សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រយៈពេល ៣ថ្ងៃពេញ ចាប់ពីថ្ងៃទី២៣ ដល់២៥ ខែតុលា ចុងសប្ដាហ៍នេះ CAFE26 ដែលជាវេទិកា និងពិព័រណ៍កសិកម្មដ៏ធំបំផុតប្រចាំឆ្នាំ នឹងចាប់ផ្ដើមបើកហើយ។ ផ្ដើមពីការវិនិយោគ និងភាពជាដៃគូអាជីវកម្ម រហូតដល់បច្ចេកវិទ្យាថ្មីៗ ការច្នៃប្រឌិត និងឱកាសទីផ្សារ CAFE 26 នឹងនាំមកនូវការជួបជុំគ្នារវាងកសិករ អាជីវករ អ្នកវិនិយោគ ស្ថាប័នហិរញ្ញវត្ថុ អ្នកច្នៃប្រឌិត យុវជន និងដៃគូអភិវឌ្ឍន៍ ទាំងក្នុង និងក្រៅប្រទេស។
នៅថ្ងៃសុក្រ ទី២៣ ខែតុលា CAFÉ 26 នឹងផ្ដោតលើវេទិកាជជែកអំពី “កសិស្បៀងអាហារ” ជាមួយវាគ្មិនល្បីៗ ដើម្បីពិនិត្យមើលថាតើកសិផលកម្ពុជាមានស្ដង់ដារ អនាម័យល្អកម្រិតណា ហើយធ្វើម៉េចទើបអាចពង្រីកខ្លួនកាន់តែធំនៅលើទីផ្សារជាតិ និងអន្ដរជាតិ។ តាមរយៈវេទិកាដែលនឹងត្រូវធ្វើឡើងជាវគ្គៗ និងបន្ដបន្ទាប់គ្នានៅថ្ងៃដំបូងនេះ ក៏មានជជែកលើបញ្ហាគន្លឹះសំខាន់ចំនួន ៣ ផ្សេងទៀតដែរ គឺមានដូចជា៖ ច្បាប់ និងភូតគាមអនាម័យចំណីអាហារ ជជែកពីប្រធានបទខ្សែច្រវ៉ាក់ផ្គត់ផ្គង់ និងប្រធានបទ និងការផ្ដល់ឥណទានសម្រាប់ដំណើរការច្រវ៉ាក់ផលិតកម្ម។
ចំពោះនៅព្រឹកថ្ងៃសៅរ៍ ទី២៤ គឺជាថ្ងៃប្រកាសបើកវេទិកាថ្នាក់ជាតិ និងអន្ដរជាតិ របស់កម្មវិធី CAFÉ 26 ជាផ្លូវការ ដោយមានការអញ្ជើញចូលរួមជាគណៈអធិបតី វាគ្មិនពិសេស និងចូលរួមទស្សនាពិព័រណ៍កសិកម្ម ស្បៀងអាហារ ផលិតផលរាប់រយស្ដង់។ នៅថ្ងៃទី២នេះ រដ្ឋមន្ដ្រីក្រសួងកសិកម្ម ក្រសួងពាណិជ្ជកម្ម, ក្រសួងពាណិជ្ជកម្ម, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ព្រមទាំងតំណាងស្ថាប័នពាក់ព័ន្ធសំខាន់ៗមួយចំនួនទៀត នឹងឡើងថ្លែងពីការអភិវឌ្ឍន៍វិស័យកសិស្បៀងអាហារ និងផែនការសកម្មភាពរបស់ស្ថាប័នរៀងៗខ្លួន ដើម្បីជំរុញការអភិវឌ្ឍវិស័យកសិកម្ម និងស្បៀងអាហារនៅកម្ពុជា។
ដោយឡែក នៅថ្ងៃអាទិត្យ ទី២៥ ខែតុលា ដែលជាថ្ងៃទី៣នៃព្រឹត្ដិការណ៍ CAFÉ 26 ស្ដង់ជាច្រើននៅតែបើកបញ្ឈរចាំអ្នកទស្សនា ខណៈដែលមន្ត្រីក្រសួងកសិកម្ម និងអង្គការស្បៀងអាហារ និងកសិកម្ម នៃសហប្រជាជាតិ(FAO) សរុបរបាយការណ៍លទ្ធផលរបស់ខ្លួន និងបើកពិធីចុះហត្ថលេខាប្រគល់ និងទទួលហិរញ្ញប្បទាន ដើម្បីវិបុលភាពទីជនបទ ប្រកបដោយបរិយាបន្ន។ កម្មវិធីក៏នឹងមានប្រគល់ប័ណ្ណសរសើរជូនដល់តំណាងសហគមន៍កសិកម្ម ជាមួយនឹងឧបករណ៍កសិកម្មទំនើបៗ មានដូចជា៖ ត្រាក់ទ័រ គោយន្ដ ម៉ាស៊ីនច្រូត និងដ្រូនបាញ់ថ្នាំកសិកម្មជាដើម។
សូមរំលឹកជូនថា នេះជាលើកទី២ ហើយដែលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ រៀបចំកម្មវិធី CAFÉ នេះឡើង។ ដោយឃើញពីវឌ្ឍនភាព និងបង្កើតឱកាសដ៏ប្រសើរសម្រាប់អ្នកពាក់ព័ន្ធក្នុងវិស័យកសិកម្ម និងស្បៀងអាហារ CAFÉ ត្រូវបានចាត់ទុកជា “វេទិកា និងពិព័រណ៍” ដ៏អស្ចារ្យប្រចាំឆ្នាំនីមួយៗ។
តស់…ប្រិយមិត្ដត្រៀមខ្លួនរួចហើយ ឬនៅ? ជួបគ្នាចុងសប្ដាហ៍នេះ ចាប់ពីថ្ងៃទី២៣ ដល់ថ្ងៃទី២៥ ខែតុលា ឆ្នាំ២០២៦ ដើម្បីចូលរួមជាមួយព្រឹត្តិការណ៍ដ៏អស្ចារ្យ រីករាយជាមួយភាពរីកចម្រើននៃវិស័យកសិកម្មកម្ពុជា ជាពិសេស ឱកាសស្វែងរកដៃគូសហការអាជីវកម្មពាណិជ្ជកម្មជាច្រើន ហើយក៏អាចភ្លក់រសជាតិអាហារ និងទិញផលិតផលកសិកម្មក្នុងស្រុកបានយ៉ាងសម្បូរបែបថែមទៀតផង៕
Account
Security
Favourite Content