សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
គាំទ្រផលិតផលខ្មែរ ថែសេដ្ឋកិច្ចជាតិ
ភ្នំពេញ ៖ នាថ្ងៃទី១៤ ខែធ្នូ ឆ្នាំ២០២៥ សហគ្រិនខ្មែរ ក្នុងកិច្ចសហការជាមួយផ្សារអុីអន បានបិទបញ្ចប់ ពិព័រណ៍ផលិតផលក្នុងស្រុក លើកទី១០ ដែលបានធ្វើឡើងរយៈពេលពីរសប្តាហ៍ចាប់ពីថ្ងៃទី១ ខែធ្នូ ដល់ថ្ងៃទី១៤ ខែធ្នូ នៅផ្សារអុីអនទាំង ៣ សាខា រួមមាន អុីអនភ្នំពេញ, សែនសុខ, និង មានជ័យ។
ពិព័រណ៍នេះបន្តបញ្ជាក់ពីកិច្ចខិតខំប្រឹងប្រែងរបស់សហគ្រិនខ្មែរក្នុងការពង្រឹងទីផ្សារក្នុងស្រុក និងលើកកម្ពស់ផលិតផលកម្ពុជា ឱ្យកាន់តែទូលំទូលាយ។ ពិព័រណ៍ក៏បានជំរុញការផ្សព្វផ្សាយ និងការប្រើប្រាស់ផលិតផលកម្ពុជា បង្កើនទំនុកចិត្តរបស់អ្នកប្រើប្រាស់ និងជួយបង្កើតទំនាក់ទំនងពាណិជ្ជកម្មថ្មីៗរវាងអ្នកផលិត និងអ្នកទិញ។ ពិព័រណ៍បានទាក់ទាញចំណាប់អារម្មណ៍ពីអតិថិជនជាតិ និងអន្តរជាតិដែលបានចូលរួមទិញផលិតផលពីសហគ្រិនក្នុងស្រុកជាង ៧០ សហគ្រាសដែលបង្ហាញពីសក្តានុពលនៃផលិតករជាតិ ក្នុងទីផ្សារទំនើប។
ឯកឧត្ដមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួកបន្ទុកជានាយកប្រតិបត្តិនៃសហគ្រិនខ្មែរ បានមានប្រសាសន៍ថា៖ «ចាប់តាំងពីឆ្នាំ២០២០មក រាជរដ្ឋាភិបាលតាមរយៈសហគ្រិនខ្មែរ បានបន្តគាំទ្រសហគ្រាសធុនតូច និងមធ្យមជាច្រើន ដោយការផ្តល់ជំនួយបច្ចេកទេស ហិរញ្ញប្បទានឥតសំណង និងវេទិកាភ្ជាប់ជាមួយទីផ្សារ ដើម្បីជួយ ឱ្យសហគ្រាសអាចបម្លែងសក្តានុពលរបស់ខ្លួន ទៅជាលទ្ធផលពាណិជ្ជកម្ម។ ពិព័រណ៍ផលិតផលក្នុងស្រុកលើកទី១០នេះ ជាផ្នែកមួយនៃកិច្ចខិតខំប្រឹងប្រែង ក្នុងការផ្តល់វេទិកាឱ្យផលិតករ អាចបង្ហាញផលិតផលរបស់ខ្លួន ដើម្បីភ្ជាប់ទំនាក់ទំនង ជាមួយដៃគូពាណិជ្ជកម្ម និងរួមចំណែកកសាងសេដ្ឋកិច្ចកម្ពុជាឱ្យមាន ភាពរឹងមាំ និងភាពប្រកួតប្រជែង»។
