សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាទូទៅ មនុស្សភាគច្រើនមានការយល់ឃើញថា ចំណេះដឹងហិរញ្ញវត្ថុមានភាពចាំបាច់សម្រាប់តែបុគ្គលដែលមានទំនួលខុសត្រូវលើជីវិតផ្ទាល់ខ្លួន ដូចជា វ័យចេញធ្វើការ រកស៊ី ឬវ័យរៀបការជាដើម។ ប៉ុន្តែធាតុពិតគឺមិនដូច្នោះទេ ចំណេះដឹងហិរញ្ញវត្ថុមានសារៈសំខាន់សម្រាប់មនុស្សគ្រប់វ័យតែម្ដង។
សំខាន់គ្រប់វ័យ ព្រោះមនុស្សគ្រប់គ្នាត្រូវការប្រាក់ដើម្បីទ្រទ្រង់ជីវិតរស់នៅ ម្លោះហើយពួកគេមានភាពចាំបាច់ក្នុងការស្វែងយល់ពីការចាយវាយឱ្យបានត្រឹមត្រូវ។
ទាក់ទិននឹងចំណុចនេះផងដែរ លោក គ្រួច សត្យា នាយកនៃនាយកដ្ឋានធនាគារកិច្ច និងសារជីវកម្ម របស់ធនាគារ Maybank បានមានប្រសាសន៍ថា ចំណេះដឹងហិរញ្ញវត្ថុមានសារៈសំខាន់សម្រាប់មនុស្សគ្រប់វ័យ ហើយបើនៅក្នុងវ័យចាយលុយឪពុកម្ដាយទៀត គឺត្រូវតែដឹងថាតើ តម្លៃនៃលុយដែលគាត់រកមកបានមិនមែនជាលុយដែលរកមកដោយងាយស្រួលនោះទេ។ ដូច្នោះហើយ ការចាយវាយលុយកាក់គឺត្រូវតែមានផែនការឱ្យបានត្រឹមត្រូវ បានន័យថា ចំណាយលើអ្វីដែលត្រូវការ មិនមែនអ្វីដែលគ្រាន់តែចង់បាន។
អ្នកជំនាញរូបនេះបន្តឱ្យដឹងទៀតថា៖
«ការចង់បានភាគច្រើនគឺទៅលើសម្ភារៈនិយម ប៉ុន្តែបើថវិកាយើងមានកម្រិត ហើយនៅតែចង់ចាយវាយទៀត វាធ្វើឱ្យយើងទៅខ្ចីបំណុលពីមិត្តភក្កិ ឬស្ថាប័នផ្សេងៗដែលគេឱ្យខ្ចី។ អីចឹងវាធ្វើឱ្យយើងមានវិបត្តហិរញ្ញវត្ថុផ្ទាល់ខ្លួនរបស់យើង ដូច្នេះការគ្រប់គ្រងហិរញ្ញវត្ថុគឺមានសារៈសំខាន់បំផុតសម្រាប់គ្រប់វ័យ ជាពិសេសវ័យជំទង់នេះតែម្ដង»។
លោក គ្រួច សត្យា បានបន្តគូសបញ្ជាក់ទៀតផងដែរថា នៅពេលដែលបុគ្គលម្នាក់ៗមានការគ្រប់គ្រងហិរញ្ញវត្ថុបានល្អ វានឹងជួយបណ្ដុះផ្នត់គំនិតឱ្យរូបគេយល់អំពីតម្លៃនៃលុយដែលខ្លួនចាយវាយ។ ចំណេះដឹងនៃការគ្រប់គ្រងហិរញ្ញវត្ថុ ក៏អាចជួយលត់ដុំខ្លួនទៅថ្ងៃក្រោយឱ្យក្លាយទៅជាមនុស្សម្នាក់ដែលមានវិន័យក្នុងការគ្រប់គ្រងសាច់ប្រាក់ ហើយធ្វើឱ្យទទួលបានជោគជ័យនៅពេលដែលរៀនចប់ ចាប់ផ្ដើមពង្រីកអាជីវកម្ម ឬធ្វើអ្វីផ្សេងៗទៀត។
ម្យ៉ាងទៀត ក្នុងនាមជាឪពុកម្ដាយ ក៏មានតួនាទីបណ្ដុះផ្នត់គំនិតកូនៗ ឱ្យធំធាត់ឡើងជាមួយទម្លាប់នៃការសន្សំប្រាក់ និងចាយវាយដោយការត្រិះរិះពិចារណា។
«យើងដឹងហើយ សង្គមដែលមានបញ្ហារាល់ថ្ងៃនេះគឺភាគច្រើនមកពីវិបត្តិហិរញ្ញវត្ថុ ជម្លោះគ្រួសារ ឬរឿងពាណិជ្ជកម្មមួយចំនួន គឺដោយសារតែរឿង លុយ ព្រោះលុយ គឺជារឿងសំខាន់បំផុតសម្រាប់មនុស្សគ្រប់គ្នា»។ នេះបើតាមប្រសាសន៍របស់លោក គ្រួច សត្យា៕
Account
Security
Favourite Content