ភ្នំពេញ៖ ក្នុងគោលបំណងពង្រីកទីផ្សារ និងការប្រកួតប្រជែងយ៉ាងទូលាយទៅលើការនាំចេញក្រៅប្រទេស ម្ចាស់សិប្បកម្មកែច្នៃត្រីដ៏ធំមួយកន្លែងបានបង្ហាញពីការប្តេជ្ញាចិត្តក្នុងការពង្រឹងសមត្ថភាព គុណភាព ស្របតាមស្ដង់ដារទីផ្សារដែលបានកំណត់។

អ្នកស្រី លឹម ប៉ុននី ជាម្ចាស់សិប្បកម្មត្រី ធឿន ស្រីនី បានប្រាប់ AMS Economy ឱ្យដឹងថា បច្ចុប្បន្ននេះ សិប្បកម្មកែច្នៃត្រីមួយនេះបានព្យាយាម និងខិតខំបង្កើនវិសាលភាពនៃការផលិត ពង្រឹងគុណភាព រសជាតិ និងសុវត្ថិភាព ដើម្បីអាចពង្រីកទំហំទីផ្សារនៅក្នុងស្រុកដែលអាចដាក់លក់នៅតាមបណ្តាផ្សារទំនើបនានាទូទាំងប្រទេស ជាពិសេសនៅក្រុង​ភ្នំពេញ និងអាចឈានទៅដល់ការនាំចេញទៅកាន់ទីផ្សារក្រៅប្រទេសយ៉ាងទូលាយដែលមានការប្រកួតប្រជែងខ្លាំង

អ្នកស្រី លឹម ប៉ុននី បានបញ្ជាក់ថា ៖

«សិប្បកម្មរបស់ខ្ញុំនេះ មានផលិតផលត្រីងៀត ដែលមានរសជាតិឆ្ងាញ់ និងប្រកបដោយសុវត្ថិភាពជាច្រើនប្រភេទ និងមានប្រហុក ផ្អក ប្រហុកត្រីកំភ្លាញ ត្រីងៀតគ្រប់មុខ ត្រីប្រាសំយ៉ុង ត្រីប្រឡាក់ ត្រសក់ចាវ ឆៃប៉ូវ ត្រីឆ្អើរ ដែលមានការទទួលស្គាល់ពី Capfish Capture ហើយអតិថិជនដែលមកទិញភាគច្រើន​ជាជនជាតិជាតិខ្មែរ រស់នៅក្នុងស្រុក ហើយក៏​មាន​អតិថិជនខ្លះមកពី​ក្រៅ​ស្រុក​គាំ​ទ្រ​ផងដែរ ដូចជា ប្រជាជនខ្មែររស់នៅអាមេរិក ជប៉ុន អូស្ត្រាលី កាណាដា និង​កូរ៉េ ជា​ដើម ដែល​តែង​តែ​កុម្ម៉ង់​​ទិញ​ជាហូរហែ»។​

ទាក់ទងនឹងសង្វាក់ផលិតកម្ម និងការកែច្នៃត្រីវិញត្រូវបានអ្នកស្រីប្រាប់ឱ្យដឹងថា ៖

«ក្នុងមួយថ្ងៃ យើងនាំចូលត្រីស្រស់ចំនួនមួយតោនក្រោយពីសម្អាតរួច ហើយរៀបចំប្រឡាក់គ្រឿងផ្សំរសជាតិដើម្បីធ្វើជាផលិតផលសម្រេច រួចបញ្ចូលទៅក្នុងផ្ទះសូឡា ( Solar home) ឬ ផ្ទះសម្ងួតសុវត្ថិភាព ហើយក្រោយពេលស្ងួតរួចរាល់អាចទទួលបានត្រីប្រមាណ ៣00 គីឡូក្រាម ។ ដោយសារយើងមានផ្ទះសម្ងួតសុវត្ថិភាព សម្រាប់ហាលត្រី យើងប្រើបុគ្គលិកតែ៦នាក់ប៉ុណ្ណោះ ដែលពីមុនមានជាង១០នាក់ ។ ផ្ទះសម្ងួតនេះ ជាការគាំទ្ររបស់គម្រោងកម្មវិធី Capfish Capture តាមរយៈកម្មវិធីជំរុញកំណើនជលផលប្រកបដោយចីរភាព និងបរិយាបន្ន ក្រោមសហហិរញ្ញប្បទានដោយសហភាពអឺរ៉ុប»។

យ៉ាងណាក៏ដោយ ជាមួយនឹងការកំណត់បាននូវកម្រិតគុណភាព រសជាតិ និងអនាម័យត្រឹមត្រូវ បច្ចុប្បន្ន សិប្បកម្មកែច្នៃត្រី ធឿន ស្រីនី ទទួលបានការគាំទ្រពីសំណាក់អតិថិជនក្នុងស្រុកច្រើនគួរសម ជាពិសេសក្រោយការចូលរួមក្នុងព្រឹត្តិការណ៍ពិព័រណ៍ផលិតផលក្នុងស្រុក ទាំងនៅតាមបណ្តាខេត្ត ទាំងនៅរាជធានីភ្នំពេញ ខណៈដែលក្រសួង ក៏ដូចជាស្ថាប័នពាក់ព័ន្ធមួយចំនួនក៏ទទួលស្គាល់ពីកម្រិតគុណភាពផលិតផលសម្រេចរបស់សិប្បកម្ម ទាំងប្រភេទត្រីងៀត ត្រីឆ្អើរ និងប្រហុកផ្អាប់ផងដែរ។

ដោយឡែក សម្រាប់គោលដៅនៅថ្ងៃអនាគត អ្នកស្រី លឹម ប៉ុននី មានបំណងពង្រីកវិសាលភាពទីផ្សារទាំងនៅក្នុងស្រុក និងនៅក្រៅប្រទេស ដែលអាចចូលរួមលើកកេរ្តិ៍ឈ្មោះកម្ពុជា ជំរុញកំណើនសេដ្ឋកិច្ច ជាពិសេសអាចផ្តល់ឱកាសការងារដល់ពលរដ្ឋក្នុងតំបន់ផងដែរ៕