ភ្នំពេញ ៖ ទិវារត់ប្រណាំងអន្តរជាតិពាក់កណ្តាលម៉ារ៉ាតុងនៅអង្គរវត្ត គឺជាព្រឹត្តិការណ៍កីឡាដ៏ធំជាងគេប្រចាំឆ្នាំនៅកម្ពុជាដែលប្រារព្ធឡើងនៅខេត្តសៀមរាបជារៀងរាល់ឆ្នាំ ហើយបានលើកកម្ពស់សុខុមាលភាព ជំរុញកំណើនសេដ្ឋកិច្ចសហគមន៍មូលដ្ឋាន និងវិស័យទេសចរណ៍ក្នុងស្រុក ជាពិសេសគាំទ្រដល់អង្គការសប្បុរសធម៌ និងមន្ទីរពេទ្យកុមារនានាតាមរយៈការដឹកនាំរៀបចំរបស់គណៈកម្មាធិការជាតិអូឡាំពិកកម្ពុជា និងការឧបត្ថម្ភគាំទ្រផ្ដាច់មុខដោយក្រុមហ៊ុន មេនូឡាយហ្វ៍ (Manulife) ព្រមទាំងក្រសួងពាក់ព័ន្ធជាច្រើនទៀត។

លោក សែម ផល្លា នាយកប្រតិបត្តិអ្នករៀបចំព្រឹត្តិការណ៍រត់ម៉ារ៉ាតុងនៅកម្ពុជា នៅក្នុងសន្និសីទសារព័ត៌មាន​នាពេលថ្មីៗនេះនៅទីស្នាក់ការគណៈកម្មាធិការជាតិអូឡាំពិកកម្ពុជា បានអះអាងថា៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នឹងអញ្ជើញចូលរួមនៅក្នុងព្រឹត្តិការណ៍រត់ប្រណាំងពាក់កណ្តាលម៉ារ៉ាតុង លើកទី២៩ នៅអង្គរវត្ត ខេត្តសៀមរាប ដែលនឹងប្រព្រឹត្តទៅនាថ្ងៃទី១ ខែធ្នូ ឆ្នាំ២០២៤ ខាងមុខនេះក្រោមការឧបត្ថម្ភគាំទ្រផ្ដាច់មុខដោយក្រុមហ៊ុន មេនូឡាយហ្វ៍ (Manulife)។

លោកបានបញ្ជាក់ថា ៖ «វត្តមានរបស់សម្តេចធិបតី ហ៊ុន ម៉ាណែត គឺជាចលករមួយយ៉ាងសំខាន់ក្នុងការជួយជំរុញកំណើនអ្នកចូលរួមកាន់តែកើនឡើង ហើយកាន់តែផ្តល់ភាពកក់ក្តៅចំពោះអ្នកចូលរួមទាំងអស់គ្នាថែមទៀតផង»។

លោកបានឱ្យដឹងទៀតថា៖ ការចូលរួមគាំទ្រពីសំណាក់ប្រមុខរាជរដ្ឋាភិបាលកម្ពុជា ក្នុងព្រឹត្តិការណ៍រត់ប្រចាំឆ្នាំ និងអន្តរជាតិមួយនេះ នឹងជួយជំរុញឱ្យការរៀបចំកាន់តែមានលក្ខណៈស្តង់ដារ ត្រូវតាមបទដ្ឋានរបស់អន្តរជាតិ។ មានន័យថា ការរត់របស់ភ្ញៀវ គឺសុវត្ថិភាព មានការបិទផ្លូវជិតបានល្អ មិនធ្វើឱ្យអ្នករត់មានក្តីបារម្ភ រត់ដោយមានទំនុកចិត្ត និងសប្បាយរីករាយ ជាពិសេសបានរួមចំណែកជួយឱ្យកម្ពុជាក្លាយជាប្រទេសមានអ្នកចូលរួមរត់ច្រើន និងជាប់ចំណាត់ថ្នាក់ល្អជាលំដាប់ផ្កាយ៥ ដែលជាគោលដៅរបស់កម្ពុជាត្រៀមចូលរួមប្រកួតប្រជែងជាមួយបណ្តាប្រទេសនៅលើពិភពលោក។

ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានថ្លែងថា ៖ ក្នុងរយៈពេល២៩ឆ្នាំកន្លងមកនេះ ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងនៅអង្គរវត្ត មានការវិវឌ្ឍ និងជោគជ័យយ៉ាងខ្លាំង។ ជាក់ស្ដែង ក្នុងឆ្នាំដំបូងនៃការរៀបចំ មានអ្នកចូលរួមត្រឹមតែប្រមាណ ៣០០ ទៅ ៤០០នាក់ប៉ុណ្ណោះ ខណៈជនបរទេសមានចន្លោះត្រឹមតែ ៣០​ ទៅ ៤០នាក់ ហើយជាជនបរទេសក្នុងស្រុកថែមទៀត។ ប៉ុន្តែ ប៉ុន្មានឆ្នាំចុងក្រោយនេះ មានអ្នកចូលរួមបានហក់ដល់ទៅជាង១ម៉ឺននាក់។

ឯកឧត្តមបានមានប្រសាសន៍ថា៖ ដោយឡែក សម្រាប់ព្រឹត្តិការណ៍ឆ្នាំ២០២៤ ដែលនឹងប្រព្រឹត្តទៅនៅថ្ងៃទី០១ ខែធ្នូ ឆ្នាំ២០២៤ខាងមុខ គិតត្រឹមថ្ងៃសុក្រ ទី២៧ ខែកញ្ញា មានអ្នកចុះឈ្មោះចូលរួមជាង៧០០០នាក់ហើយ ដែលក្នុងនោះជនជាតិខ្មែរមានជិត ៦០០០នាក់ និងបរទេសប្រមាណ២៣០០នាក់។ ជាមួយគ្នានេះ គណៈកម្មការរៀបចំសង្ឃឹមថា នឹងមានអ្នកចូលរួមកើនឡើងដល់ខ្ទង់ជាង១ម៉ឺននាក់ក្នុងថ្ងៃប្រកួតផ្លូវការ។ ចំណែកអ្នកនាំមុខក្នុងការចុះឈ្មោះពីក្រៅប្រទេស រួមមានមកពីចក្រភពអង់គ្លេស អូស្ត្រាលី បារាំង សហរដ្ឋអាមេរិក និងជប៉ុន។

ឯកឧត្តមអគ្គលេខាធិការគណៈកម្មាធិការជាតិអូឡាំពិកកម្ពុជាបានបន្ថែមថា ៖ ទិវារត់ប្រណាំងអន្តរជាតិពាក់កណ្ដាលម៉ារ៉ាតុងនេះ មានគោលបំណងបន្តជួយដល់ជនរងគ្រោះពិការដោយសារគ្រាប់មីន និងកម្មវិធីសប្បុរសធម៌នានា។ ជាមួយគ្នានេះ អង្គការបេះដូងមាសរបស់ប្រទេសជប៉ុនក៏បានចូលរួមជួយផ្នែកបច្ចេកទេស និងចង់រួមចំណែកជួយផ្នែកសប្បុរសធម៌ដល់ជនរងគ្រោះដោយសារមីនដូចគ្នា។ មិនតែប៉ុណ្ណោះ ព្រឹត្តិការណ៍នេះ នឹងជួយដល់វិស័យកីឡាជំនាញ និងកីឡាកម្រិតខ្ពស់ក៏ដូចជាវិស័យទេសចរណ៍ សុខមាល​ភាព និងបង្កើតនូវភាពសប្បាយរីករាយដល់អ្នកចូលរួមទៀតផង។

