ភ្នំពេញ៖ ក្រសួងទេសចរណ៍, រដ្ឋបាលរាជធានីភ្នំពេញ, ក្រុមហ៊ុនជីបម៉ុង និងភាគីពាក់ព័ន្ធ នាព្រឹកថ្ងៃទី០៣ ខែកញ្ញា ឆ្នាំ២០២៤ បានជួបប្រជុំពិភាក្សាគ្នានៅទីស្តីការក្រសួងទេសចរណ៍ ដើម្បីត្រួតពិនិត្យវឌ្ឍនភាពការងារត្រៀមសម្រាប់ព្រឹត្តិការណ៍ Gumball 3000 Rally in Cambodia ដែលនឹងប្រព្រឹត្តទៅនាថ្ងៃទី១៥-១៦ខែកញ្ញា ក្នុងរាជធានីភ្នំពេញ និងខេត្តសៀមរាប។

កិច្ចប្រជុំនេះ មានការអញ្ជើញចូលរួមពី ឯកឧត្តម គុជ បញ្ញាសា រដ្ឋលេខាធិការក្រសួងទេសចរណ៍, ឧកញ៉ា លាង ពៅ អគ្គនាយកពហុពាណិជ្ជកម្ម ក្រុមហ៊ុនជីបម៉ុង និងជាអនុប្រធាននៃគណៈកម្មការដើម្បីរៀបចំព្រឹត្តិការណ៍ Gumball 3000 និងឯកឧត្តម សុខ ពេញវុធ អភិបាលរងរាជធានីភ្នំពេញ។

នៅក្នុងជំនួបនោះ ឯកឧត្តម គុជ បញ្ញាសា រដ្ឋលេខាធិការក្រសួងទេសចរណ៍ បានមានប្រសាសន៍ថា៖ កិច្ចប្រជុំនេះ មានគោលបំណងពិនិត្យវឌ្ឍនភាពការងារ សន្តិសុខ សណ្តាប់ធ្នាប់ ទាក់ទងនឹងការរៀបចំត្រៀមរៀបចំព្រឹត្តិការណ៍Gumball 3000 នៅរាជធានីភ្នំពេញ។ ក្បួនរថយន្ត Gumball 3000 នឹងចេញដំណើរពីប្រទេសវៀតណាមនាថ្ងៃទី១៥ ខែកញ្ញា ឆ្នាំ២០២៤ ហើយឆ្លងកាត់តាមច្រកព្រំដែនបាវិត នាពេលរសៀលថ្ងៃដដែល និងអាចមកដល់រាជធានីភ្នំពេញនៅម៉ោង៤ ឬ ៤កន្លះ ដើម្បីចូលរួមការប្រគំតន្ត្រីដ៏ធំនៅមុខវត្តបុទុមវត្តី។

ឯកឧត្តមរដ្ឋលេខាធិការ បានបញ្ជាក់ថា ៖

«Gumball 3000 គឺដើម្បីជំរុញវិស័យទេសចរណ៍នៅកម្ពុជា និងកេរ្តិ៍ឈ្មោះរបស់ប្រទេសទៅកាន់ពិភពលោក ចូលរួមចំណែករៃអង្គាសថវិកាជូនមន្ទីរពេទ្យកុមារអង្គរខេត្តសៀមរាប ទាក់ទាញវិនិយោគគិនបរទេស និងការបង្កើតកំណត់ត្រាពិភពលោកហ្គីណេស ”ការចូលរួមចតរថយន្តច្រើនជាងគេនៅមុខប្រាសាទអង្គរវត្ត”។

ឯកឧត្តមបានលើកឡើងថា៖ ដើម្បីធានាសុខសុវត្ថិភាពភ្ញៀវ យើងត្រូវគិតគូរពីសន្តិសុខសណ្តាប់ធ្នាប់យ៉ាងហ្មត់ចត់ និងបានអំពាវនាវឱ្យមានការចូលរួមទាំងអស់គ្នា ព្រោះជាការងារប្រទេសជាតិ និងសូមការយោគយល់ពីប្រជាពលរដ្ឋ។វាមិនធម្មតាទេដែលGumball 3000 ជ្រើសរើសយកកម្ពុជា។

ឧកញ៉ា លាង ពៅ អគ្គនាយកពហុពាណិជ្ជកម្ម ក្រុមហ៊ុន ជីបម៉ុង បានថ្លែងអំណរគុណជូនប្រមុខរាជរដ្ឋាភិបាល រដ្ឋាភិបាល សាលារាជធានី អាជ្ញាធរមានសមត្ថកិច្ច ភាគីពាក់ព័ន្ធ និងប្រជាពលរដ្ឋដែលបានគាំទ្រព្រឹត្តិការណ៍នេះ ខណៈដែលព្រឹត្តិការណ៍សាកល្បងនាចុងខែសីហា (Pre -Event) ពិតជាអស្ចារ្យណាស់ ដោយមានការគាំទ្រ និងសាទរជាខ្លាំង។ អាជ្ញាធរមានសមត្ថកិច្ចបានយកចិត្តទុកដាក់បំផុត ដោយមាន Fan នៅតាមផ្លូវឈរចាំស្វាគម និងថតក្បួនរថយន្ត ដោយអារម្មណ៍រំភើប និងរីករាយ។

