សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋាភិបាលបានលើកទឹកចិត្ត និងស្រោចស្រង់ឡើងវិញនូវអាជីវកម្មថ្មអារ ដែលអាជីវកម្មនេះស្ទើរតែដួលរលំទៅហើយ ខណៈវិស័យរ៉ែថ្មអារអាចផ្ដល់ចំណូលដល់រដ្ឋបានមួយកម្រិត ជាក់ស្ដែងកាលពីឆ្នាំ ២០២៤ កន្លងទៅ អាជីវកម្មនេះបានផ្ដល់ចំណូលប្រមាណ៩០លានដុល្លារអាមេរិក និងរំពឹងថា អាចផ្ដល់ចំណូលដល់រដ្ឋប្រមាណជិត១ពាន់លានដុល្លារអាមេរិកក្នុងមួយឆ្នាំនៅពេលអនាគត ។
អ្នកស្រី ឡេង ដាវី អនុប្រធានសមាគមអាជីវកម្មរ៉ែថ្មអារកម្ពុជា បានមានប្រសាសន៍ថា អាជីវកម្មថ្មអារនៅក្នុងខេត្តក្រចេះ ផ្ដោតលើការកែច្នៃសម្រាប់នាំចេញ ដោយផលិតផលដែលកែច្នៃរួចនៅតាមរោងចក្រនានានៅទូទាំងខេត្តក្រចេះ ប្រមាណជា ៩០ភាគរយត្រូវបាននាំចេញ និងមានតែ១០ភាគរយប៉ុណ្ណោះសម្រាប់ផ្គត់ផ្គង់ក្នុងស្រុក ។ ដោយឡែក សម្រាប់ទីផ្សារដែលនាំចេញច្រើនជាងគេនូវផលិតផលថ្មអាររបស់កម្ពុជា រួមមានប្រទេសចិន ប្រទេសវៀតណាម ប្រទេសអ៊ីតាលី កាណាដា និងបណ្តាប្រទេសមួយចំនួនទៀតនៅលើពិភពលោក ។
អ្នកស្រីបន្តថា ៖
«បច្ចុប្បន្ន នៅក្នុងខេត្តក្រចេះទាំងមូល មានរោងចក្រកែច្នៃថ្មអារសរុបចំនួនជាង៣០រោងចក្រ ដោយក្នុងមួយរោងចក្រអាចមានសមត្ថកិច្ចកែច្នៃថ្មអារចន្លោះពី ២ម៉ឺនម៉ែត្រការ៉េ ទៅ ៥ម៉ឺនម៉ែត្រការ៉េក្នុងមួយខែ ហើយអាចកែច្នៃបានលើសនេះបន្ថែមទៀតប្រសិនជាតម្រូវការទីផ្សារខាងក្រៅមានច្រើន ប៉ុន្តែបច្ចុប្បន្ននេះ ដោយសារបញ្ហាសេដ្ឋកិច្ចសកល ធ្វើឱ្យទីផ្សារផលិតផលថ្មអារនៅមានកម្រិតទាបនៅឡើយ »។
អ្នកស្រីបន្តទៀតថា ក្នុងឆ្នាំ ២០២៤កន្លងទៅនេះ អាជីវកម្មរ៉ែថ្មអារ ក្នុងប្រទេសកកម្ពុជា បានរកចំណូលជូនរដ្ឋបានប្រមាណ៩០លានដុល្លារអាមេរិក ហើយរំពឹងថាអាជីវកម្មនេះ នឹងអាចរកចំណូលកើនឡើង១០ដងបន្ថែមទៀតនៅពេលដែលមានការវិនិយោគកែច្នៃ និងនាំចេញនាពេលឆាប់ៗនេះ ដូច្នេះ វាអាចរកចំណូលបានរហូតដល់ជិត១ពាន់លានដុល្លារអាមេរិក ជាពិសេសនៅពេលមានការវិនិយោគថ្មីៗពីវិនិយោគិនក្នុង និងក្រៅប្រទេស ។ អ្វីដែលពិសេសនោះ រាជរដ្ឋាភិបាលក៏បានលើកទឹកចិត្តដល់អ្នកធ្វើអាជីវកម្មរ៉ែថ្មអារផងដែរ ដោយបានកំណត់ប្រភេទផលិតផលសម្រេច និងមិនជាប់ពន្ធ ។