នៅក្នុងឱកាសនេះផងដែរ លោក ចាន់ រដ្ឋា អគ្គនាយកក្រុមហ៊ុន មេនូឡាយហ្វ៍ ខេមបូឌា បានថ្លែងអំណរគុណយ៉ាងជ្រាលជ្រៅដល់គណៈកម្មាធិការជាតិអូឡាំពិកកម្ពុជា សម្រាប់ភាពជាដៃគូដ៏រឹងមាំ និងផ្តល់ឱកាសដល់ក្រុមហ៊ុន មេនូឡាយហ្វ៍ ឧបត្ថម្ភគាំទ្រផ្តាច់មុខព្រឹត្តការណ៍រត់ប្រណាំងអន្តរជាតិពាក់កណ្តាលម៉ារ៉ាតុងអស់រយៈពេល ១១ ឆ្នាំកន្លងមកនេះ។

លោក ចាន់ រដ្ឋា មានប្រសាសន៍បញ្ជាក់ថា ៖ « ភាពជាដៃគូដ៏យូរអង្វែងដូចបានលើកឡើងខាងនេះ បានឆ្លុះបញ្ចាំងពីការប្តេជ្ញាចិត្តរបស់ក្រុមហ៊ុន ក្នុងការចូលរួមចំណែកជាមួយរាជរដ្ឋាភិបាលកម្ពុជា ក្រោមកិច្ចខិតខំប្រឹងប្រែងជួយប្រជាជនឱ្យរស់នៅប្រកបដោយសុខភាពល្អ និងជីវិតកាន់តែប្រសើរ»។

អគ្គនាយកក្រុមហ៊ុន មេនូឡាយហ្វ៍ ខេមបូឌា បានគូសរំលេចថា ៖ ភាពជាដៃគូ និងការគាំទ្ររយៈពេល ១១ ឆ្នាំកន្លងមកនេះ បានធ្វើឲ្យការរៀបចំព្រឹត្តិការណ៍នេះកាន់តែធំឡើងៗពីមួយឆ្នាំទៅមួយឆ្នាំ។ ជាក់ស្តែង កាលពីឆ្នាំ២០២៣ មានអ្នករត់ប្រណាំងជាង ១០ ១៥៤ នាក់មកពី ៧៨ ប្រទេសទូទាំងពិភពលោកមកកាន់ទឹកដីខេត្តសៀមរាប ដែលក្នុងនោះមានការចូលរួមពីអ្នករត់ក្នុងស្រុកប្រមាណជាង ៦ ០០០ នាក់ផងដែរ។ នេះពិតជាសបញ្ជាក់ឲ្យឃើញថា ទិវារត់ប្រណាំងអន្តរជាតិពាក់កណ្តាលម៉ារ៉ាតុង គឺជាព្រឹត្តិការណ៍កីឡាដ៏ធំតែមួយគត់នៅកម្ពុជា ដែលបានលើកកម្ពស់សុខុមាលភាពប្រជាជន ជំរុញកំណើនសេដ្ឋកិច្ចសហគមន៍មូលដ្ឋាន និងវិស័យទេសចរណ៍ក្នុងស្រុក ជាពិសេសគាំទ្រដល់អង្គការសប្បុរសធម៌ និងមន្ទីរពេទ្យកុមារនានាជាច្រើនតាមរយៈការរៀបចំព្រឹត្តិការណ៍ដោយគណៈកម្មាធិការជាតិអូឡាំពិកកម្ពុជា និងការឧបត្ថម្ភគាំទ្រផ្ដាច់មុខដោយក្រុមហ៊ុន មេនូឡាយហ្វ៍ ព្រមទាំងក្រសួងពាក់ព័ន្ធ និងដៃគូសហការជាច្រើនទៀត។