ឧកញ៉ា លាង ពៅ បានបន្តថា ៖ ព្រឹត្តិការណ៍នេះជាមុខមាត់របស់ជាតិ ហើយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីពេលថ្មីៗនេះក៏បានបង្ហាញអំពីព្រឹត្តិការណ៍ Gumball 3000 នៅលើផេកផ្លូវការរបស់សម្តេចផងដែរ។

ឯកឧត្តម សុខ ពេញវុធ អភិបាលរងរាជធានីភ្នំពេញ បានសន្យានឹងជួយធ្វើឱ្យព្រឹត្តិការណ៍ Gumball 3000 ប្រព្រឹត្តិទៅដោយសុវត្ថិភាពនិងដោយរលូន តាមរយៈការខិតខំនិងពង្រឹងសន្តិសុខ សណ្តាប់ធ្នាប់យ៉ាងយកចិត្តទុកដាក់។ សាលារាជធានី គាំទ្រយ៉ាងពេញទំហឹងចំពោះព្រឹត្តិការណ៍ Gumball 3000 និងមោទ​ន​ភាពដែលបានកម្មវិធីលំដាប់ពិភពលោកនេះ ជ្រើសរើសយកកម្ពុជា ជាពិសេសរាជធានីភ្នំពេញជាកន្លែងជួបជុំប្រារព្ធពិធី។

គួរជម្រាបថា ៖ ក្រសួងទេសចរណ៍សហការជាមួយក្រសួង-ស្ថាប័នពាក់ព័ន្ធ និងក្រុមហ៊ុន ជីប ម៉ុង រួមជាមួយ ផ្នែកឯកជន នឹងរៀបចំព្រឹត្តិការណ៍ “Gumball 3000 Rally in Cambodia” ចាប់ពីថ្ងៃទី១៥-១៧ ខែកញ្ញា ឆ្នាំ២០២៤ មានការចូលរួមពីរថយន្តប្រណិតៗប្រមាណ១៥០គ្រឿង បើកបរដោយបុគ្គលល្បីៗ ដ៏មានប្រជាប្រិយភាព មហាសេដ្ឋី និង តារាល្បីៗប្រមាណ២៥០នាក់មកពីជុំវិញពិភពលោក ដែលនឹងធ្វើដំណើរមកដល់កម្ពុជានៅថ្ងៃទី១៥ ខែកញ្ញា ឆ្នាំ២០២៤ តាមច្រកទ្វារព្រំដែនអន្តរជាតិបាវិត និងចាកចេញនៅថ្ងៃទី១៧ ខែកញ្ញា ឆ្នាំ២០២៤ តាមច្រកទ្វារព្រំដែនអន្តរជាតិប៉ោយប៉ែត ក្នុងឱកាសអបអរសាទរខួប ២៥ឆ្នាំនៃដំណើរកម្សាន្តរបស់ក្បួនរថយន្ត Gumball 3000 និងចូលរួមផ្សព្វផ្សាយយុទ្ធនាការ “ទស្សនាសៀមរាប ឆ្នាំ២០២៤” “ឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន ២០២៤” និង “ឆ្នាំទេសចរណ៍ កម្ពុជា-ឥណ្ឌា លើកទី១ ២០២៤” ស្របតាមយុទ្ធសាស្ត្របញ្ចកោណដំណាក់កាលទី១ និងគំនិតផ្តួចផ្តើមយុទ្ធសាស្ត្រ “បង្កើន៥ អភិវឌ្ឍ៣” របស់ក្រសួងទេសចរណ៍។

ក្រសួងទេសចរណ៍បានឱ្យដឹងផងដែរថា ព្រឹត្តិការណ៍ Gumball 3000 Rally នឹងមានរៀបចំកម្មវិធី (១) ប្រគុំតន្ត្រីដ៏ធំនៅរាជធានីភ្នំពេញ ថ្ងៃទី១៥ ខែកញ្ញា ឆ្នាំ២០២៤ ដោយមានការចូលរួមពីសិល្បៈករខ្មែរល្បីៗនៅកម្ពុជា រួមជាមួយតារាល្បីៗលំដាប់ពិភពលោក របស់ Gumball 3000 (២) ព្រឹត្តិការណ៍រៃអង្គាសថវិកាសប្បុរសធម៌សម្រាប់ បរិច្ចាគជូនមន្ទីរពេទ្យកុមារអង្គរខេត្តសៀម​រាប និង (៣) ព្រឹត្តិការណ៍បំបែកឯកត្តកម្មពិភពលោកហ្គីណេស (Guinness World Records) តំបន់រមណីយដ្ឋានវប្បធម៌ប្រវត្តិសាស្ត្រ ដែលមានរថយន្តទំនើបចតច្រើនជាងគេបំផុតលើពិភពលោក នៅថ្ងៃទី១៧ ខែកញ្ញា ឆ្នាំ២០២៤៕