ជាមួយគ្នានេះ អ្នកស្រីក៏បានរម្លឹកពីអាជីវកម្មមួយនេះដែលបានជួបបញ្ហាកាលអំឡុងវិបត្តិកូវីដ១៩ ព្រោះទីផ្សារនៅខាងក្រៅបានប្រឈមខ្លាំង ហើយអ្នកស្រីក៏បានស្នើទៅសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៅអំឡុងចុងឆ្នាំ២០២៣ សុំឱ្យរដ្ឋាភិបាលទទួលស្គាល់ថ្មអារសន្លឹកជាប្រភេទផលិតផលសម្រេច( មិនជាប់ពន្ធ) និងសុំសម្រួលបែបបទក្នុងការនាំចេញ ។ នៅទីបំផុត ត្រឹមរយៈពេលប្រមាណតែ១០ថ្ងៃ ស.ជ.ណ របស់ក្រសួងរ៉ែ និងថាមពលរដ្ឋ ក៏បានចេញប្រកាសបញ្ចុះអត្រាពន្ធ និងបានលើកទឹកចិត្តដល់វិស័យនេះ ធ្វើឱ្យវិស័យនេះចាប់ផ្ដើមរើបឡើងវិញ និងរំពឹងថាមានសន្ទុះកាន់តែខ្លាំង ។
លោក គង់ ស៊ីថា អគ្គនាយករងនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល បានមានប្រសាសន៍ថា ពាក់ព័ន្ធនឹងវិស័យរ៉ែថ្មអារនេះ រៀងរាល់ ២ឆ្នាំម្ដង ក្រសួងតម្រូវឱ្យម្ចាស់អាជីវកម្មទាំងអស់ដាក់ពាក្យស្នើសុំធ្វើអាជ្ញាបណ្ណថ្មី ដែលមានន័យថាអាជ្ញាបណ្ណនៃអាជីវកម្មរ៉ែថ្មអារ គឺមានសុពលភាពរយៈពេលតែ២ឆ្នាំប៉ុណ្ណោះ ហើយនៅក្នុងអំឡុងពេល២ឆ្នាំនោះដែរ ក្រួសួងស្ថាប័នពាក់ព័ន្ធទាំងអស់ ត្រូវចុះតាមដានជាប្រចាំពីសកម្មភាពរបស់ម្ចាស់អាជីវកម្ម ។
លោកបន្តថា សម្រាប់ធនធារ៉ែថ្មអារនៅក្នុងប្រទេសកម្ពុជាគឺមាននៅក្នុងខេត្តចំនួន១១ ប៉ុន្តែស្រុកស្នួល ខេត្តក្រចេះ ត្រូវបានចាត់ទុកថាជាតំបន់ដែលមានរ៉ែថ្មអារល្អ និងមានទីផ្សារជាងគេ ដូច្នេះ ហើយទើបមានការវិនិយោគ និងធ្វើអាជីវកម្មលើរ៉ែថ្មអារនេះច្រើន ។
លោកបានបន្ថែមថា ក្រោយមានការវិនិយោគ និងធ្វើអាជីវកម្មលើធនធានរ៉ែថ្មអារ រាជរដ្ឋាភិបាលទទួលបាននូវអត្ថប្រយោជន៍ជាច្រើន ក្នុងនោះរួមមានចំណូលរដ្ឋទាំងសារពើពន្ធ និងមិនមែនសារពើពន្ធ បង្កើតការងារជូនប្រជាពលរដ្ឋ ហើយនៅពេលមានការសាងសង់រោងចក្រកែច្នៃ ម្ចាស់ទីតាំងត្រូវសាងសង់ផ្លូវដឹកជញ្ជូន ប្រព័ន្ធទឹក ប្រព័ន្ធភ្លើង ដូច្នេះ បានចូលរួមចំណែកដល់ការអភិវឌ្ឍហេដ្ឋារចនាសម្ព័ន្ធជាមួយរាជរដ្ឋាភិបាល និងសកម្មភាពការងារសង្គមជាច្រើនទៀតរបស់ក្រុមហ៊ុនវិនិយោគនៅក្នុងតំបន់នោះ ៕
Account
Security
Favourite Content