សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ទឹកប្រហុក គឺជាប្រភេទគ្រឿងផ្សំរសជាតិម្យ៉ាងដែលបងប្អូនប្រជាជនខ្មែរយើងនិយមទទួលទាន ជាពិសេសជាជំនួយសម្រាប់ស្ត្រីមេផ្ទះ ឬអ្នកចម្អិនអាហារ ដែលអាចច្នៃលាយជាមួយនឹងមុខម្ហូបផ្សេងៗបានច្រើនមុខ ដើម្បីបង្កើនឱជារសក្នុងម្ហូបអាហារ។ ជាមួយគ្នានេះ ជាទូទៅ ទឹកប្រហុកលាយគ្រឿងរួចជាស្រេចភាគច្រើនជាទំនិញនាំចូល ប៉ុន្តែនៅពេលបច្ចុប្បន្ននេះ មានសិប្បកម្មក្នុងស្រុកមួយបានច្នៃ និងបង្កើតម៉ាកសញ្ញាផលិតផលទឹកប្រហុកខ្មែរ ដែលកំពុងទទួលបានការគាំទ្រគួរឱ្យកោតសរសើរ។
MRN ជាម៉ាកផលិតផលរបស់ក្រុមហ៊ុនក្នុងស្រុកមួយដែលផ្ដើមចេញពីការផលិតទឹកប្រហុក បន្តដល់គ្រឿងប្រឡាក់សាច់ ទឹកត្រី ទឹកស៊ីអៀវ ទឹកស៊ុបប្លែកៗ និងមួយផ្នែកទៀតពាក់ព័ន្ធជាមួយនឹងផលិតផលខ្មែរ ដែលផលិតដោយដៃខ្មែរ រួមទាំងវត្ថុធាតុដើម ក៏ជាផ្នែកមួយផ្តល់ឱកាសការងារដល់ជនពិការ និងរួមចំណែកជួយដល់កុមារកំព្រានៅក្នុងសហគមន៍ផងដែរ។
លោក ពឹង សាយណ្ណ ជាស្ថាបនិកក្រុមហ៊ុនខាងលើបានមានប្រសាសន៍ថា ៖
“យើងបង្កើតអាជីវកម្មនេះឡើងដោយសារយើងមើលឃើញថាប្រទេសខ្មែរមានការនាំចូលពីបរទេសច្រើន សូម្បីតែផលិតផលដែលខ្លួនអាចផលិតបាន។ ដើម្បីរួមចំណែកកាត់បន្ថយការនាំចូល និងកាត់បន្ថយការចំណាយរបស់បងប្អូនខ្មែរយើង ទើបយើងផលិតទឹកប្រហុក និងគ្រឿងទេសខ្មែរ ដែលមានឈ្មោះថា MRN នេះឡើង”
លោកបន្ថែមថា ៖
“ចំពោះការផលិតវិញ យើងមានទីតាំងនៅខាងជាយក្រុងគឺជិតផ្លូវ៥១ ស្រុកអង្គស្នួល ខេត្តកណ្តាល ហើយការផលិតគឺមិនទៀងទាត់ទេ ចន្លោះ ១០០០ ទៅ ២០០០ដបក្នុងមួយថ្ងៃ ឬអាចលើសនេះ អាស្រ័យតាមតម្រូវការបងប្អូនយើងនៅតាមបណ្តាខេត្តមួយចំនួនត្រូវការ ហើយយើងក៏មិនទាន់បានវាយលុកទីផ្សារច្រើនប៉ុន្មានដែរ ព្រោះកន្លងមកយើងបានធ្វើតេស្តសាកល្បងពីផលិតផល ការផ្លាស់ប្តូរស្តាយន៍ ប្តូរការឌីសាញ កែតម្រូវចំណុចណាដែលខ្វះខាតកន្លងមក”
សម្រាប់ផលិតផលទឹកប្រហុកខ្មែរប្រភេទនេះ មានច្រើនចំណុះ និងច្រើនរូបរាង ដែលមានទាំងប្រភេទកញ្ចប់ ប្រភេទជាដបផង កែវផង ហើយចំពោះតម្លៃគឺសមរម្យដែលអតិថិជនជាបងប្អូនប្រជាជនខ្មែរអាចទទួលយកបាន។
គួរបញ្ជាក់ដែរថា អាជីវកម្មនេះចាប់បើកដំណើរបានជាង ២ឆ្នាំមកហើយ ក៏មានចក្ខុវិស័យចង់ឲ្យគេស្គាល់យីហោម៉ាកសញ្ញាផលិតផលខ្មែរនេះ ទាំងក្នុងស្រុក និងក្រៅស្រុក ក៏ដូចជាព្យាយាមបំពេញសេវាកម្មឲ្យទៅដល់ដៃអតិថិជនតែម្តងមិនថាក្នុងស្រុក ឬក្រៅស្រុកនោះទេ គឺធ្វើយ៉ាងណាឲ្យពួកប្រជាជនខ្មែរ ក៏ដូចជាអតិថិជនចម្រុះជាតិសាសន៍ដទៃបានស្គាល់ពីម៉ាកសញ្ញាផលិតផលរបស់ខ្មែរដែលជាផលិតផលក្នុងស្រុក ហើយសំណូមពរឱ្យអតិថិជនទាំងអស់ ជាពិសេសអ្នករស់នៅក្នុងស្រុកសូមជួយលើកស្ទួយទាំងអស់គ្នា៕
Account
Security
Favourite Content