សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុន វិរៈ ប៊ុនថាំ គ្រុប (Vireak Buntham Group) និងក្រុមហ៊ុន ស៊ីអេជី ហូលសេលឡឺ ភីធីវ៉ាយ អិលធីឌី (CAG WHOLSALER Pty Ltd) បានចុះហត្ថលេខាលើកិច្ចព្រមព្រៀងសហការផ្គត់ផ្គង់ និងនាំចេញអង្ករផ្ការំដួល និងផ្ការំដួលសរីរាង្គទៅលក់នៅទីផ្សារប្រទេសអូស្ត្រាលី និងពង្រីកទៅទីផ្សារប្រទេសផ្សេងៗទៀតនាពេលអនាគត។
អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈ ប៊ុនថាំ អេចប្រេស និងលោក HOY CHIU BE នាយកគ្រប់គ្រងក្រុមហ៊ុន ស៊ីអេជី ហូលសេលឡឺ ភីធីវ៉ាយ អិលធីឌី បានចុះហត្ថលេខាលើកិច្ចព្រមព្រៀងដែលធ្វើឡើងនាព្រឹកថ្ងៃទី២៥ ខែតុលា ឆ្នាំ២០២៥ នៅទីស្នាក់ការកណ្តាលក្រុមហ៊ុន វិរៈ ប៊ុនថាំ គ្រុប រាជធានីភ្នំពេញ។
លោក HOY CHIU BE នាយកគ្រប់គ្រងក្រុមហ៊ុន ស៊ីអេជី ហូលសេលឡឺ ភីធីវ៉ាយ អិលធីឌី បានថ្លែងថា៖ ក្នុងរយៈពេលប្រមាណ ២ ឬ ៣ ឆ្នាំចុងក្រោយនេះ ការនាំចេញអង្ករកម្ពុជាទៅកាន់ទីផ្សារអន្តរជាតិ មានគុណភាពពុំសូវល្អ ហើយលក់ចេញមិនសូវបានច្រើននោះទេ ប៉ុន្តែពេលនេះលោកជឿជាក់លើក្រុមហ៊ុន វីរៈ ប៊ុន ថាំ ថា នឹងអាចផ្គត់ផ្គង់នូវអង្ករដែលមានគុណភាពខ្ពស់នាំចេញទៅក្រៅប្រទេស។
លោក HOY CHIU BE ដែលអ្នកនាំចេញអង្ករទៅលក់នៅប្រទេសអូស្ត្រាលី ជាមួយបទពិសោធធ្វើអាជីវកម្មជាង ២០ឆ្នាំមកហើយនោះបានបញ្ជាក់ថា ៖
«ខ្ញុំមានបំណងចង់ពង្រីកទីផ្សារអង្ករខ្មែរជំនួសការនាំអង្ករចេញពីថៃ។ កន្លងមក ក្រុមហ៊ុនខ្ញុំបាននាំអង្ករពីថៃទៅលក់នៅអូស្ត្រាលី ក្នុង១ឆ្នាំៗ ប្រមាណ ៥០ ទៅ ៦០កុងតឺន័រ។ លើកនេះ ខ្ញុំជឿជាក់ក្រុមហ៊ុន វិរៈ ប៊ុនថាំ បានផ្គត់ផ្គង់អង្ករមានគុណភាពល្អ។ អ៊ីចឹងការចាប់ផ្តើមដំបូង ខ្ញុំគិតថា នាំចេញប្រមាណ ៦ ឬ ៧កុងតឺន័រសិន។ បើសិនជាល្អទៅៗ ខ្ញុំនឹងផ្តាច់ការនាំយកអង្ករពីថៃទៅលក់នៅអូស្ត្រាលី»។
អ្នកឧកញ៉ា សួរ វីរៈ បានលើកឡើងថា ថ្មីៗនេះ ក្រុមហ៊ុន វិរៈ ប៊ុនថាំ បានផ្តោតលើវិស័យកសិកម្ម។ គោលបំណងធំវិនិយោគលើវិស័យកសិកម្មនេះ គឺដើម្បីជួយដល់កសិករ និងជំរុញផលិតផលខ្មែរយើងទៅកាន់ប្រទេសក្រៅ។
