បើនិយាយដល់ការដាំដុះ ជាការពិតណាស់ កសិករអាចមានជម្រើសនូវប្រភេទបន្លែ ឬដំណាំផ្សេងៗគ្នា អាស្រ័យទៅតាមជំនាញ និងទម្លាប់របស់ខ្លួន ប៉ុន្តែក្នុងនោះគេក៏តែងឃើញមានការត្អូញត្អែររបស់កសិករផងដែរពាក់ព័ន្ធទៅនឹងការជន់ជោរទិន្នផលនៅលើទីផ្សារ ដែលជំរុញឱ្យតម្លៃធ្លាក់ចុះ ឬអាចប្រឈមនឹងការខាតបង់ក៏មាន។ អាស្រ័យហេតុនេះ ដើម្បីអាចជៀសផុតពីបញ្ហា និងភាពប្រឈមនៅលើទីផ្សាររួម កសិករគួរពិចារណាទៅលើការដាំដុះដំណាំប្រភេទណាដែលមានតម្រូវការទីផ្សារល្អ ហើយអាចទទួលបានតម្លៃថ្លៃគួរសម។

ដូចទៅនឹងការលើកឡើងខាងលើនេះ អ្នកជំនាញផ្នែកកសិកម្មមួយរូប មានឈ្មោះ អ៊ុំ សុមេធា ដែលជាម្ចាស់កសិដ្ឋានបណ្តុះ និងដាំដុះបន្លែចម្រុះ ដែលមានឈ្មោះថា ខាត់ណា ស្ថិតនៅភូមិពង្រ ឃុំតាំងក្រូច ស្រុកសំរោងទង ខេត្តកំពង់ស្ពឺ បានបង្ហើបពីចំណុចពិសេសរបស់ខ្លួនក្នុងការដាំដុះនូវប្រភេទដំណាំ ឬបន្លែដែលកំពុងមានតម្រូវការទីផ្សារ ខណៈដែលការចំណាយពេលទៅលើការដាំដុះទៀតសោតក៏មានរយៈពេលខ្លី។

លោក អ៊ុំ សុមេធា បានប្រាប់ AMS ឱ្យដឹងថា សព្វថ្ងៃនេះ ការដាំដុះបន្លែនៅក្នុងកសិដ្ឋានរបស់លោកគឺមានភាពខុសប្លែកពីកសិករទូទៅ ពោលគឺលោកដាំដំណាំមិនរកចាំដល់ដំណាំធំធាតុតាមរដូវកាលនោះទេ។ លោកបានជ្រើសរើសវិធីសាស្ត្រដាំដុះក្នុងរយៈពេលខ្លី ហើយប្រមូលផលទាំងដំំណាំនៅតូចនៅឡើយ ព្រោះដំណាំដែលនៅតូចៗអាចលក់បានក្នុងតម្លៃថ្លៃ ហើយមានតម្រូវការទីផ្សារទូលាយខុសពីដំណាំដែលធំៗ។

លោកបានបន្តឱ្យដឹងថា ចំពោះដំណាំដែលលោកដាំ និងដកលក់ទាំងដែលដំណាំនៅតូចៗនៅឡើយនោះ គឺជាប្រភេទដើមខាត់ណា ដែលកំពុងមានតម្រូវការច្រើន ជាពិសេសគេយកទៅទទួលទានជាមួយស៊ុប។ ដើមខាត់ណាតូចៗត្រូវបានគេយកទៅចម្អិនជាម្ហូបអាហារទាំងដើម ទាំងស្លឹក និងមិនចាំបាច់សកសម្បកចេញដូចដើមខាត់ណាដែលមានទំហំធំៗនោះទេ។

លោកបញ្ជាក់ថា៖

«ដំបូងឡើយខ្ញុំដាំសម្រាប់ទទួលទានជាលក្ខណៈគ្រួសារតែប៉ុណ្ណោះ ប៉ុន្តែក្រោយពេលទទួលបានផលច្រើន ខ្ញុំបានសាកល្បងផ្សព្វផ្សាយតាមបណ្តាញសង្គមដើម្បីរកទីផ្សារ ហើយជាលទ្ធផលគឺមានគេកុម្ម៉ង់ទិញច្រើន ទើបពង្រីកការដាំដុះឱ្យកាន់តែធំដូចពេលបច្ចុប្បន្ន ខណៈដែលរយៈពេលនៃការដាំដុះនេះ ខ្ញុំចំណាយពេលត្រឹមតែ២៥ថ្ងៃប៉ុណ្ណោះ គឺដកលក់តែម្ដង»។

ពាក់ព័ន្ធនឹងកូនខាត់ណា ម្ចាស់កសិដ្ឋានខាងលើបន្ថែមថា៖

«កូនខាត់ណារបស់យើង គឺដាំលើទឹក ដោយមានបច្ចេកទេសក្នុងការដាំ មើលថែ និងប្រមូលផល ដែលយើងអាចលក់បានក្នុងតម្លៃ ៨០០០-១០០០០រៀល ក្នុងមួយគីឡូក្រាម ហើយអតិថិជនភាគច្រើនជាហាងនៅភ្នំពេញ ដែលកម្ម៉ង់ទិញជាប្រចាំ មានអ្នកទិញរាយខ្លះ និងលក់នៅផ្សារខ្លះដែរ តែយើងនៅមិនទាន់អាចផ្គត់ផ្គង់គ្រប់តម្រូវការនៅឡើយទេ ព្រោះមានហាងដែលចាំយករាល់ថ្ងៃប្រមាណ ៧គីឡូក្រាម ឬដល់ ១០គីឡូក្រាមនៅថ្ងៃចុងសប្ដាហ៍»។

បច្ចុប្បន្ន កសិដ្ឋាននេះមានកម្លាំងពលកម្ម ៣នាក់ ដែលនៅថែទាំ និងគ្រប់គ្រងដំណាំ ប៉ុន្តែមិនទាន់គ្រប់គ្រាន់ទេ ព្រោះក្រៅពីខាត់ណា កសិដ្ឋានមួយនេះក៏មានដាំនូវប្រភេទសាលាដបរទេសច្រើនប្រភេទ ច្រើនពណ៌ ទៅតាមតម្រូវការអ្នកទិញ និងមានប្រភេទស្ពៃខ្លះទៀតដែលដាំជាលក្ខណៈវិលជុំ។ ចំណែកចំណុចដែលគេត្រូវប្រុងប្រយ័ត្នក្នុងការដាំដំណាំលើទឹកគឺ វាអាចប្រឈមនឹងបញ្ហាធំៗដូចជា ការដាក់ជី ព្រោះវាត្រូវការជីច្រើន តែបើមានបញ្ហាគឺស្មើនឹងខាតទាំងស្រុងតែម្ដង។

សម្រាប់ថ្ងៃអនាគត អ្នកជំនាញរូបនេះមានគម្រោងក្នុងការពង្រីកការដាំដុះបន្លែបន្ថែមទៀត តែមិនមែនជាដំណាំលើទឹកនោះទេ គឺបន្ថែមលើការដាំបន្លែលើកជារានវិញម្ដង ដោយមានលាយល្បាយដីផ្សេងៗសម្រាប់ដាំ ក្នុងបំណងអាចផ្គត់ផ្គង់បន្លែទៅលើទីផ្សារទាំងប្រភេទដំណាំលើទឹក និងលើដី៕