ភ្នំពេញ ៖ ក្នុងរយៈពេល២ថ្ងៃ (ថ្ងៃទី ១៥​-១៦) ខែមិថុនានេះ គឺជាព្រឹត្តិការណ៍នៃការប្រារព្ធទិវាជាតិអប់រំបណ្តុះបណ្តាលបច្ចេកទេស និង វិជ្ជាជីវៈលើកទី៦ ក្រោម​ប្រធាន​បទ «TVET ផ្តល់ជំនាញ និងការងារសមរម្យ»។ ទិវាជាតិនេះដែរ រៀបចំឡើងក្នុងគោលបំណង​លើកកម្ពស់​ការ​អប់រំបណ្ដុះបណ្ដាលបច្ចេកទេស និងវិជ្ជាជីវៈ ក៏ដូចជា​ផ្សព្វផ្សាយ​ដល់សាធារណៈជនអំពីសារៈសំខាន់នៃការអប់រំបណ្ដុះបណ្ដាលបច្ចេកទេស​ដើម្បី​អភិវឌ្ឍ​កម្លាំងពលកម្មជំនាញ​សម្រាប់ឆ្លើយតបទៅនឹង​តម្រូវការ​ទីផ្សារ​ការងារទាំងក្នុង និងក្រៅ​ប្រទេស។

ទន្ទឹមនឹងស្ថានភាពមិនច្បាស់លាស់នៃពិភពលោកបច្ចុប្បន្ន ការបណ្ដុះបណ្ដាលជំនាញនានាកាន់តែមាន​ភាព​សំខាន់ទ្វេដង ដែលរាជរដ្ឋាភិបាល​នៃប្រទេសនីមួយៗត្រូវយកចិត្តទុកដាក់។ ដោយឡែក សម្រាប់កម្ពុជា រាជរដ្ឋាភិបាល​​ បាន  និងកំពុងធ្វើនូវសកម្មភាពជាច្រើន​សំដៅបង្កើន​កម្លាំង​​ពលកម្ម​ជំនាញ​នៅក្នុង​ប្រទេស ដោយក្នុងនោះវេទិកាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈក៏ជាចំណែកមួយផងដែរ។

ទោះជាយ៉ាងនេះក្ដី វេទិកាតែមួយក៏មិនអាចឆ្លើយតបគ្រប់គ្រាន់ទៅនឹងតម្រូវការការងារបច្ចុប្បន្ននោះដែរ ហេតុដូច្នេះហើយបានជារាជរដ្ឋាភិបាល​កម្ពុជា​បានដាក់ចេញនូវគោលនយោបាយជាច្រើនដូចជា៖

គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ គោលនយោបាយជាតិ​ស្តីពី​មុខរបរ និងការងារឆ្នាំ២០១៥-២០២៥ គោលនយោបាយជាតិស្តីពីការអប់រំ បណ្ដុះបណ្ដាលបច្ចេកទេស និងវិជ្ជាជីវៈឆ្នាំ២០១៧-២០២៥ ក្របខ័ណ្ឌយុទ្ធសាស្ត្រ និងកម្មវិធីស្តារ និង​ជំរុញ កំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មីសម្រាប់ឆ្នាំ២០២១-២០២៣ គោលនយោបាយស្តីពី​ពលករ​ទេសន្តរប្រវេសន៍ឆ្នាំ២០១៩-២០២៣ ក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជាឆ្នាំ២០២១-២០៣៥ ផែនទី​បង្ហាញ​ផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា ផែនទីបរិវត្តកម្មឧស្សាហកម្មវាយនភណ្ឌ និងកាត់ដេរកម្ពុជាឆ្នាំ២០២៣-២០២៧ ព្រមទាំងផែនទីបង្ហាញផ្លូវស្តីពីការអភិវឌ្ឍជំនាញនៅកម្ពុជាឆ្នាំ២០២៣-២០៣៥ ជាដើម។

