សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៦ ថ្ងៃទី១៥ មិថុនា ២០២៣ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានចេញសារលិខិតអបអរសាទរ ដោយក្នុងលិខិតនោះដែរ រាជរដ្ឋាភិបាលបានជំរុញលើកទឹកចិត្តដល់និស្សិតចូលរៀនជំនាញបច្ចេកទេស និងវិជ្ជាជីវៈ ដើម្បីឆ្លើយតបនឹងតម្រូវការទីផ្សារការងារ ។
នៅក្នុងសារលិខិតរបស់សម្ដេចបានឱ្យដឹងថា រដ្ឋាភិបាលនៅតែបន្តជំរុញលើកទឹកចិត្តនិងបង្កើនការចុះឈ្មោះចូលរៀនជំនាញបច្ចេកទេស និងវិជ្ជាជីវៈ ដើម្បីឱ្យមានចំណេះដឹង ជំនាញច្បាស់លាស់ និងភាពប្រកួតប្រជែង ខ្ពស់ឆ្លើយតបទៅនឹងតម្រូវការទីផ្សារការងារ ។ រាជរដ្ឋាភិបាល ក៏បានអំពាវនាវឱ្យភាគីពាក់ព័ន្ធទាំងអស់ចូលរួមសហការ និងគាំត្រកម្មវិធី របស់រាជរដ្ឋាភិបាលក្នុងការបណ្ដុះបណ្ដាលជំនាញបច្ចេកទេសវិជ្ជាជីវៈ ដល់យុវជននៅគ្រួសារក្រីក្រ និងងាររងគ្រោះទូទាំងប្រទេស ចំនួន ១លាន៥សែននាក់ ។
នៅក្នុងសារលិខិតនោះដែរ សម្ដេចតេជោសុំឱ្យ គ្រប់ស្ថានីយវិទ្យុ ទូរទស្សន៍របស់រដ្ឋ និងឯកជន ព្រមទាំងប្រព័ន្ធផ្សព្វផ្សាយនានា សូមបន្តផ្សព្វផ្សាយឱ្យបានទូលំទូលាយ ពីវិស័យអប់រំ បណ្ដុះបណ្ដាលបច្ចេកទេស និងវិជ្ជាជីវៈ ដើម្បីបង្កើនការយល់ដឹងអំពីសារៈសំខាន់នៃវិស័យនេះជូនសាធារណជន ។
សម្ដេចតេជោបន្តថា សេដ្ឋកិច្ចកម្ពុជាបានកើនឡើងប្រចាំឆ្នាំជាមធ្យមក្នុងអត្រា ៧ភាគរយ ជាង២ទសវត្សរ៍ ហើយស្ថានភាពទីផ្សារការងារ នៅកម្ពុជាមានភាពរឹងមាំដោយរក្សាបាននូវអត្រាមានការងារធ្វើខ្ពស់ប្រមាណ ៩៩,៣ភាគរយនៃកម្លាំងពលកម្មសរុបចំនួន ប្រមាណ១០,៨លាននាក់ ។ បន្ថែមលើការរីកច្រើន សេដ្ឋកិច្ចក្នុងប្រព័ន្ធ សេដ្ឋកិច្ចក្រៅប្រព័ន្ធ ក៏ជាកម្លាំងចលករដ៏សំខាន់មួយដែលបានដើរតួនាទីស្នូល ក្នុងការជំរុញកំណើនសេដ្ឋកិច្ច និងមានភាពធន់ខ្ពស់ចំពោះផលប៉ះពាល់ពីកត្តាខាងក្រៅមកលើសេដ្ឋកិច្ចជាតិ និងជីវភាពប្រជាពលរដ្ឋ ។
ពាក់ព័ន្ធនឹងទីផ្សារការងារបច្ចេកទេសនៅក្នុងប្រទេសកម្ពុជា ឃើញថាសាលាបណ្ដុះបណ្ដាលបច្ចេកទេស នានា បានបញ្ជាក់ថាមិនមានសិស្សគ្រប់គ្រាន់ក្នុងការផ្ដល់ជូនទៅបណ្ដាក្រុមហ៊ុនសហគ្រាសជំនាញបច្ចេកទេសនោះទេ ហើយនៅរៀងរាល់ពេលសិស្សជិតបញ្ចប់ការសិក្សា តែងតែមានក្រុមហ៊ុនសហគ្រាសនានាមកទាក់ទងកក់សិស្សមុន ដែលមានន័យថាក្រុមហ៊ុនឬនិយោជក បានមកចុះកិច្ចសន្យាក្នុងការទទួលសិស្សមុននឹងពួកគេបញ្ចប់ការសិក្សាទៅទៀត ដោយក្រុមហ៊ុនសហគ្រាសខ្លះបានឧបត្ថម្ភសម្ភារៈមកកាន់សាលាដើម្បីឱ្យសាលាបណ្ដុះបណ្ដាលសិស្សនិស្សិតចំជំនាញដែលពួកគេចង់បានតែម្ដង ។
លោក ប៊ុន ភារិន នាយកសាលាវិទ្យាស្ថានជាតិពហុបច្ចេកទេស កម្ពុជាបានថ្លែងជារឿយៗថា និស្សិតដែលរៀនចប់ពីវិទ្យាស្ថានជាតិ ពហុបច្ចេកទេសកម្ពុជា មិនភ័យរឿងអត់ការងារធ្វើនោះទេ ផ្ទុយទៅវិញមានតែសិស្សមិនចង់ធ្វើ ពីព្រោះថាពេលខ្លះសិស្សមិនទាន់ចប់ផង ក៏មានក្រុមហ៊ុនជាច្រើនទាក់ទងមកសាលាដើម្បីសម្រួលឱ្យសិស្សទៅធ្វើការនៅក្រុមហ៊ុនរបស់គេ ។ ក្នុងន័យនេះ គឺជំនាញបច្ចេកទេសនៅកម្ពុជា កំពុងមានទីផ្សារការងារខ្ពស់ស្របនឹងប្រទេសកម្ពុជាប្រទេសកំពុងអភិវឌ្ឍន៍ផង ជំនាញនេះរឹតតែត្រូវការខ្លាំងដើម្បីអភិវឌ្ឍន៍ប្រទេសទៅទៀត ៕
Account
Security
Favourite Content