សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចង្កៀងគោម ជាគ្រឿងលម្អតុបតែងមួយប្រភេទដែលគេនិយមដាក់តាំងដើម្បីបំភ្លឺផង និងឱ្យមានសោភ័ណភាពផងនៅពេលមានការប្រារព្ធពិធីបុណ្យណាមួយ ជាពិសេស ក្នុងឱកាសពិធីបុណ្យចូលឆ្នាំប្រពៃណីខ្មែរខាងមុខនេះ ដែលគេនិយមដាក់តាំងចង្កៀងគោមផ្ការំដួលក៏ដូចជាគោមផ្កាយនៅតាមលំនៅដ្ឋាន ដងផ្លូវក្នុងភូមិ និងតាមស្ថាប័នផ្សេងៗ។
អ្នកស្រី ឡាយ ហ៊ីម ជាម្ចាស់អាជីវកម្មលក់គ្រឿងតុបតែង ចម្លាក់ និងចង្កៀងគោម ល្ខោនស្បែកខ្មែរអង្គរ មានទីតាំងនៅផ្លូវជាតិលេខ១ ម្ដុំច្បារអំពៅ (ជិតប៉េងហួតបឹងស្នោរ) បានរៀបរាប់ថា៖
«សម្រាប់ចូលឆ្នាំខ្មែរនេះ យើងរំពឹងទុកថា ការលក់ចង្កៀងគោមនឹងកើនឡើង មិនថាលក់រាយឱ្យអ្នកយកទៅដេគ័រ ឬក៏បោះដុំនេះទេ ព្រោះបងប្អូនយើងនិយមទិញដើម្បីតុបតែងតាមផ្ទះ និងតាមកន្លែងពិធីផ្សេងៗនៅពេលជិតដល់ថ្ងៃចូលឆ្នាំ»។
អ្នកស្រីបន្តថា ៖
«សម្រាប់ផលិតផលរបស់ខាងយើងមានចង្កៀងផ្ការំដួល និងគោមផ្កាយ ដែលមានច្រើនទំហំអាស្រ័យលើតម្រូវការ និងការកម្ម៉ង់របស់អតិថិជន តួយ៉ាងដូចជាចង្កៀងផ្ការំដួលមានតម្លៃចាប់ពី ១០ដុល្លារឡើងទៅ។ ក្រៅពីនេះ ខាងយើងក៏មានលក់ជាផលិតផលចម្លាក់ពីស្បែក ក៏ដូចជាចង្កៀងគោមស្អាតដែលមានក្បាច់ប្លែកៗផងដែរ»។
អ្នកស្រីបានបន្តឱ្យដឹងទៀតថា បើតាមការកត់សម្គាល់ ភាគច្រើនចង្កៀងគោមដែលមានតម្រូវការគឺប្រភេទចង្កៀងគោមផ្ការំដួល ព្រោះជាផ្កាដែលតំណាងឱ្យប្រទេសកម្ពុជា ហើយក៏មានរូបរាងស្អាតផងដែរ ខណៈដែលការធ្វើក៏មិនសូវមានផលលំបាកពេកនោះទេ។
ចុងក្រោយ អ្នកស្រី ឡាយ ហ៊ីម ក៏សូមថ្លែងអំណរគុណដល់អតិថិជនដែលតែងតែគាំទ្រផលិតផលចង្កៀងគោមខ្មែរកន្លងមក ហើយសង្ឃឹមថានឹងមានការគាំទ្រកាន់តែច្រើនឡើងបន្ថែមទៀត។
គួរបញ្ជាក់ដែរថា ការព្យួរគោមនៅពេលបុណ្យចូលឆ្នាំខ្មែរត្រូវបានធ្វើឡើងក្នុងគោលបំណងសំខាន់ៗមួយចំនួនដូចជា ជួយបំភ្លឺផ្លូវឱ្យមើលឃើញច្បាស់សម្រាប់អ្នកធ្វើដំណើរពេលយប់ប្រកបដោយដោយសុវត្ថិភាព និងរីករាយក្នុងចិត្ត។ ដោយឡែកចំពោះការដាក់ក្នុងផ្ទះសម្បែងក៏កាន់តែបង្កើនសោភ័ណភាពយ៉ាងស្រស់ស្អាត និងចាត់ទុកជាសក្ខីភាពនៃការជូនពរជ័យពីទេវតាឆ្នាំថ្មីយាងចុះមកដល់ផែនដីឲ្យមនុស្សផងទាំងពួងមានរាសីខ្ពស់ ជោគជតាល្អគ្រប់ៗគ្នា។ ម្យ៉ាងវិញទៀត បើតាមជំនឿបែបអរូបិយយល់ថា មនុស្សយើងសុទ្ធតែទទួលឥទ្ធិពលពីផ្កាយនពគ្រោះ រួមមានភពអាទិត្យ ភពព្រះច័ន្ទ ភពអង្គារ ភពពុធ ភពព្រហស្បតិ៍ ភពសុក្រ និងភពសៅរ៍ ដែលមានការចែកវេនគ្នាបំភ្លឺពេលថ្ងៃ និងយប់ ហេតុនេះនៅពេលណាមនុស្សលោកបាត់បង់ពន្លឺពីភពផែនទាំងនេះ គេរស់នៅពុំមានសិរីមង្គលឡើយ៕
Account
Security
Favourite Content