ភ្នំពេញ ៖ ក្រោយទទួលបានជោគជ័យដំណាក់កាលទី១ និងទី២ គួរឱ្យកត់សម្គាល់កាលពីពេលកន្លងទៅ «កម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa) ដំណាក់កាលទី៣ ឆ្នាំ២០២៤-២០២៨» ត្រូវបានដាក់ឱ្យដំណើរការជាផ្លូវការ នាថ្ងៃទី៩ ខែធ្នូ ឆ្នាំ២០២៤។

តាមរយៈ «កម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa) ដំណាក់កាលទី៣ នេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានដាក់ផែនការបណ្តុះបណ្តាលយុវជនឱ្យបាន ៣ ៥២០នាក់ ចាប់ពីឆ្នាំ២០២៤ ដល់ឆ្នាំ២០២៨ ។

ថ្លែងក្នុងពិធីដាក់ដំណើរការគម្រោងកម្មវិធីបណ្តុះបណ្តាលបដិសណ្ឋារកិច្ចកម្ពុជា ឯកឧត្តមរដ្ឋមន្ត្រី ហួត ហាក់ បានមានប្រសាសន៍ថា៖ គម្រោង ហូកា សហការយ៉ាងជិតស្និទ្ធជាមួយអង្គការស្វីសខន់ថាក់ និងភាគីពាក់ព័ន្ធ បណ្តុះបណ្តាលយុវជនក្រីក្រងាយរងគ្រោះ ម្ចាស់អាជីវកម្ម អ្នកគ្រប់គ្រង និងអ្នកជំនាញទេសចរណ៍សរុបចំនួន ៦៣៩៧នាក់ តាំងពីការអនុវត្តកម្មវិធីបណ្តុះបណ្តាលបដិ​សណ្ឋារកិច្ចកម្ពុជា ដំណាក់កាលទី១ ឆ្នាំ២០១៧ រហូតមកដល់បច្ចុប្បន្ន ហើយកម្មវិធីនេះត្រូវបានទទួលស្គាល់ទូទាំងប្រទេសជាកម្មវិធីបណ្តុះបណ្តាលមានគុណភាព ស្របតាមតម្រូវការជំនាញរបស់មូលដ្ឋានអាជីវកម្ម មានឯកសារបណ្តុះបណ្តាលស្តង់ដាច្បាស់លាស់ ព្រមទាំងមានធនធានគ្រូបង្គោលល្អៗប្រកបដោយសមត្ថភាពខ្ពស់។

លោក Reto Grueninger  នាយកទីភ្នាក់ងារស្វីសម្រាប់ការអភិវឌ្ឍន៍ និងសហប្រតិបត្តិការ (SDC) លោក Pius Frick  តំណាងភ្នាក់ងារលីចតេស្ទីន និងលោក Daniel Nugraha នាយកប្រចាំប្រទេសរបស់អង្គការ ស្វីសខន់ថាក់ប្រចាំកម្ពុជា បានបង្ហាញជំហ៊រគាំទ្រយុទ្ធសាស្ត្របណ្តុះបណ្តាលអ្នកជំនាញទេសចរណ៍របស់ក្រសួងទេសចរណ៍ និងបានបន្តគាំទ្រផ្នែកហិរញ្ញវត្ថុ ក៏ដូចជាកិច្ចសហការយ៉ាងជិតស្និទ្ធជាមួយក្រសួងទេសចរណ៍ដើម្បីអនុវត្តកម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa) ក្នុងដំណាក់កាលទី៣ ឆ្នាំ២០២៤-២០២៨ ដោយនឹងធ្វើការបណ្តុះបណ្តាលអ្នកជំនាញសរុបចំនួនប្រមាណ ៣៥២០រូបសម្រាប់ខេត្តគោលដៅចំនួន១២ទូទាំងប្រទេសរួមមាន៖ ខេត្តក្រចេះ ស្ទឹងត្រែង ព្រះវិហារ រតនគិរី មណ្ឌលគិរី កំពង់ឆ្នាំង កោះកុង ពោធិ៍សាត់ បាត់ដំបង ប៉ៃលិន បន្ទាយមានជ័យ និងឧត្តរមានជ័យ។

សូមជម្រាបផងដែរថា ក្រសួងទេសចរណ៍បានដាក់ចុះនូវយុទ្ធនាការ៖ “បុគ្គលិកម្នាក់ ជំនាញមួយ (OneEmployee, One Skill)” ដែលមានចក្ខុវិស័យ ធ្វើយ៉ាងណាឲ្យអ្នកជំនាញទាំងអស់មានជំនាញ និងសមត្ថភាពទទួលស្គាល់ស្របតាមស្តង់ដាជាតិ និងអាស៊ាន បង្កើតឱកាសការងារដល់យុវជនដើម្បីទទួលបានការងារ និងប្រាក់ចំណូលសមរម្យ មានវិថីអភិវឌ្ឍន៍ជំនាញច្បាស់លាស់។ ការអភិវឌ្ឍធនធានមនុស្សក្នុងវិស័យទេសចរណ៍ នឹងចូលរួមដោយផ្ទាល់ក្នុងការសម្រេចគោលដៅអភិវឌ្ឍន៍ប្រកបដោយចីរភាព SDG 4 ដែលចែងថា “ធានាឲ្យបាននូវការអប់រំបណ្តុះបណ្តាលប្រកបដោយគុណភាព សមធម៌ និងបរិយាប័ន្ន ព្រមទាំងលើកកម្ពស់ការសិក្សាពេញមួយជីវិត(LifeLong Learning)ដល់ជនគ្រប់រូប” និង SDG 8 ចែងថា «ជំរុញកំណើនសេដ្ឋកិច្ច និងការងារសមរម្យដល់ជនគ្រប់រូប»។