លោក ស៊ិន ពិសី អគ្គនាយក ក្រុមហ៊ុន អុីអន (ខេមបូឌា) បានមានប្រសាសន៌ថា៖ «ផ្សារទំនើបអុីអន មានកិត្តិយសក្នុងការបន្តកិច្ចសហការជាមួយសហគ្រិនខ្មែរ ក្នុងការផ្សព្វផ្សាយផលិតផលខ្មែរដែលមានគុណភាពខ្ពស់ ទៅកាន់អតិថិជនឲ្យបានកាន់តែ ទូលំទូលាយពីមួយឆ្នាំទៅមួយឆ្នាំ។ ក្នុងរយៈពេលប៉ុន្មានឆ្នាំមកនេះ យើងនៅតែបន្តប្តេជ្ញា ក្នុងការស្វែងរកទីផ្សារប្រកបដោយនិរន្តរភាពសម្រាប់ម្ចាស់សហគ្រាសនៅក្នុងស្រុក ដោយបញ្ចូលផលិតផលក្នុងស្រុកឲ្យបាន កាន់តែច្រើនទៅក្នុងផ្សារទំនើបរបស់យើង ក៏ដូចជារៀបចំការតាំងលក់ផលិតផលក្នុងស្រុកឲ្យបានកាន់តែច្រើនដូចជា ការតាំងពិព័រណ៍ផលិតផលក្នុងស្រុកនេះជាដើម។ ពិព័រណ៍ផលិតផលក្នុងស្រុកលើកទី១០ នេះឆ្លុះបញ្ចាំងពីការយកចិត្តទុកដាក់ របស់យើងក្នុងការគាំទ្រសេដ្ឋកិច្ចជាតិ ក៏ដូចជាបង្កើនការលក់ដល់សហគ្រាសធុនតូច និងមធ្យម។ យើងនឹងបន្តធ្វើការ យ៉ាងជិតស្និទ្ធជាមួយដៃគូរបស់យើង ដើម្បីពង្រឹងផលិតកម្មក្នុងស្រុក និងរួមចំណែកកសាងសេដ្ឋកិច្ចកម្ពុជា ឲ្យកាន់តែរីកចម្រើន។ ជាចុងក្រោយ ផ្សារទំនើប អុីអន សូមថ្លែងអំណរគុណ ចំពោះអតិថិជនដែលតែងតែបន្តក្នុងការគាំទ្រ ផ្សារទំនើបរបស់យើងខ្ញុំ»។
លោក គីមូរ៉ា អេអ៉ីស៊ុគេ អគ្គនាយកអធិការរបស់ ក្រុមហ៊ុន អុីអន ម៉ល (ខេមបូឌា) មានប្រសាសន៍ថា៖ «ពិព័រណ៍ក្នុងស្រុកនេះ បង្ហាញពីគោលការប្តេជ្ញារបស់ផ្សារទំនើប អុីអន ម៉ល ក្នុងការគាំទ្រទំនិញផលិតក្នុងស្រុក និងបង្កើនបទពិសោធន៍ទិញទំនិញរបស់អតិថិជន តាមរយៈការផ្តល់ជូននូវផលិតផលដែលមានគុណភាពខ្ពស់ពីសហគ្រាសតូច និងមធ្យមក្នុងស្រុក។ យើងនឹងបន្តបង្កើតកម្មវិធីផ្សេងៗ ដើម្បីឱ្យសហគ្រាសក្នុងស្រុកអាចបង្ហាញផលិតផលរបស់ខ្លួន បានកាន់តែទូលំទូលាយ តាមរយៈពិព័រណ៍ និងសហប្រតិបត្តិការនានា នៅពេលអនាគតផងដែរ»។
ពិព័រណ៍ឆ្នាំនេះក៏ជាសកម្មភាពសំខាន់មួយក្រោមយុទ្ធនាការប្រព័ន្ធអេកូឡូស៊ីសហគ្រិនភាពរបស់សហគ្រិនខ្មែរឆ្នាំ ២០២៥ ដែល ប្រមូលផ្តុំនូវកម្មវិធីជាច្រើនដែលដំណើរការស្របគ្នា – ពីការរៀបចំគំនិតអាជីវកម្មថ្នាក់ជាតិ ការចាប់ផ្ដើមអាជីវកម្ម និងការ ប្រកួតប្រជែង សហគ្រាសធុនតូច និងមធ្យម រហូតដល់វេទិកា ពិព័រណ៍ និងពិធីប្រគល់រង្វាន់ ដែលសហគ្រិនអាចទទួលបាន ចំណេះដឹង បណ្តាញ និងឱកាសដែលគាំទ្រដល់កំណើន និងនិរន្តរភាពរបស់ពួកគេ។
សូមបន្តគាំទ្រផលិតផលខ្មែរជាមួយគ្នា ពង្រឹងសេដ្ឋកិច្ចជាតិ និងជម្រុញសហគ្រិនក្នុងស្រុកឱ្យរីកចម្រើន!
Account
Security
Favourite Content