សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការចាយវាយប្រចាំថ្ងៃ ជារឿងចាំបាច់សម្រាប់យុវជនគ្រប់រូប ប៉ុន្តែយុវជនមិនត្រូវចាយវាយខ្ជះខ្ជាយ ទិញសម្ភារៈប្រើប្រាស់មិនមានតម្រូវការចាំបាច់នោះទេ ពោលគឺត្រូវចាយវាយដោយសន្សំសំចៃ ហើយចេះប្រើទម្លាប់ ក៍ដូចជាធ្វើផែនការហិរញ្ញវត្ថុផ្ទាល់ខ្លួន ដើម្បីក៏សាងគ្រឹះសេដ្ឋកិច្ចរឹងមាំសម្រាប់អនាគតរបស់ខ្លួន។
លោក សុខ ចាន់ នាយកបរិយាបន្នហិរញ្ញវត្ថុ និងទំនាក់ទំនងសាធារណៈនៃសមាគមធនាគារនៅកម្ពុជាបានពន្យល់ថា យុវជនគួរចាប់ផ្តើមគិតគូរអំពីការធ្វើផែនការហិរញ្ញវត្ថុឱ្យកាន់តែឆាប់កាន់តែល្អ។ ការរៀបចំផែនការហិរញ្ញវត្ថុ គឺជាមធ្យោបាយដែលអាចឱ្យយុវជនសម្រេចបាននូវគោលដៅក្នុងជីវិតរបស់ពួកគេ ដោយផ្តើមចេញពីការចេះគ្រប់គ្រងចំណូល និងចំណាយរបស់ពួកគេបានល្អ និងមានប្រសិទ្ធភាព។
ទាក់ទងនឹងវិធីសាស្រ្តសន្សំ លោកបានពន្យល់ថា ផែនការសន្សំមានច្រើនរបៀបខុសៗគ្នា ប៉ុន្តែយុវជនគប្បីជ្រើសរើសយកវិធីសាស្រ្ត ៥០%-៣០%-២០% បានន័យថា តម្រូវការចំាបាច់គឺ ៥០% ដោយផ្តោតលើថ្លៃជួលផ្ទះ ទឹកភ្លើង គ្រឿងទេស ថ្លៃសាលា កម្ចីធនាគារ ថ្នាំពេទ្យ ជាដើម, ដោយឡែកចំណង់ ឬការចង់បានគឺ៣០% សម្រាប់ការញុំាអាហារខាងក្រៅ ដំណើរកម្សាន្ត ជប់លៀង ជាដើម និង២០%ទៀត សម្រាប់ការសន្សំ ដោយផ្តោតលើការសន្សំសម្រាប់រឿងអាសន្ន ចូលនិវត្តន៍ និងវិនិយោគជាដើម។
លោកបញ្ជាក់ថា ៖
«ចូរកុំទិញរបស់របរដែលមិនមាននៅក្នុងបញ្ជីដែលយើងត្រូវការ ធ្វើដូចនេះ យើងអាចចៀសឆ្ងាយពីការទិញសម្ភារៈដែលមិនចាំបាច់ ឬទិញរបស់របរដែលលើសពីចំណូលប្រចាំខែរបស់យើង។ នៅពេលយើងចង់បានរបស់របរអ្វីមួយ ត្រូវសួរខ្លួនឯងថា តើយើងពិតជាត្រូវការវាទេ? តើយើងមានសមត្ថភាពអាចទិញវាទេ? តើវាជាជម្រើសល្អបំផុតទេ? ហើយបើគិតឃើញថា វាលើសផែនការចំណាយប្រចាំខែ ហើយមិនមានតម្រូវការចាំសម្រាប់ការប្រើប្រាស់ ចូរកុំទិញវា បើនៅតែសន្សំចិត្តទិញរបស់នោះ គឺជាកំហុសនៃការចាត់ចែងហិរញ្ញវត្ថុជាមិនខាន»។
និយាយអំពីកំហុសនៃការចាត់ចែងហិរញ្ញវត្ថុ ភាគច្រើនដូចជា ទី១.ការខ្វះការរៀបចំហិរញ្ញវត្ថុ, ទី២.ការចំណាយច្រើននៅពេលមានឱកាសរកចំណូល, ទី៣.ការទិញរបស់របរថ្លៃៗជាងចំណូលដែលខ្លួនរកបាន, ទី៤.តែងតែបង្ហាញពីភាពស៊ីវីល័យទៅកាន់អ្នកដទៃ, ទី ៥.ទិញផ្ទះថ្លៃជាងអ្វីដែលខ្លួនរកបាន , ទី៦.គ្មានបំណងក្លាយជាអ្នកមានចំណេះដឹងហិរញ្ញវត្ថុ។
លោក សុខ ចាន់ បានបន្តទៀតថា ៖
«បើយើងចេះសន្សំ វានឹងផ្តល់គុណសម្បត្តិច្រើន ដូចជា ទី១.ប្រាក់សន្សំជួយយើងឱ្យចៀសផុតពីបញ្ហាហិរញ្ញវត្ថុ និងគ្រាអាសន្នដែលកើតឡើងជាយថាហេតុដូចជា ថ្លៃថ្នាំពេទ្យនៅពេលមានជំងឺ និងបាត់បង់ការងារជាដើម។ ទី២.ប្រសិនជាយុវជនអាចគ្រប់គ្រងការសន្សំបានល្អ ពួកគេអាចមានលទ្ធភាពធ្វើដំណើរកម្សាន្ត ទិញផ្ទះ និងមានប្រាក់ចូលនិវត្តន៍ដោយងាយស្រួល»។
ជាចុងក្រោយលោកបានបញ្ជាក់ឱ្យដឹងផងដែរថា មិនថាការសន្សំត្រូវបានអនុវត្តតាមវិធីដាក់លុយក្នុងកូនជ្រូក ការសន្សំជាមួយធនាគារ ឬការទិញធានារ៉ាប់រងមានអាយុកាលនោះទេ គឺសុទ្ធតែផ្តល់នូវផលល្អត្រឡប់មកវិញ ប៉ុន្តែដើម្បីប្រាកដមានទំនុកចិត្ត និងសុវត្ថិភាព លោកបានលើកទឹកចិត្តឱ្យសន្សំជាមួយគ្រឹះស្ថានធនាគារណាមួយក៏បាន ដែលអាចជៀសឆ្ងាយពីហានិភ័យ៕ វិន ឈុនហ៊ាត
Account
Security
Favourite Content