ពាក្យចាស់ពោលថា ចេះស្ទាក់ស្ទើរល្ងើឥតបទ ចេះពិតប្រាកដ ប្រាក់រត់តាមហៅ តួយ៉ាងកូនខ្មែរម្នាក់ ដែលកាលពីដើមឡើយ កែច្នៃធ្វើត្រីងៀតលក់ត្រឹមតែជាលក្ខណៈគ្រួសារប៉ុណ្ណោះ ប៉ុន្តែដោយសារតែមានមនសិការឈរលើគុណភាព និងរសជាតិឆ្ងាញ់ផងនោះ បានធ្វើឱ្យអាជីវកម្មលក្ខណៈគ្រួសារមួយនេះចេះតែមានការគាំទ្រកើនឡើងខ្លាំង រហូតបង្កើតជាសិប្បកម្មកែច្នៃត្រីដែលមានគុណភាពកម្រិតស្ដង់ដារ និងបាននាំចេញទៅលក់នៅលើទីផ្សារអូស្ត្រាលីថែមទៀតផង។

អ្នកស្រី ស៊ឹម សេរីរ័ត្ន ម្ចាស់សិប្បកម្មកែច្នៃត្រីងៀត HOME TASTE FOOD មានទីតាំងនៅក្នុងភូមិសាលាកន្សែង សង្កាត់ស្វាយដង្គុំ ក្រុងសៀមរាប ខេត្តសៀមរាប បានឱ្យដឹងថា ដើមឡើយ អ្នកស្រី និងស្វាមី បានចាប់ផ្តើមធ្វើត្រីងៀតលក់ជាលក្ខណៈគ្រួសារចាប់តាំងពីឆ្នាំ២០១៨មកម៉្លេះ ដោយគ្រាណោះ លក់ដាច់ក្នុងតំបន់តិចតួចប៉ុណ្ណោះ។

អ្នកស្រីបញ្ជាក់ថា ៖

«នៅពេលនោះខ្ញុំនឹងគ្រួសារ បានធ្វើត្រីងៀតលក់សាកល្បង ថ្ងៃខ្លះលក់បានត្រឹម៥គីឡូក្រាម ហើយថ្ងៃខ្លះលក់មិនដាច់សោះក៏មាន ហើយដោយសារលក់នៅទីតាំងខ្លួនឯង ក៏ចេះតែលក់បន្តទៅ រហូតដល់មានការកម្ម៉ង់ទិញច្រើនឡើងៗជាហូរហែ ហើយរហូតបើកម៉ាតលក់តែម្តង»។

អ្នកស្រីបញ្ជាក់ថា រហូតដល់សម័យកូវីដ ឆ្នាំ២០២០ មានផ្សារមួយចំនួនត្រូវបានបិទទ្វារ ក៏ស្រាប់តែមានអតិថិជនងាកមកគាំទ្រត្រីងៀតពីហាង HOME TASTE FOOD នេះ ដែលជាកត្តាជំរុញឱ្យម្ចាស់ម៉ាតមួយនេះពង្រីកកាផលិតលក់កាន់តែច្រើនឡើងៗ ដែលអាចលក់ចេញបានចន្លោះពីជាង ១០០គីឡូក្រាម ទៅដល់ ១៥០គីឡូក្រាម ក្នុងមួយខែ ដោយអ្នកខ្លះមកទិញដល់ហាងផ្ទាល់ ហើយអតិថិជនខ្លះកម្ម៉ង់ទិញតាមអនឡាញ និងមានសេវាដឹកជូនអតិថិជនទៀតផង។

