ភ្នំពេញ៖ ធុរកិច្ចថ្មី (Start Up) ចំនួន៤ ដែលជាធុរកិច្ចក្នុងថ្នាលបណ្តុះបណ្តាលនៃមជ្ឈមណ្ឌលបណ្តុះធុរកិច្ចថ្មី “តេជោ” កាលពីរសៀលថ្ងៃទី១៧ ខែតុលា ឆ្នាំ២០២៥ បានចុះហត្ថលេខាលើកិច្ចព្រមព្រៀងរួមគ្នាបង្កើត​សហ​គមន៍ឌីជីថលមួយហៅថា«សហគមន៍ឌីជីថលចតុមុខ (Chaktomuk Digital Hub)» ដើម្បីជំរុញការចាប់យកឌីជីថលនៃសហគ្រាសធនតូច និងមធ្យម កាន់តែងាយស្រួល និងចំណាយតិចបំផុត។

ធុរកិច្ចថ្មីទាំង៤ដែលគាំទ្រដោយមជ្ឈ​មណ្ឌលបណ្តុះធុរកិច្ចថ្មី “តេជោ” រួមមាន ៖ក្រុមហ៊ុន Localize Tech Solution, ក្រុមហ៊ុន Krubkrong , ក្រុមហ៊ុន Point hub POS និង ក្រុមហ៊ុន BeOne Platform។

លោក ទុយ ហុង នាយកគ្រប់គ្រងក្រុមហ៊ុន Localize ដែលតំណាងឱ្យធុរកិច្ចថ្មីទាំងបួន បានមានប្រសា​ស​ន៍លើកឡើងអំពីសាវតា និងចក្ខុវិស័យរបស់ Chaktomuk Hub ។ គោលបំណងនៃកិច្ច​សហ​ប្រតិបត្តិការនេះ គឺរួបរួមធុរកិច្ចថ្មីក្នុងស្រុកជាធ្លុងមួយ ដើម្បីបំពេញបន្ថែមនូវសេវាកម្ម និងផលិតផលគ្នាទៅវិញទៅមក ដើម្បីធ្វើយ៉ាងណាឲ្យជំរុញការចាប់យកឌីជីថលនៃសហគ្រាសធនតូច និងមធ្យម កាន់តែងាយស្រួល និងចំណាយតិចបំផុត។

លោកបានលើកឡើងទៀតថា៖ «សហគមន៍ឌីជីថល ចតុមុខ»នឹងផ្តល់ផលប្រយោជន៍ជាច្រើនរួមមាន៖ទី១ – បង្កើតសហគមន៍ឌីជីថលមួយដែលអាចចែករំលែកចំណេះដឹងបច្ចេកទេស និងបទពិសោធន៍គ្នាទៅវិញទៅមក ,ទី២ – អាចផ្តល់តម្លៃបន្ថែមជាអតិបរមាដល់អតិថិជនរបស់គ្នាទៅវិញទៅមកតាមរយៈការតភ្ជាប់ប្រព័ន្ធបញ្ចូលគ្នា,ទី៣- បង្កើនសមត្ថភាពនៃការធ្វើទីផ្សាររួមគ្នា ដើម្បីធ្វើយ៉ាងអាចកាត់បន្ថយចំណា​យពីការធ្វើទីផ្សារក្នុងសហគមន៍ និងទី៤- រួមបង្កើនគុណតម្លៃនៃសេវាកម្មឌីជីថលនៃកម្ពុជាធ្វើយ៉ាងណាអាចឲ្យវិស័យឌីជីថលក្នុងស្រុកមានលទ្ធភាពប្រកួតប្រជែងក្នុងទីផ្សារតំបន់បាន ។

ឯកឧត្តមបណ្ឌិត តាំង ងួនលី នាយកប្រតិបត្តិនៃមជ្ឈមណ្ឌលបណ្តុះធុរកិច្ចថ្មី”តេជោ”ដែលអញ្ជើញធ្វើជាសាក្សីនៃការចុះហត្ថលេខាលើកិច្ចព្រមព្រៀងនេះបានថ្លែងថា៖

«កិច្ចសហការនេះនឹងក្លាយជាមជ្ឈ​មណ្ឌ​ល​ឌីជីថល (Digital Hub)មួយសម្រាប់ដោះស្រាយ និងជំរុញបរិវត្តកម្មឌីជីថល​សហគ្រាស ការបង្កើតប្រព័ន្ធអេកូឡូស៊ីសហគ្រិនភាព និងធុរកិច្ចថ្មីឱ្យកាន់តែរីកចម្រើន និងលូតលាស់ឆាប់រហ័ស។ ជាងនេះ​ទៅទៀត នឹងជួយទៅដល់សេដ្ឋកិច្ចក្រៅប្រព័ន្ធ និងសហគ្រាសធនតូច និងមធ្យម»។

ឯកឧត្តមបានមានប្រសាសន៍បន្តថា៖ កិច្ចសហការនេះផ្តល់ផលប្រយោជន៍ដល់ប្រទេសជាតិ និងបង្កើតឡើងដោយកូនខ្មែរ និងកើតឡើងស្របពេលនឹងបរិបទតម្រូវការប្រើប្រាស់នៅកម្ពុជា និងស្របតាមច្បាប់ រួមទាំងបទបញ្ញតិ្តជាធរមាននៅកម្ពុជា។

គួរឱ្យដឹងថា៖ Localize គឺជាធុរកិច្ចថ្មីឌីជីថលក្នុងស្រុកដែលផ្គត់ផ្គង់ប្រព័ន្ធគ្រប់គ្រងគណនេយ្យអនឡាញ សម្រាប់សហគ្រាសធនតូច និងមធ្យម។ បេសកកម្មរបស់ Localize គឺប្រើប្រាស់បច្ចេកវិទ្យាឌីជីថល ជួយដល់សហគ្រាសឲ្យមានការគ្រប់គ្រងគណនេយ្យត្រឹមត្រូវតាមស្តង់ដារ និងមានរបាយការណ៍ហិរញ្ញវត្ថុច្បាស់លាស់ តាមរយៈការប្រើប្រាស់បច្ចេកវិទ្យាឌីជីថល ដើម្បីភាពរីកចំរើនប្រកបដោយនិរន្តភាព។

ធុរកិច្ចថ្មី ”KrubKrong “KrubKrong” គឺជាវេទិកា Digital ដែលផ្តល់ដំណោះស្រាយសម្រាប់អាជីវកម្មក្នុងប្រព័ន្ធតែមួយដូចជាការលក់សារពើភ័ណ្ឌ និងe-commerce ដែលធ្វើឱ្យអ្នកមានការគ្រប់គ្រងពេញលេញនិងពង្រីកអាជីវកម្មទាំងមូលពីកន្លែងតែមួយ។

ធុរកិច្ចថ្មី Point hub គឺជាប្រព័ន្ធគ្រប់គ្រងការលក់ និងគ្រប់គ្រងស្តុកទំនិញសំរាប់ហាងអាហារ កាហ្វេ លក់ទំនិញ ដែលអាចប្រើប្រាស់បានទាំងទូរស័ព្ទដៃ និងកុំព្យូទ័រ។

BeOne Platform គឺជាធុរកិច្ចឌីជីថល ដែលផ្តល់ជូននូវដំណោះស្រាយគ្រប់គ្រងធនធានមនុស្សសម្រាប់អាជីវកម្ម អាចជួយឱ្យការតាមដានវត្តមាន ការគ្រប់គ្រងលើការឈប់សម្រាក និងការរៀបចំប្រាក់ខែ ឱ្យកាន់តែងាយស្រួល៕