្រោម ២. សំណង់មិនរៀបរយ ដោយមានការតាំងទីលំនៅលើប្រឡាយទឹកកខ្វក់ លើចិញ្ចើមផ្លូវ លើចិញ្ចើមផ្លូវរថភ្លើង តាមបណ្តោយច្រាំងទន្លេ និងលើអគារសហកម្មសិទ្ធ ៣. បញ្ហាដែលប៉ះពាល់ដល់សោភ័ណភាព និងសុវត្ថិភាព៖ ផ្ទាំងប៉ាណូផ្សាយពាណិជ្ជកម្ម ស្ថានីយ៍ និងមណ្ឌលសន្និធិប្រេងឥន្ធនៈ និងឧស្ម័ន ប្រព័ន្ធខ្សែភ្លើង ខ្សែកាប និងអ៊ិនធឺណែត អាជីវកម្មមិនរៀបរយ និងតំបន់បណ្តុំអាជីវកម្មចម្រុះ បញ្ហាសំរាម និងបញ្ហាលូ និងប្រឡាយទឹកកខ្វក់ ៤. ហេដ្ឋារចនាសម្ព័ន្ធផ្លូវ ៖ ប្រព័ន្ធភ្លើងសញ្ញាចរាចរណ៍ ប្រព័ន្ធបណ្តាញផ្លូវចរាចរណ៍ លំហសាធារណៈ និងចំណតរថយន្តនិងរថយន្តក្រុង និង៥. បញ្ហាទឹកជន់លិច ៕
Account
Security
Favourite Content