សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បើតាមទំនៀមទម្លាប់របស់ជនជាតិចិន ឬជនជាតិខ្មែរដែលជាប់សែស្រឡាយចិន ជាធម្មតានៅថ្ងៃសែនចូលឆ្នាំចិននេះគេតែងតែរៀបចំម្ហូបអាហារ នំនេកជាច្រើនមុខ ដែលតម្រូវឱ្យមានការយកចិត្តទុកដាក់ក្នុងការចម្អិនដោយប្រើរយៈយូរ និងមានភាពនឿយហត់ផងដែរ ក៏ប៉ុន្តែបច្ចុប្បន្ននេះ ហាក់មានភាពងាយស្រួលជាងពេលមុនៗបន្តិចដោយសារតែមានអាជីវករដែលមានជំនាញផ្នែកចម្អិនម្ហូបអាហារ ជាពិសេសនៅតាមបណ្តាហាងអាហារដ្ឋាន ឬភោជនីយដ្ឋាន មួយចំនួន ចាប់ផ្តើមទទួលយកសេវាជួយរៀបចំចម្អិនអាហារ ដោយមានការរៀបចំជាឈុតសម្រាប់ដាក់សែនតែម្ដង។
ជាក់ស្ដែង អ្នកស្រី ទេព ទេពី ជាម្ចាស់ហាងគុយទាវសាច់ចិញ្ច្រាំ តារា សាខាបឹងស្នោរ បានឆ្លៀតឱកាសនេះមានទទួលធ្វើម្ហូបអាហារសម្រាប់ពិធីសែនព្រេនដល់បងប្អូនណាដែលចង់បាន ហើយមានជម្រើសជាមុខម្ហូប ឬជាឈុតទិញស្រាប់ៗតែម្ដង។
អ្នកស្រី ទេព ទេពី បានបញ្ជាក់ប្រាប់ AMS Economy ថា ៖
«ចំពោះម្ហូបអាហារសម្រាប់ពិធីសែននាឱកាសចូលឆ្នាំថ្មីប្រពៃណីចិន-វៀតណាមឆ្នាំនេះ យើងមានឈុតម្ហូប និងបង្អែមស្រាប់ៗចំនួន ៧មុខ រួមមាន មាន់ស្រែស្ងោរ ១ឈុត បង្គាឆាពងទាប្រៃ មីឆាសាច់ជ្រូកពងទា ចាយ៉រ ៣០គ្រាប់ បន្លែឆាផ្សិតខ្មៅ សម្លចាប់ឆាយ និងបង្អែមនំអ៊ី ដែលឈុតនេះមានតម្លៃ ១៣០ដុល្លារអាចដាក់សែនបានភា្លមៗ និងអាចទទួលទានបានដល់ទៅ ១០នាក់ ហើយក្រៅពីឈុតនេះ យើងក៏ទទួលកម្ម៉ង់ម្ហូបបន្ថែមផ្សេងទៀតដែលមានតម្លៃចាប់ពី ១០-៣៥ដុល្លារផងដែរ»។
អ្នកស្រីបន្តទៀតថា៖
«សម្រាប់ឆ្នាំនេះ យើងទទួលបានការកម្ម៉ង់ប្រមាណ ៥០ឈុត ដែលអ្នកកម្ម៉ង់ភាគច្រើនជាបងប្អូនរស់នៅរាជធានីភ្នំពេញផ្ទាល់តែម្ដង។ អតិថិជនយើងជាម៉ូយប្រចាំដែលតែងតែទុកចិត្តលើស្នាដៃរបស់ហាងយើង ដោយសារមុខម្ហូបមានរសជាតិឆ្ងាញ់ មានគុណភាព ប្រើវត្ថុធាតុដើមក្នុងស្រុក មានជាឈុត ហើយមានបរិមាណល្មមអាចទទួលទានក្នុងក្រុមគ្រួសារបាន ជាពិសេសគឺមានការដឹកជញ្ជូនបានទាន់ពេលផងដែរ»។
គួរបញ្ជាក់ដែរថា ចំពោះការទទួលចម្អិនអាហារសម្រាប់ពិធីសែននេះ គ្រាន់តែជាការបន្ថែមសេវាកម្មនៅតាមរដូវកាលដែលមានបុណ្យទានប៉ុណ្ណោះ ដោយឡែកសម្រាប់ថ្ងៃធម្មតា ភាគច្រើននៅតាមបណ្តាហាងអាហារដ្ឋាន ក៏ដូចជាភោជនីយដ្ឋាន នៅតែលក់ និងប្រកបអាជីវកម្មដូចដើម។ ៕
Account
Security
Favourite Content