ម្ចាស់សិប្បកម្មរូបនេះបន្តថា ដោយមានជំនឿចិត្ត និងទុកចិត្តទៅលើគុណភាព រសជាតិនៃផលិតផលរបស់ខ្លួន លុះរហូតដល់ឆ្នាំ២០២១ អ្នកស្រីបានសម្រេចចូលរួមប្រកួតប្រជែង ជាមួយក្រុមអ្នកផលិត និងកែច្នៃក្នុងស្រុកចំនួន២៨ ផ្សេងទៀត ប៉ុន្តែមានសហគ្រាសចំនួនត្រឹមតែ ៣ប៉ុណ្ណោះ ដែលបានជាប់ជ័យលាភីក្នុងគម្រោងប្រកួតប្រជែង (CQS) ដែលគាំទ្រដោយក្រសួងកសិកម្ម រុក្ខាប្រមាញ់ និងនេសាទ សហការជាមួយសភាពអ៊ឺរ៉ុបប្រចាំនៅកម្ពុជា European Union និងអង្គការ UNIDOថែមទៀត។

ក្រោយបានជាប់ជ័យលាភីរួចមក HOME TASET FOOD  ក៏ទទួលបានការជួយជ្រោមជ្រែងផ្នែកបច្ចេកទេសកាន់តែល្អប្រសើរ ការផ្តល់សំបកវេចខ្ចប់ប្រកបដោយសោភ័ណ្ឌភាព និងគុណភាព រួមទាំងការជួយជ្រោមជ្រែងផ្នែកទីផ្សារផងដែរ។ កត្តាទាំងនេះ បានជំរុញឱ្យសហគ្រាសផលិតត្រីងៀតខាងលើ មានការកម្ម៉ង់ទិញលក់បានកាន់តែច្រើនឡើងៗ រហូតមកដល់ឆ្នាំ២០២៤ ក៏មានឈ្មួញនៅក្រៅប្រទេសចូលមកសហការនាំយកទៅដល់ទីផ្សារប្រទេសអូស្ត្រាលី ដោយការនាំចេញទៅម្តងៗប្រមាណ ៥តោន ដែលជាចំនួនមួយដ៏ច្រើន។ ជាមួយការទទួលបានលទ្ធផល និងផែ្លផ្កាវិជ្ជមានទាំងនេះ សិប្បកម្មបានពង្រីកចង្វាក់ផលិតកម្មកាន់តែច្រើនជាងមុន ហើយក៏ជាការរួមចំណែកផ្តល់ការងារជូនប្រជាជនក្នុងតំបន់ដែលអាចទទួលបានចំណូលផ្គត់ផ្គង់ជីវភាពគ្រួសារផងដែរ។

និយាយជារួម សហគ្រាសខាងលើនេះមិនមែនផលិតតែត្រីងៀត(ត្រីឌៀប)មួយមុខនោះទេ ពោលគឺមានលក់ត្រីប្រាហើម ងៀតត្រីរ៉ស់ ត្រីអណ្តែង និងមានផលិតសាច់ក្រកផ្សេងទៀត ដោយវត្ថុធាតុដើមទាំងនោះ ត្រូវបានបញ្ជាទិញពីកសិករនៅក្នុងខេត្តសៀមរាប រួមមានទាំងប្រភេទត្រីធម្មជាតិ និងត្រីចិញ្ចឹម ប៉ុន្តែត្រីចិញ្ចឹមលុះត្រាតែមានគុណភាពល្អ ទើបទិញមកច្នៃធ្វើត្រីងៀតលក់បាន។

សម្រាប់ទស្សនវិស័យទៅថ្ងៃអនាគត អ្នកស្រី ស៊ឹម សេរីរ័ត្ន និងស្វាមី បានតាំងចិត្តខិតខំ ពង្រឹងគុណភាព ពង្រីកចង្វាក់ផលិតកម្មឱ្យកាន់តែច្រើន ដើម្បីផ្គត់ផ្គត់លើទីផ្សារក្នុងស្រុក ក៏ដូចជានៅក្រៅប្រទេសឱ្យកាន់តែទូលំទូលាយជាងនេះទៀត ជាពិសេស បង្ហាញដល់អន្តរជាតិថា ផលិតផលខ្មែរក៏មានគុណភាពល្អមិនចាញ់ទំនិញលក់នៅលើទីផ្សារក្រៅប្រទេសនោះទេ៕

វិន ឈុនហ៊ាត