លោកបានឱ្យដឹងទៀតថា ៖ ក្រៅពីជាម្ចាស់ឧបត្ថម្ភគាំទ្រតាំងពីឆ្នាំ២០១៤ រហូតមក និងដោយមានការគាំទ្រពីគណៈកម្មាធិការជាតិអូឡាំពិកកម្ពុជា ក្រុមហ៊ុន មេនូឡាយហ្វ៍ ក៏បានផ្តួចផ្តើមកម្មវិធីរៃអង្គាសថវិកាក្នុងចំណោមបុគ្គលិករបស់ខ្លួនទូទាំងពិភពលោក ដើម្បីគាំទ្រដល់មន្ទីរពេទ្យ កុមារអង្គរ។ ជាលទ្ធផល ថវិកាសរុបជាង ៦៥០ ០០០ ដុល្លារអាមេរិកត្រូវបានរៃអង្គាស ហើយកុមារកម្ពុជាជាង ៧៥ ៤០០នាក់ ត្រូវបានជួយសង្គ្រោះតាមរយៈយុទ្ធនាការនេះចាប់តាំងពីឆ្នាំ២០១៥ មក។ 

លោកបានរំលឹកផងដែរថា ក្រុមហ៊ុន មេនូឡាយហ្វ៍ ខេមបូឌា គឺជាក្រុមហ៊ុនធានារ៉ាប់រងអាយុជីវិតអន្តរជាតិដំបូងបង្អស់នៅកម្ពុជា និងជាបុត្រសម្ព័ន្ធនៃក្រុមហ៊ុន Manulife ហ្វាយនែនសល ដែលជាក្រុមហ៊ុនផ្តល់សេវាកម្មហិរញ្ញវត្ថុឈានមុខគេលំដាប់ពិភពលោក មានស្នាក់ការកណ្តាលជាសកលនៅទីក្រុងតូរ៉ុនតូ ប្រទេស កាណាដា ជាមួយប្រតិបត្តិការអាជីវកម្មជាង ១៥៥ ឆ្នាំ នៅលើពិភពលោករួមមាន នៅប្រទេសកាណាដា សហរដ្ឋអាមេរិក អឺរ៉ុប និងតំបន់អាស៊ី ដែលកំពុងបម្រើសេវាកម្មជូនអតិថិជនជាង ៣៥ លាននាក់នៅទូទាំងសកលលោក។

ដោយឡែកនៅកម្ពុជា ក្រុមហ៊ុនបាន និងកំពុងផ្តល់កិច្ចការពារផ្នែកហិរញ្ញវត្ថុជូនគ្រួសារកម្ពុជាជាង ១០ ម៉ឺននាក់ ដោយក្នុងនោះជិត ៣០០០ គ្រួសារបានទទួលសំណងពីក្រុមហ៊ុនរួចមកហើយ ដែលជាជំនួយផ្នែកហិរញ្ញវត្ថុនៅពេលមានបញ្ហាសុខភាព ឬបាត់បង់សមាជិកណាមួយនៅក្នុងគ្រួសារ គិតជាទឹកប្រាក់សរុបជិត ១២ លានដុល្លារអាមេរិក។ ក្រៅពីនេះ ក្រុមហ៊ុនក៏បានចំណាយថវិកាជាង ៥ លានដុល្លារអាមេរិករួចមកហើយក្នុងសកម្មភាពសង្គមនានារួមមាន ការគាំទ្ររាជរដ្ឋាភិបាលកម្ពុជាក្នុងការលើកកម្ពស់សុវត្ថិភាពចរាចរណ៍ផ្លូវគោក ការចែកមួកសុវត្ថិភាព ការឧបត្ថម្ភព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុង និងកម្មវិធីនានាជាច្រើនទៀតផងដែរ។

លោក ចាន់ រដ្ឋា បានគូសបញ្ជាក់ដោយសង្កត់ធ្ងន់ថា ៖ «យើងបានត្រៀមខ្លួនរួចជាស្រេច ដើម្បីគោរពស្វាគមន៍វត្តមានដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចូលរួមព្រឹត្តិការណ៍កីឡាដ៏ធំប្រចាំឆ្នាំនេះ។ នេះជាកិត្តិយសដ៏ធំធេងណាស់»៕