បរទេស ៖ ក្នុងស្ថានភាពដែលពិភពលោកកំពុងងាកខ្លួនទៅរកថាមពលដែលបញ្ចេញឧស្ម័នកាបូនតិច ឬថាមពលកាបូនទាប Low-carbon energy នោះ វាជាកត្តាដែលធ្វើឲ្យការកើនឡើងនៃបច្ចេកវិទ្យានានាសម្រាប់គាំទ្រក៏មានការស្ទុះឡើងខ្លាំងផងដែរ ដែលអ្នកវិភាគមើលឃើញថា ការជីករុករករ៉ែ និងវត្ថុធាតុដើមកម្រច្រើនប្រភេទរបស់ភពផែនដីក៏នឹងកើនឡើងក្នុងល្បឿនដែលមិនធ្លាប់ឃើញមានពីមុន។

រ៉ែ និងវត្ថុធាតុដើមកម្រដែលយើងអាចមើលឃើញជាក់ស្តែងថាកំពុងតែមានតំរូវការខ្លាំងទាំងនោះ រួមមានទាំងលីចូម, ស្ពាន់ធ័រ, ទង់ដែង និងនីកែល ជាដើម ដែលពួកវាកំពុងចាប់ផ្តើមមានទីផ្សារយ៉ាងខ្លាំងក៏ដោយសារតែវាជាសមាសធាតុដ៏ចំបាច់ក្នុងការផលិតរថយន្តអគ្គិសនី និងឧបករណ៍សម្រាប់ប្រើប្រាស់ក្នុងវិស័យផលិតថាមពលកកើតឡើងវិញផងដែរ។

ការពន្លឿនផែនការបញ្ចេញឧស្ម័នស្មើសូន (Net Zero ) ដែលជាយន្តការតែមួយគត់សម្រាប់ពិភពលោកចូលរួមគ្នាដើម្បីប្រយុទ្ធប្រឆាំងទៅនឹងបញ្ហាបម្រែបម្រួលអាកាសធាតុគឺមានន័យជាការពន្លឿនផលិតកម្មផលិតឧបករណ៍បច្ចេកវិទ្យាសំខាន់ៗខាងលើនេះ ប៉ុន្តែទោះបីជាយ៉ាងណាក្តី វាចាំបាច់ត្រូវតែធ្វើឡើងឲ្យស្របទៅនឹងបច្ចុប្បន្នភាព និងតម្រូវការជាក់ស្តែង។

ភ្នាក់ងារអន្តរជាតិទទួលបន្ទុកវិស័យថាមពលហៅកាត់ថា IEA បានព្យាករណ៍ថាដើម្បីសម្រេចឲ្យបាននូវផែនការ Net Zero ឆ្នាំ២០៥០នោះ ពិភពលោកចាំបាច់ត្រូវតែមានចំណែករថយន្តអគ្គិសនីឲ្យបានក្នុងទីផ្សារសកលលោកសរុបដល់ទៅ៦០ភាគរយត្រឹមឆ្នាំ២០៣០ និងប៉ានស្មានថា ការប្រើប្រាស់រ៉ែកំរទាំងអស់នោះនឹងមានកំណើនដល់ទៅ៦ដងនៅត្រឹមឆ្នាំ២០៤០ ធៀបទៅនឹងការប្រើប្រាស់រ៉ែកំរនៅក្នុងពេលបច្ចុប្បន្ន។

ថ្វីត្បីតតែវាជាដំណោះស្រាយដ៏ល្អបំផុតសម្រាប់មនុស្សយើងគ្រប់គ្នាដើម្បីគេចចេញពីបញ្ហាបម្រែបម្រួលអាកាសធាតុក្តី ប៉ុន្តែក្នុងដំណាក់កាលនៃការផ្លាស់ប្តូរការប្រើប្រាស់ថាមពលនេះវាក៏នឹងអាចធ្វើឲ្យពិភពលោកគួរមានក្តីបារម្ភផងដែរប្រសិនបើការគ្រប់គ្រង និងការអនុវត្តមិនមានប្រសិទ្ធភាព។

យោងតាមការវិភាគដោយ The McKinsey&Company ដែលជាក្រុមហ៊ុនប្រឹក្សា និងយុទ្ធសាស្ត្រដ៏ចំណាស់អាយុកាលជាង១០០ឆ្នាំរបស់សហរដ្ឋអាមេរិកបានឲ្យដឹងថា តម្រូវការ និងការផ្កត់ផ្គង់នៃវត្ថុធាតុដើមដែលជារ៉ែកម្រ និងវត្ថុធាតុដើមសំខាន់ៗទាំងនោះនឹងអាចផ្ទុះឡើងជាវិបត្តនៅចន្លោះឆ្នាំ២០៣០ប្រសិនបើមិនអាចបំពេញចន្លោះប្រហោងនេះឲ្យបានត្រឹមត្រូវនោះទេ ហើយត្រឹមតែរយៈពេលមួយឆ្នាំពោលគឺនៅក្នុងឆ្នាំ២០៣០ប៉ុណ្ណោះ ពិភពលោកបែរជាអាចនឹងបញ្ចេញឧស្ម័នបំពុលដល់ទៅ៤០០ទៅ៦០០លានតោនកាបូនឌីអុកស៊ីតទៅវិញ។

The WEFORUM និង The McKinsey បានធ្វើការសហការគ្នាបង្កើតបានជាគំនិតផ្តួចផ្តើមមួយក្នុងការតាមដាន និងវិភាគអំពីបញ្ហាប្រថុយប្រថាននានាក្នុងករណីដែលការបំពេញចន្លោះតម្រូវការ និងផ្គត់ផ្គង់ពិតអាចកើតមានឡើងមែននោះដោយក្នងនោះវិបត្តិដែលអាចនឹងប្រឈមមុខមានដូចជាការកើនឡើងនៃតម្លៃក្នុងការផលិតបច្ចេកវិទ្យាគាំទ្រថាមពលកាបូនទាប, ភាពយឺតយ៉ាវនៃការផ្លាស់ប្តូរថាមពលរបស់ពិភពលោកតាមផែនការ, ធ្វើឲ្យសកម្មភាពជីករករ៉ែកំរកាន់តែមិនមានភាពទំនួលខុសត្រូវនិងចុងក្រោយអាចបង្កទៅជាភាពតានតឹងផ្នែកភូមិសាស្ត្រនយោបាយផងដែរ៕