សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រសិនបើគេមើលតែមួយជ្រុង ការសន្សំគ្រាន់តែជាការដកប្រាក់ដែលសល់មួយចំណែកទៅទុកដោយមិនប៉ះពាល់ ឬចាយវាយក្នុងរយៈពេលណាមួយ។ ប៉ុន្តែមែនទែនទៅ ប្រាក់សន្សំប្រៀបបីដូចជាកញ្ចប់បម្រុងសម្រាប់ការពារនូវហានិភ័យនានាដែលកើតឡើងជាយថាហេតុនាពេលអនាគតយ៉ាងដូច្នោះដែរ។ ក្រៅពីនេះ កញ្ចប់ប្រាក់សន្សំថែមទាំងអាចជួយឱ្យបុគ្គលម្នាក់ៗមានសន្តិភាពផ្លូវចិត្ត ដោយមិនចាំបាច់បារម្ភថា នៅពេលមានបញ្ហា មានគ្រោះថ្នាក់ ឬការឈឺថ្កាត់ណាមួយ តើនឹងមានថវិកាណាសម្រាប់ដោះស្រាយ?
លោកជំទាវ ឡាយ រចនា អគ្គនាយិការរងជាន់ខ្ពស់នៃធនាគារ ជីបម៉ុង Commercial Bank បានលើកឡើងនូវចំណុចនេះថា ការរៀបចំផែនការហិរញ្ញវត្ថុគឺមានសារៈសំខាន់សម្រាប់មនុស្សគ្រប់គ្នា ជាពិសេសគឺបុគ្គលិកក្រុមហ៊ុនតែម្ដង។
លោកជំទាវបន្តថា មនុស្សភាគច្រើនបែងចែកចំណូល ចំណាយ តែនៅក្នុងការគិតប៉ុណ្ណោះ ដោយសារពួកគាត់គិតថា ការកត់ត្រាចំណូល ចំណាយ គឺជារឿងមិនចាំបាច់។ ម្យ៉ាងទៀត ពួកគេយល់ថា ប្រាក់ខែតិច កត់ត្រាទៅនាំតែស្មុគស្មាញទៅវិញទេ។
លោកជំទាវបានពន្យល់ថា៖
«ប្រាក់ខែតិចក៏ដោយ ច្រើនក៏ដោយ ការរៀបចំផែនការហិរញ្ញវត្ថុជាដំណើរការមួយដែលបង្រៀនយើងឱ្យមានវិន័យ ហើយការចាយវាយដោយគ្មានវិន័យនឹងនាំឱ្យយើងប្រឈមបញ្ហាជាច្រើន។ មិនត្រឹមតែប៉ុណ្ណោះ ការសន្សំអាចជួយបណ្ដុះវប្បធម៌ក្នុងការចេះគ្រោងរបស់មួយ កុំថាឡើយដល់ប្រាក់ចំណូលប្រចាំខែ សូម្បីមុននឹងទៅដើរលេងកន្លែងណា ក៏គេមិនអាចចេះតែទៅដោយមិនគិតអំពីថវិកានោះដែរ។ ជាក់ស្ដែង នៅពេលដើរលេងសប្បាយ គឺច្បាស់ជាចាយស្រួលៗ ដោយមិនបានគិតមុខក្រោយច្បាស់លាស់។ ផ្ទុយទៅវិញ ប្រសិនបើបានរៀបចំផែនការត្រឹមត្រូវ យ៉ាងហោចណាស់ គេអាចដឹងថា គេមិនអាចចាយលើសពីចំនួនណាមួយទេនៅក្នុងដំណើរកម្សាន្ដមួយនេះ។ បើមិនដូច្នោះ គេនឹងជួបវិបត្តិហិរញ្ញវត្ថុបន្ទាប់ពីដំណើរកម្សាន្ដ»។
អ្នកជំនាញដដែលបានសង្កត់ធ្ងន់ថា៖ ការសន្សំ គឺអាចការពារទៅលើការចំណាយដែលមិនបានគ្រោងទុក ហើយចំណាយមិនបានគ្រោងទុកនេះ វាធ្វើឱ្យពេលខ្លះរឿងដែលត្រូវសប្បាយ បែរជាមិនអាចសប្បាយបានទៅវិញ។
ក្នុងនាមជាអ្នកធ្វើការក្នុងវិស័យហិរញ្ញវត្ថុផ្ទាល់ និងជាបុគ្គលិកផង លោកជំទាវជឿថា នៅពេលមានលុយតិច ប៉ុន្តែបុគ្គលម្នាក់អាចចេះរៀបចំធ្វើគ្រោងចំណាយច្បាស់លាស់ ដូច្នេះនៅពេលណាដែលបុគ្គលនោះមានលុយច្រើន ក៏គេនៅតែចេះធ្វើផែនការហ្នឹងបានច្បាស់លាស់ដែរ។ យ៉ាងណាមិញលោកជំទាវបន្តគូសបញ្ជាក់ដែរថា ថ្វីត្បិតថាការសន្សំមិនមានអ្វីខុសឆ្គង ប៉ុន្តែក៏ត្រូវចេះសន្សំឱ្យត្រឹមត្រូវដែរ មិនមែនសន្សំរហូតដល់មិនហ៊ានដកចំណាយក្នុងគ្រាមានអាសន្ននោះទេ៕
Account
Security
Favourite Content