សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប៖ អ្នកជំនាញក្នុងវិស័យទេសចរណ៍ រំពឹងថា «យុទ្ធនាការបញ្ចុះតម្លៃសេវាកម្មទេសចរណ៍ខេត្តសៀមរាប ឆ្នាំ២០២៦» (Siem Reap Tourism Service Mega Sale) ដែលផ្តល់ការបញ្ចុះតម្លៃចាប់ពី ១០% ដល់ ៥០% នឹងជួយទាក់ទាញភ្ញៀវទេសចរបន្ថែម និងជំរុញសកម្មភាពទេសចរណ៍ក្នុងខេត្តសៀមរាប អំឡុងរដូវកាលបៃតង។
ក្រសួងទេសចរណ៍ បានចាប់ផ្តើមអនុវត្តសាកល្បងយុទ្ធនាការនេះ ចាប់ពីថ្ងៃទី១ ខែសីហា ដល់ថ្ងៃទី៣១ ខែតុលា ឆ្នាំ២០២៦ ដោយផ្តល់ការបញ្ចុះតម្លៃលើសេវាកម្មទេសចរណ៍របស់គ្រឹះស្ថានទេសចរណ៍កម្រិតចាប់ពីផ្កាយ៣ ដល់ផ្កាយ៥ នៅទូទាំងខេត្តសៀមរាប។ យុទ្ធនាការនេះមានគោលបំណងលើកកម្ពស់សកម្មភាពទេសចរណ៍ក្នុងអំឡុង Green Season និងលើកទឹកចិត្តឱ្យភ្ញៀវទេសចរមកកម្សាន្ត និងប្រើប្រាស់សេវាកម្មដែលមានការបញ្ចុះតម្លៃ។
ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានប្រាប់បណ្តាញសារព័ត៌មាន AMS នៅថ្ងៃទី៥ ខែសីហា ថា យុទ្ធនាការនេះជាផ្នែកមួយនៃការរួមចំណែកក្នុងយុទ្ធនាការ Green Season របស់កម្ពុជា។
ឯកឧត្តម តុប សុភ័ក បានមានប្រសាសន៍ថា៖
«កម្មវិធីនេះ គឺជាការរួមចំណែកមួយនៅក្នុងយុទ្ធនាការ រដូវកាលបៃតង (Green Season) របស់កម្ពុជា... សម្រាប់កម្មវិធីនេះ ភ្ញៀវទេសចរទាំងអស់អាចចូលទៅក្នុងគេហទំព័រ www.cambodiawonder.com ដើម្បីទទួលបានការបញ្ចុះតម្លៃពិសេសចាប់ពី ១០% ដល់ ៥០%»។
តាមរយៈគេហទំព័រនេះ ភ្ញៀវទេសចរអាចទទួលបានការបញ្ចុះតម្លៃលើសេវាកម្មស្នាក់នៅ ភោជនីយដ្ឋាន បារ ហាង ដឹកជញ្ជូន មគ្គុទ្ទេសក៍ទេសចរ ស្ប៉ា និងសេវាកម្មកញ្ចប់ទស្សនកិច្ច រួមទាំងកម្មវិធីទស្សនាថ្ងៃលិច។
ឯកឧត្តមបានបញ្ជាក់ថា ការជ្រើសរើសខេត្តសៀមរាបសម្រាប់ការសាកល្បងដំបូង មិនមានន័យថាយុទ្ធនាការនេះនឹងមានតែនៅខេត្តនេះទេ ហើយប្រសិនបើការសាកល្បងទទួលបានជោគជ័យ ក្រសួងនឹងពិចារណាពង្រីកទៅកាន់គោលដៅផ្សេងៗទៀតទូទាំងប្រទេស។
ឯកឧត្តម តុប សុភ័ក បានមានប្រសាសន៍ថា៖
«កម្មវិធីនេះមិនមែនធ្វើត្រឹមតែខេត្តសៀមរាបមួយទេ ប៉ុន្តែជាការសាកល្បងដំបូងនេះ យើងរៀបចំកម្មវិធីបញ្ចុះតម្លៃនេះនៅខេត្តសៀមរាប... បើការសាកល្បងនេះទទួលបានជោគជ័យ យើងនឹងពង្រីកទៅកាន់គោលដៅផ្សេងៗទៀតនៅក្នុងក្របខ័ណ្ឌទូទាំងប្រទេស»។
