ភ្នំពេញ ៖ ជាការពិត ការចាប់ផ្ដើមអាជីវកម្មអ្វីមួយ ក្រៅពីផែនការអាជីវកម្ម គឺត្រូវការដើមទុនច្រើន ដែលម្ចាស់អាជីវកម្មត្រៀមទុក និងអាចបានមកពីច្រើនប្រភព ហើយក្នុងនោះ ប្រាក់កម្ចីពីធនាគារ ឬគ្រឹះស្ថានមីក្រូហិរញ្ញវត្ថុ ក៏ជាប្រភពទុនដ៏ល្អមួយសម្រាប់ពួកគេផងដែរ។ ប៉ុន្តែ បញ្ហាភាគច្រើនដែលម្ចាស់អាជីវកម្មខ្នាតតូច (SMEs) តែងតែជួបនោះគឺមិនអាចមានលទ្ធភាពទទួលបានកម្ចីនោះទេ ដោយសារតែខ្វះ ឬមិនគ្រប់លក្ខខណ្ឌដែលគ្រឹះស្ថានផ្ដល់កម្ចីត្រូវការ។

លោកស្រី ចៅ លន់មូលីកា ដែលជានាយកប្រតិបត្តិ និងស្ថាបនិកនៃក្រុមហ៊ុន Cambodia Standard Development and Supply បានរៀបរាប់ពីបទពិសោធន៍របស់លោកស្រីថា៖ នៅក្នុងអាជីវកម្ម ជាទូទៅ ត្រូវប្រមូលទុនពីខ្លួនផ្ទាល់ជាមុនសិន បន្ទាប់មកពីសាច់ញាតិ និងមួយជំហានទៀត នៅពេលដែលចង់ពង្រីកអាជីវកម្ម ដៃគូដែលជិតស្និទបំផុតគឺមានតែគ្រឹះស្ថានហិញ្ញវត្ថុហ្នឹងឯង។

លោកស្រីបានបន្ថែមថា ម្ចាស់អាជីវកម្ម SMEs ទាំងអស់ត្រូវតែគិតពីរឿងច្បាប់ រឿងឯកសារជាគោល ពីព្រោះរាល់ឯកសារទាំងអស់នេះហើយ ដែលធ្វើឱ្យមានលទ្ធភាពភ្ជាប់ទំនាក់​ទំនងទៅ​ប្រភពនៃហិរញ្ញវត្ថុបាន។

សម្រាប់លោកស្រីផ្ទាល់ បើសិនមានតម្រូវការប្រភពទុនទំហំតិចតួច មានតែសាច់ញាត់ មិត្តភ័ក្កិ ដែល​អាចរកបានលឿន ហើយមិនទាមទារឯកសារស្មុគស្មាញច្រើន ប៉ុន្តែវាក៏មានផលវិបាកដែរ បើសិន​ជាមានបញ្ហាណាមួយកើតឡើងលើអាជីវកម្ម វានឹងប៉ះពាល់ដល់ទំនាក់ទំនង។​

ម្ចាស់អាជីវកម្មរូបនេះបានឱ្យដឹងថា៖

«ដូច្នេះ ប្រភពទុនដែលល្អបំផុតគឺនៅតែជាស្ថាប័ន ធនាគារ ដោយយើងមិនបាច់បារម្ភថា និងត្រូវបាន​គេនិយាយដើម ឬមិត្តភ័ក្កិរំលឹករឿងលុយកាក់ធ្វើឱ្យ​ប៉ះពាល់កិត្តិយស ផ្ទុយទៅវិញមាន​តែសប្បាយចិត្តដែលបានខ្ចីលុយធនាគារ ព្រោះនោះបានបញ្ជាក់ថា យើងមានលក្ខណៈសម្បត្តិគ្រប់គ្រាន់ទើបគេឱ្យខ្ចី»។

ជាមួយគ្នានេះដែរ លោកស្រី ចៅ លន់មូលីកា ក៏បានរំលេចនូវរឿងចាំបាច់ចំនួន ៣ចំណុច ដែលម្ចាស់​អាជីវកម្មត្រូវធ្វើ ដើម្បីទទួលបានកម្ចីពីស្ថាប័នផ្ដល់កម្ចីផ្លូវការ។

ទី១គឺ របាយការណ៍ហិរញ្ញវត្ថុ ដែលរួមមានចំណូល ចំណាយ ចំណេញ បូកជាមួយនឹងតារាងតុល្យការ ដើម្បីបញ្ជាក់ពីទ្រព្យសកម្មនៅក្នុងក្រុមហ៊ុន ថាមានត្រឹមកម្រិតណា។

ទី២ គឺទាក់ទងនឹងលំហូរសាច់ប្រាក់របស់ម្ចាស់អាជីវកម្ម ថាតើគម្រោងអាជីវកម្មដែលគ្រោង​នឹងដាក់ទៅនោះបានយកមកសិក្សាត្រឹមត្រូវ ឬនៅ?

ចំណុចទី៣ គឺខ្លួនឯងផ្ទាល់ ដែលផ្តោតទៅលើកេរ៍ិ្តឈ្មោះ។ តើយើងជាមនុស្សដែលអាចជឿជាក់បានកម្រិតណា?

បើតាមលោកស្រី នេះក៏ជាចំណុចសំខាន់ផងដែរ ដែលស្ថាប័នធនាគារ ឬមីក្រូហិរញ្ញវត្ថុ​ ត្រូវមើល​រូបភាពបុគ្គលជាគោល តើបុគ្គលនោះអាចឱ្យធនាគារជឿជាក់បានដែរ ឬអត់? មានប្រវត្តិរូបកម្ចី​យ៉ាងណា? តើមានការយឺតយ៉ាវក្នុងការទូទាត់សងកម្រិតណា? នៅពេលដែលមានអ្វីៗដូចដែលបានលើកឡើងនៅក្នុងចំណុចទាំង៣នេះ នោះស្ថាប័នធនាគារ ឬគ្រឹះស្ថានមីក្រូហិរញ្ញវត្ថុ នឹងពិចារណា ហើយលទ្ធភាពដែលអាចទទួលបានកម្ចីក៏មានអត្រាខ្ពស់ផងដែរ៕