សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បាត់ដំបង ៖ សាច់ក្រក ជាប្រភេទអាហារកែច្នៃពីសាច់យកទៅចិញ្ច្រាំលាយគ្រឿងផ្សំតាមរូបមន្ត និងអាចរក្សាទុកបានយូរ ដែលគេអាចយកទៅចៀនទទួលទានយ៉ាងឆ្ងាញ់ពិសារ។ ដោយមានទីផ្សារល្អគួរសម សិប្បកម្មផលិតសាច់ក្រកមួយនៅខេត្តបាត់ដំបងកំពុងផលិត ក៏ដូចជាផ្គត់ផ្គង់សាច់ក្រកក្នុងទីផ្សារ មិនថាលក់រាយក្នុងតំបន់ ឬបោះដុំទៅតាមម៉ាត និងអាហារដ្ឋាននានាស្ទើរពេញប្រទេស។
អ្នកស្រី រ៉ូហ្សា លីតា ជាម្ចាស់សិប្បកម្មផលិតសាច់ក្រកលក្ខណៈគ្រួសារមួយក្រោមស្លាកយីហោ «VC សាច់ក្រកឆ្ងាញ់បាត់ដំបង» មានទីតាំងនៅភូមិជ្រៃកោង សង្កាត់ស្លាកែត ឃុំស្លាកែត ខេត្តបាត់ដំបង បានមានប្រសាសន៍ថា៖
«សាច់ក្រកបាត់ដំបងយើងផលិតជាលក្ខណៈគ្រួសារ តរូបមន្តពីអ្នកម្ដាយ ដែលយើងផលិតបោះឱ្យដុំតាមម៉ាត តាមភោជនីយដ្ឋាននៅភ្នំពេញ និងលក់ឱ្យអ្នកក្នុងតំបន់ ហើយក្រៅពីនេះគឺលក់តាមអនឡាញដែលគេកម្ម៉ង់ទិញផងដែរ»។
អ្នកស្រីបន្តថា៖
«សម្រាប់សាច់ក្រករបស់យើងមានបីរសជាតិ គឺរសជាតិធម្មតាតម្លៃ ៤ម៉ឺនរៀល រសជាតិហឹរតិច និងរសជាតិហឺរល្មមតម្លៃ ៤៥០០០រៀល ក្នុងមួយគីឡូក្រាម។ ចំពោះវត្ថុធាតុដើម សាច់ក្រកយើងផលិតពីសាច់ជ្រូក ពោះវៀនជ្រូក សុទ្ធសឹងជាផលិតផលក្នុងតំបន់ផ្ទាល់ដែលជាផ្នែកមួយជួយដល់ជីវភាពសហគមន៍បានមួយផ្នែក»។
សម្រាប់គុណភាពសាច់ក្រកនេះដែរ ផលិតពីសាច់ថ្មីៗ មិនមានដាក់នូវសារធាតុរក្សាទុកដែលប៉ះពាល់ដល់សុខភាព មានអនាម័យ ដែលធ្វើឱ្យសាច់ក្រកមានរសជាតិឆ្ងាញ់ ក្លិនឈ្ងុយ ដែលចំណុចពិសេសទាំងនេះហើយដែលអតិថិជនតែងគាំទ្រជាហូរហែ។ ដោយឡែក បរិមាណនៃការផលិត អាស្រ័យតាមអ្នកកម្ម៉ង់ ដូចជានៅតាមម៉ាត និងអាហាររដ្ឋានជាធម្មតាគេកម្ម៉ង់រៀងរាល់ ១០ថ្ងៃម្ដង ដោយផលិតចន្លោះ ៥០-៧០គីឡូក្រាម ចំណែកឯការកម្ម៉ង់ផ្សេងទៀតដូចជាអតិថិជននៅខេត្តសៀមរាប ប៉ោយប៉ែត និងបាត់ដំបង គឺធ្វើឡើង ៣-៤ថ្ងៃម្ដង ក្នុបរិមាណ ២៥-៣០គីឡូក្រាម។
ទន្ទឹមគ្នានេះដែរ ម្ចាស់អាជីវកម្មខាងលើក៏បានលើកឡើងពីផលលំបាក ដែលភាគច្រើនទាក់ទងនឹងការធ្វើទីផ្សារ ក៏ដូចជាការផ្សព្វផ្សាយបន្ថែមទៀតឱ្យគេបានស្គាល់ និងដឹងពីគុណភាពសាច់ក្រកបាត់ដំបងមួយនេះ។ ចំណែកគម្រោងនាពេលអនាគត អ្នកស្រីចង់បើកជាហាងផ្ទាល់ខ្លួន ដែលជាផ្នែកមួយជួយឱ្យបងប្អូនមានការងារធ្វើបានមួយកម្រិត ក៏ដូចជាបង្កើតនូវបរិមាណសាច់ក្រករសជាតិថ្មីៗបន្ថែមទៀត៕
Account
Security
Favourite Content