ក្នុងឱកាសនោះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានផ្តល់ជាអនុសាសន៍គន្លឹះៗដើម្បីបន្តអនុវត្តកម្មវិធីបណ្តុះបណ្តាលបដិសណ្ឋារកិច្ច ហូកា រួមមាន៖ ទី១. បន្តកិច្ចសហការឲ្យបានជិតស្និទ្ធជាមួយអង្គការ ស្វីសខាន់ថាក់ ដៃគូអភិវឌ្ឍន៍ សមាគមឧស្សាហកម្មទេសចរណ៍ វិស័យឯកជន និងភាគីពាក់ព័ន្ធ ដើម្បីពិនិត្យលទ្ធភាពពង្រីកការបណ្តុះបណ្តាល បដិសណ្ឋារកិច្ច ហូកា ឲ្យបាន ២៥រា ជធានី/ខេត្តទូទាំងប្រទេស។ ទី២. មន្ទីរទេសចរណ៍រាជធានី-ខេត្ត ត្រូវជំរុញការបណ្តុះបណ្តាលបដិសណ្ឋារកិច្ច ហូកា ទាំងវគ្គខ្លីៗ និងកម្មវិធីបណ្តុះបណ្តាលពេញម៉ោង ឲ្យបានកាន់តែផុលផុស នៅកម្រិតថ្នាក់ក្រោមជាតិ។ ទី៣. ជំរុញការបណ្តុះបណ្តាលបដិសណ្ឋារកិច្ច ហូកា នៅក្នុងមូលដ្ឋានអាជីវកម្មទេសចរណ៍តាមខេត្តគោលដៅក្នុងទម្រង់ In-House Training តាមរយៈ គ្រូបង្គោល ហូកា ដែលឆ្លងកាត់ការបណ្តុះបណ្តាល និងវាយតម្លៃសមត្ថភាពច្បាស់លាស់។ ទី៤. អភិវឌ្ឍកម្មវិធីបណ្តុះបណ្តាល និងឯកសារបណ្តុះបណ្តាលបដិសណ្ឋារកិច្ច ហូកា ឲ្យបានកាន់តែល្អប្រសើរ ជាពិសេសជំរុញលើកទឹកចិត្តការចូលរួមរបស់ស្ត្រី និងលើកកម្ពស់សហគ្រិនភាពក្នុងវិស័យទេសចរណ៍។ ទី៥. បន្តអនុវត្តឲ្យមានប្រសិទ្ធភាពនូវ “ផែនទីបង្ហាញផ្លូវ ស្តីពីកម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa)” ដែលជាឯកសារគោលសម្រាប់គម្រោង អភិវឌ្ឍជំនាញ និងការបណ្តុះបណ្តាល ហូកា ដំណាក់កាលទី៣ ២០២៤-២០២៨។ ទី៦. ស្នើឲ្យសាលាបណ្តុះបណ្តាលវិជ្ជាជីវៈ ឬកម្មវិធីបណ្តុះបណ្តាលរបស់អង្គការដៃគូនានា ប្រើប្រាស់កម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa) ដើម្បីជំរុញការបណ្តុះបណ្តាលដល់យុវជនក្រីក្រងាយរងគ្រោះ និងយុវជនក្នុងក្រុមគ្រួសារចំណាកស្រុក ឲ្យទទួលបានការងារក្នុងវិស័យទេសចរណ៍ ដើម្បីកំណើនប្រាក់ចំណូល និងមានវិថីអភិវឌ្ឍជំនាញច្បាស់លាស់ទៅថ្ងៃអនាគត និង ទី៧. បន្តកិច្ចសហការជាមួយមូលនិធិអភិវឌ្ឍជំនាញ (Skills Development Funds) ដើម្បីគាំទ្រសំណើគម្រោងបណ្តុះបណ្តាលវិជ្ជាជីវៈទេសចរណ៍ដល់វិស័យឯកជន និងស្ថាប័នបណ្តុះបណ្តាលវិជ្ជាជីវៈទេសចរណ៍ ទាំងក្នុងទម្រង់បណ្តុះបណ្តាលសិស្សថ្មី (Pre-Employment) ការបណ្តុះបណ្តាលអ្នកជំនាញកំពុងបម្រើការងារបច្ចុប្បន្ន (Up-Skilling) និងការបណ្តុះបណ្តាលពង្រឹងសមត្ថភាពគ្រូបង្គោល (Training of Trainers) ជាដើម៕