ជាមួយគ្នានេះ ដើម្បីផ្ដល់លទ្ធភាពទទួលបានការបណ្តុះបណ្តាលប្រកបដោយសមធម៌ រាជរដ្ឋាភិបាលបានពង្រីក ការផ្ដល់​អាហារូបករណ៍​កាន់​តែ​ច្រើនឡើងសម្រាប់យុវជនដែលបោះបង់ការសិក្សា ប្រជាពលរដ្ឋក្រីក្រ ស្ត្រី ជនពិការ ជនជាតិដើមភាគតិច ជនងាយរងគ្រោះ និង​កម្មករ​និយោជិតនានា ហើយជាលទ្ធផលរយៈពេល ៥ឆ្នាំចុងក្រោយនេះ មានសិក្ខាកាម សិស្ស និស្សិត និងកម្មករនិយោជិតប្រមាណ ៣០ម៉ឺននាក់ បានទទួលការ​បណ្តុះ​បណ្តាល និងបញ្ចប់ការសិក្សាដោយជោគជ័យក្នុងការទទួលបានជំនាញថ្មី និងលើកកម្ពស់ជំនាញរបស់ខ្លួន ដោយបាន​ចាប់យក​ឱកាស​ការងារ​ល្អៗ ក៏ដូចជាការបង្កើតមុខរបរដោយខ្លួនឯងដើម្បីបង្កើនប្រាក់ចំណូលក្នុងគ្រួសារ និងជួយលើកស្ទួយសេដ្ឋកិច្ចជាតិ បានយ៉ាងច្រើន។

បន្ថែមពីនេះ រាជរដ្ឋាភិបាលក៏បានត្រៀមរៀបចំផែនការបណ្ដុះបណ្តាលជំនាញបច្ចេកទេស និងវិជ្ជាជីវៈ ដល់យុវជននៅគ្រួសារក្រីក្រ និងងាយ​រងគ្រោះ​ទូទាំងប្រទេសចំនួន ១លាន ៥សែននាក់ ដោយរដ្ឋធានាផ្តល់ប្រាក់ឧបត្ថម្ភចាប់ពីឆ្នាំ២០២៣នេះតទៅដើម្បីផ្ដល់ឱកាសឱ្យ​ពួកគេ​ទទួល​បានជំនាញសម្រាប់យកទៅធ្វើការងារ ឬបង្កើតមុខរបរដោយខ្លួនឯង និងបំពេញតម្រូវការនៃកម្លាំងពលកម្មជំនាញ​សម្រាប់ការ​វិនិយោគថ្មីៗ​នៅកម្ពុជា។

ដោយឡែក ក្រសួងការងារក៏បាន និងកំពុងជំរុញការអនុវត្តនូវផែនការយុទ្ធសាស្ត្រអភិវឌ្ឍន៍វិស័យ​ការងារ និងបណ្តុះបណ្តាលវិជ្ជាជីវៈ​ឆ្នាំ២០១៩-២០២៣ និងផែនការមេសម្រាប់អភិវឌ្ឍគ្រឹះស្ថានអប់រំ​បណ្ដុះ​បណ្ដាលបច្ចេកទេស និងវិជ្ជាជីវៈឆ្នាំ២០២១-២០២៥ ជាពិសេស​ការធ្វើ​ទំនើបកម្មប្រព័ន្ធអប់រំ​បណ្តុះ​​បណ្តាលបច្ចេកទេស និងវិជ្ជាជីវៈដើម្បីកសាងបានកម្លាំងពលកម្មដែលមានជំនាញវិជ្ជាជីវៈច្បាស់លាស់ គំនិត​ច្នៃប្រឌិត និងភាពប្រកួតប្រជែងខ្ពស់ដែលអាចឆ្លើយតបទៅនឹងតម្រូវការទីផ្សារ​ការងារទាំងក្នុង​ និងក្រៅប្រទេស។

គួររំលឹកដែរថា ក្នុងអំឡុងពេលមានការរីករាលដាលនៃជំងឺកូវីដ-១៩ ក្រសួងការងារបានបង្កើត​កម្មវិធីបណ្តុះបណ្តាល​កម្រិតសញ្ញាបត្រ​បច្ចេកទេស និងវិជ្ជាជីវៈ១ ​រយៈពេល ៤ខែ ដល់កម្មករនិយោជិត និងយុវជន ដើម្បីទទួលបានឱកាសការងារថ្មី និងបង្កើតមុខរបរដោយ​ខ្លួនឯង​បាន​ចំនួន ២១ ៥០០នាក់ និងបណ្តុះបណ្ដាលជំនាញទន់ដល់កម្មករនិយោជិតបានចំនួន ៦៨ ០០០នាក់ទៀតផង៕