អ្នកឧកញ៉ា បន្តថា៖
«យើងឃើញថា វិស័យកសិកម្មរបស់កម្ពុជាកន្លងមកនេះ បានពឹងលើដង្ហើមប្រទេសជិតខាង ហើយការនាំកសិផលក៏ដូចជាការនាំអង្ករទៅកាន់ប្រទេសក្រៅ កន្លងមកមិនមានយីហោរបស់ខ្មែរទេ និងមិនមានឈ្មោះអង្ករខ្មែរ។ ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បាន និងកំពុងជំរុញឱ្យមានយីហោអង្ករខ្មែរនៅលើទីផ្សារអន្តរជាតិ»។
អ្នកឧកញ៉ាបានឱ្យដឹងផងដែរថា បច្ចុប្បន្នការនាំចេញអង្ករខ្មែរ ទៅប្រទេសចិន ដោយឆ្លងកាត់ប្រទេសឡាវ ខាងប្រទេសឡាវបានឯកភាពអនុញ្ញាត និងកំពុងរង់ចាំនីតិវិធីផ្សេងៗទៀត។ តាមរយៈកិច្ចសហប្រតិបត្តិការនេះ បានបង្ហាញពីការស្វែងរកទីផ្សារសម្រាប់អង្ករផ្ការំដួល និងផ្ការំដួលសរីរាង្គរបស់ខ្មែរ។ ក្រុមហ៊ុនទាំងពីរ នឹងខិតខំជួយទិញនៅក្នុងប្រទេស ក្នុងតម្លៃសមរម្យ និងនាំយកទៅលក់នៅប្រទេសអូស្ត្រាលី ដោយមានស្តង់ដារ និងគុណភាពខ្ពស់ និងដោយមិនជ្រកក្រោមម៉ាកសញ្ញាប្រទេសជិតខាងឡើយ។
អ្នកឧកញ៉ា សួរ វីរៈ បានគូសបញ្ជាក់ថា ក្រុមហ៊ុន វិរៈ ប៊ុនថាំ គ្រុប បានចាប់ផ្តើមអាជីវកម្មតាំងពីឆ្នាំ២០០៤ ផ្តើមពីក្រុមហ៊ុនដឹកជញ្ជូនភ្ញៀវមានរថយន្តតែមួយគ្រឿងប៉ុណ្ណោះ និងបានបន្តអាជីវកម្មការដឹកជញ្ជូន និងបញ្ញើ ហើយរហូតមកដល់បច្ចុប្បន្ននេះ ក្រុមហ៊ុនមានសាខាប្រមាណជាង ១៣០០សាខាទូទាំងប្រទេសកម្ពុជា និងមានបុគ្គលិកប្រមាណ ៨០០០ នាក់។ បច្ចុប្បន្ន ក្រុមហ៊ុនបានពង្រីកវិសាលភាពលើអាជីវកម្មច្រើនប្រភេទរួមមាន៖ ការដឹកជញ្ជូនភ្ញៀវ បញ្ញើរទំនិញ សណ្ឋាគារ រីស៊ត ការអភិវឌ្ឍដីធ្លី ក្រុមហ៊ុន VET Airways រួមទាំងវិស័យកសិកម្មផងដែរ។
យោងតាមសេចក្ដីប្រកាសព័ត៌មានសហព័ន្ធស្រូវអង្ករកម្ពុជា ក្នុងរយៈពេល ១២ខែ ឆ្នាំ២០២៤ កម្ពុជាបាននាំចេញអង្ករចំនួន៦៥១ ៥២២ តោនគិតជាទឹកប្រាក់ បានចំនួន ៤៩១.១៩លានដុល្លារសហរដ្ឋអា មេរិក។ ចំណែកក្នុងរយៈពេល៩ខែ នៃឆ្នាំ២០២៥នេះ កម្ពុជាបាននាំចេញអង្ករចំនួន ៥៩៦ ៣៤១ តោន គិតជាទឹកប្រាក់បានចំនួន ៤០៨.៩៣ លានដុល្លារសហរដ្ឋអាមេរិក៕ដោយៈ ញ៉ែម សុផល
Account
Security
Favourite Content