កណ្តាល ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា កាលពីថ្ងៃចុងសប្ដាហ៍កន្លងទៅនេះ បានឆ្លៀតចុះជួបសំណេះសំណាល និងពិនិត្យមើលការប្រមូលផលនេសាទរបស់ប្រជានេសាទនៅក្នុងភូមិសាស្ត្រស្រុកពញាឮ ខេត្តកណ្តាល ខណៈដែលឆ្នាំនេះការប្រមូលផលត្រីមានការកើនឡើងច្រើន ។

តាមរយៈបណ្តាញទំនាក់ទំនងសង្គមផ្លូវការ សម្តេចបវរធិបតី ហ៊ុន ម៉ាណែត បានបញ្ជាក់ថា កាលពីថ្ងៃអាទិត្យកន្លងទៅនេះ សម្ដេចបានឆ្លៀតពេលចុះជួបសំណេះសំណាល និងមើលការប្រមូលផលនេសាទរបស់ប្រជានេសាទនៅក្នុងភូមិសាស្ត្រស្រុកពញាឮ ខេត្តកណ្តាល។ តាមបងប្អូននៅទីនោះប្រាប់ ឆ្នាំនេះការប្រមូលផលត្រីមានការកើនឡើងច្រើន បើប្រៀបធៀបជាមួយនៃផលនេសាទនៅឆ្នាំកន្លងទៅ។

សូមជម្រាបដែរថា កាលពីសប្ដាហ៍កន្លងទៅនេះ រដ្ឋបាលជលផលបានចេញសេចក្តីជូនដំណឹងដោយបញ្ជាក់ថា ក្នុងរដូវនេសាទឆ្នាំ២០២៤ -២០២៥ តាមការសង្កេត ត្រីបានចាប់ផ្តើមបន្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេសាប នៅក្នុងភូមិសាស្ត្រខេត្តកណ្តាល និងរាជធានីភ្នំពេញ ចាប់ពីថ្ងៃអាទិត្យ ៨កើត ដល់ថ្ងៃសុក្រ ១៣កើត ខែមិគសិរ ត្រូវនឹងថ្ងៃទី៨ ដល់ថ្ងៃទី១៣ ខែធ្នូ ឆ្នាំ២០២៤ ក្នុងករណីមេឃស្រឡះល្អ គ្មានភ្លៀងកក់ខែ ឬមិនទទួលរងឥទ្ធិពលព្យុះភ្លៀង។ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានលើកទឹកចិត្តប្រជាជនកម្ពុជាដែលមានចំណាប់អារម្មណ៍ ចាប់ផ្តើមធ្វើត្រីប្រហុកប្រពៃណីរបស់កម្ពុជា និងត្រីងៀត ផ្អក ត្រីឆ្អើរ ឬទឹកត្រី សូមរួសរាន់អញ្ជើញមកទិញត្រីតាមពេលវេលា និងទីកន្លែងដូចមានក្នុងសេចក្តីជូនដំណឹងនេះ។

ទន្ទឹមនេះ រដ្ឋបាលជលផលសំណូមពរដល់អាជ្ញាធរមូលដ្ឋាន ឬសមត្ថកិច្ចពាក់ព័ន្ធ មេត្តាជួយសម្រួលជូនដល់បងប្អូនប្រជាពលរដ្ឋបានធ្វើដំណើរ ស្នាក់នៅ និងដឹកជញ្ជូនផល ផលិតផលត្រីដោយរលូន តាមការគួរ។

តាមរយៈម្ចាស់ដាយត្រីមួយកន្លែងបានឱ្យដឹងថា ទិដ្ឋភាពផលនេសាទដាយត្រី និងសកម្មភាពចាប់ត្រីនៅថ្ងៃទី៨ ខែធ្នូ ដោយលើកមួយដង បានបរិមាណប្រមាណ ៣០០ ទៅ ៤០០គីឡូក្រាម ដោយក្នុងរយៈពេល២៤ម៉ោង អាចលើកបាន៣០ដង ហើយបញ្ជូនទៅចែកចាយនៅកំពង់ដ ​តាមរយៈការដាក់ក្នុងខេង ដែលក្នុងមួយខេងមានទម្ងន់៨០គីឡូក្រាម ។ ត្រីដែលទទួលបានជាប្រភេទត្រីចម្រុះ ដូចជាត្រីស្រកាល្អិត អាចម៍កុក រៀលអង្គាម រៀលតុប ត្រីលេញ​ ត្រីកាជ្រូក ច្រកែង និងស្លឹកឫស្សីជាដើម។

ម្ចាស់ដាយត្រីដដែលបានឱ្យដឹងទៀតថា ភាគច្រើនត្រីចម្រុះទាំងនេះមានច្រើនជាងឆ្នាំទៅ ដោយសារផលត្រីកើនច្រើនធ្វើឱ្យត្រីសម្រាប់ធ្វើប្រហុកមានតម្លៃថោកប្រមាណ ៨០០រៀលក្នុង១គីឡូក្រាម ដែលបើធៀបឆ្នាំមុន១គីឡូថ្លៃ១៥០០ក្នុង១គីឡូក្រាម។

សូមជម្រាបថា ទិន្នផល​នេសាទ​ដាយ​ត្រី នៅ​រាជធានី​ភ្នំពេញ ​និង​ខេត្តកណ្តាល​ឆ្នាំ​ ២០២២-២០២៣ សម្រេចបាន​បរិមាណ ១ ៤៨១ ​តោន ដែល​បរិមាណ​នេះ​កើនឡើង​ប្រមាណ៤០​ភាគរយ បើ​ប្រៀបធៀប​ទៅនឹង​ផល​នេសាទ​ដាយ​ត្រី​នា​រដូវ​នេសាទ​ឆ្នាំ​ ២០២១-២០២២ ដែល​ទទួលបាន​ចំនួន ៨៩០​ តោន​។ ការកើនឡើងនេះ ត្រូវបានក្រសួងកសិកម្មលើកឡើងថា ដោយ​សារ​តែ​លទ្ធផល​នៃ​ការទប់ស្កាត់​​បទល្មើស​ក្នុង​បឹង​ទន្លេ​សាបប្រកប​ដោយ​ប្រសិទ្ធភាព៕