ឯកឧត្តមបានថ្លែងថា គិតត្រឹមថ្ងៃទី២ ខែសីហា មានអាជីវកម្មប្រមាណ ៦០ បានចូលរួមក្នុងយុទ្ធនាការនេះ ហើយចំនួននេះនៅតែបន្តកើនឡើង។ ការបញ្ចុះតម្លៃមិនមានអត្រាដូចគ្នាទាំងអស់នោះទេ ដោយអាស្រ័យលើប្រភេទសេវាកម្ម និងមូលដ្ឋានអាជីវកម្ម ខណៈការបញ្ចុះតម្លៃមានចន្លោះពី ១០% ដល់ ៥០%។ នេះបើយោងតាមការបញ្ជាក់របស់ឯកឧត្តម តុប សុភ័ក។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) បានប្រាប់ AMS នៅថ្ងៃទី៥ ខែសីហា ថា ការបញ្ចុះតម្លៃក្នុងរដូវកាលបៃតង គឺជារឿងដែលសណ្ឋាគារដែលមានវិជ្ជាជីវៈបានអនុវត្តជាទូទៅរួចមកហើយ ដោយបែងចែកតម្លៃសម្រាប់ Green Season និង High Season។
លោកបានចាត់ទុកការបញ្ចុះតម្លៃនេះថា ជាសញ្ញាវិជ្ជមានសម្រាប់ការផ្សព្វផ្សាយទេសចរណ៍ក្នុងស្រុក ហើយអាចជួយទាក់ទាញអ្នកដំណើរបុគ្គល ដែលមិនទិញកញ្ចប់ទេសចរណ៍ ឱ្យពេញចិត្តនឹងតម្លៃ និងអាចបន្តការស្នាក់នៅរបស់ពួកគេបាន។
លោក ធួន ស៊ីណាន បានលើកឡើងថា៖ ការបញ្ចុះតម្លៃនេះ ជាសញ្ញាវិជ្ជមានមួយ សម្រាប់ការផ្សព្វផ្សាយនៅក្នុងស្រុក... ទេសចរបុគ្គល (Individual Traveler) ដែលមិនមែនជាអ្នកដែលទិញកញ្ចប់ទេសចរណ៍ ពួកគាត់អាចមានការពេញចិត្តចំពោះការចុះថ្លៃ ឬក៏បន្តការស្នាក់នៅបន្ថែម។
លោកបានបន្តថា យុទ្ធនាការបញ្ចុះតម្លៃអាចទាក់ទាញភ្ញៀវក្នុងស្រុកបាន ប៉ុន្តែសម្រាប់ការធ្វើផែនការរយៈពេលវែង ការបញ្ចុះតម្លៃ និងប្រូម៉ូសិនគួរត្រូវបានផ្សព្វផ្សាយជាមុន ដើម្បីឱ្យភ្ញៀវអាចរៀបចំផែនការធ្វើដំណើរបាន។
លោកបានបញ្ជាក់ថា៖
«សម្រាប់រយៈពេលយូរ យើងពុំគួរមើលតែមួយជ្រុងទៅលើការបញ្ចុះតម្លៃទេ យើងត្រូវតែប្រឹងបង្កើតនូវផលិតផល ផ្សព្វផ្សាយនូវផលិតផលទេសចរណ៍ឱ្យបានទៅដល់គោលដៅដែលយើងចង់ធ្វើ... សម្រាប់ខ្ញុំ ខ្ញុំចង់ឱ្យយើងមើលរយៈពេលវែងប្រសើរជាងយើងធ្វើតែរយៈពេលខ្លី»។
លោក ធួន ស៊ីណាន ក៏បានសង្កេតឃើញថា ភ្ញៀវអន្តរជាតិទៅកាន់សៀមរាបក្នុងរដូវកាលបៃតងនៅមានចំនួនតិចតួច ខណៈសន្ទុះភ្ញៀវក្នុងស្រុកក៏មិនទាន់អាចប្រៀបធៀបជាមួយតំបន់សមុទ្រ ឬតំបន់ធម្មជាតិផ្សេងទៀតបាន។
លោកយល់ថា មូលហេតុមួយគឺការផ្សព្វផ្សាយសៀមរាបនៅតែផ្តោតខ្លាំងលើប្រាសាទបុរាណ ខណៈខេត្តនេះមានធនធានធម្មជាតិជាច្រើននៅជុំវិញទីរួមខេត្ត ដែលគួរត្រូវបានផ្សព្វផ្សាយបន្ថែម។
លោក ធួន ស៊ីណាន បានមានប្រសាសន៍ថា៖
«ការពិត សៀមរាប វាលើសអំពីតំបន់ប្រាសាទ។ ប៉ុន្តែ ការផ្សព្វផ្សាយរបស់យើង ផ្សព្វផ្សាយតែតំបន់ប្រាសាទ... យើងត្រូវតែប្រឹងបង្កើតនូវផលិតផល ផ្សព្វផ្សាយនូវផលិតផលទេសចរណ៍... ជាជាងដែលយើងមើលតែទៅលើចំណុចដែលរយៈពេលខ្លីៗ»។
លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា បានប្រាប់ AMS នៅថ្ងៃទី៥ ខែសីហា ថា ការដាក់ឱ្យប្រើប្រាស់យន្តការបញ្ចុះតម្លៃសេវាកម្មទេសចរណ៍ខេត្តសៀមរាប ឆ្នាំ២០២៦ គឺជាគំនិតល្អ និងអាចក្លាយជាសារផ្សព្វផ្សាយដ៏ទាក់ទាញសម្រាប់ភ្ញៀវទេសចរ ជាពិសេសប្រសិនបើការបញ្ចុះតម្លៃអាចឈានដល់ ៥០%។
លោកជំទាវ ឆាយ ស៊ីវលីន បានមានប្រសាសន៍ថា៖
«ការដាក់ឱ្យប្រើប្រាស់នូវយន្តការបញ្ចុះតម្លៃសេវាកម្មទេសចរណ៍ខេត្តសៀមរាប ឆ្នាំ២០២៦ នេះ គឺវាពិតជាល្អហើយ។ កាលណាមានយុទ្ធនាការអីកើតឡើងទាក់ទងទៅនឹងសេវាកម្មទេសចរណ៍ គឺជាសារផ្សព្វផ្សាយមួយទាក់ទាញ... ហើយបើអាចចុះរហូតទៅដល់ ៥០% អ៊ីចឹងមែន វាពិតជាទាក់ទាញខ្លាំង»។
ទោះជាយ៉ាងណា លោកជំទាវបានលើកឡើងថា ប្រសិនបើយុទ្ធនាការត្រូវបានដាក់ឈ្មោះថា ការបញ្ចុះតម្លៃសេវាកម្មទេសចរណ៍ គួរតែមានការចូលរួមពីភ្នាក់ងារទេសចរណ៍ ដែលជាអ្នករៀបចំកញ្ចប់ទស្សនកិច្ច ដើម្បីធ្វើឱ្យការបញ្ចុះតម្លៃមានភាពពេញលេញជាងមុន។
លោកជំទាវបានពន្យល់ថា ការចូលរួមរបស់សេវាករទាំងអស់ គួររួមមានសេវាស្នាក់នៅ ដឹកជញ្ជូន ភ្នាក់ងារទេសចរណ៍ និងអ្នករៀបចំកញ្ចប់ទេសចរណ៍ ដើម្បីឱ្យភ្ញៀវអាចទទួលបានអត្ថប្រយោជន៍ពីការបញ្ចុះតម្លៃជាកញ្ចប់។
លោកជំទាវ ឆាយ ស៊ីវលីន បានគូសបញ្ជាក់ថា៖
«កាលណាយើងធ្វើការបញ្ចុះតម្លៃអ្វីមួយ ត្រូវទាញឱ្យសេវាករទាំងអស់ជាកញ្ចប់ឱ្យចូលរួមជាមួយគ្នា អាហ្នឹងទើបវាមានប្រសិទ្ធភាព ហើយអ្នកខាងសេវាកម្មស្នាក់នៅក៏ចុះតម្លៃ សេវាកម្មដឹកជញ្ជូនក៏ចុះ សេវាកម្មរៀបចំកញ្ចប់ក៏ចុះ ហ្នឹងបានវាមើលឃើញថាការចូលរួមជាមួយគ្នា ទើបការផ្សព្វផ្សាយនេះវាបានទៅដល់អ្នកប្រើប្រាស់ផ្ទាល់»។
លោកជំទាវបានស្នើឱ្យក្រសួងទេសចរណ៍កៀរគរឱ្យមានការចូលរួមពីគ្រប់សេវាករទេសចរណ៍ រួមមានភ្នាក់ងារទេសចរណ៍ សេវាដឹកជញ្ជូនផ្លូវគោក ផ្លូវទឹក ផ្លូវអាកាស និងសេវាស្នាក់នៅ ដើម្បីបង្កើនភាពទាក់ទាញ និងប្រសិទ្ធភាពនៃយុទ្ធនាការ។
លោកជំទាវបានបញ្ជាក់ថា៖
«និយាយរួម យុទ្ធនាការបញ្ចុះតម្លៃនេះ គួរតែក្រសួងធ្វើការកៀរគរឱ្យមានការចូលរួមពីគ្រប់សេវាករទាំងអស់... អ៊ីចឹង ទើបអាចធ្វើឱ្យយុទ្ធនាការបញ្ចុះតម្លៃនេះវាមានភាពទាក់ទាញ ហើយទទួលបានជោគជ័យ»៕
Account
Security
Favourite Content