សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កសិកម្មចម្រុះ សម្ដៅលើការដាំដុះដំណាំផ្សេងៗច្រើនមុខ ច្រើនប្រភេទលើដីតែមួយ ហើយទទួលបានកសិផលក៏ច្រើនមុខដូចគ្នា ក្នុងនោះ ការអនុវត្តកសិកម្មចម្រុះសមស្របតាមបច្ចេកទេសក៏អាចជួយដល់កសិករតាមរយៈការទទួលបានកសិផលធម្មជាតិ មិនប៉ះពាល់សុខភាព ថែមទាំងអាចពង្រីកការដាំដុះ និងលក់កសិផលទៅលើទីផ្សារដើម្បីរកចំណូលប្រចាំថ្ងៃបានដោយមិនបាច់ធ្វើចំណាកស្រុក។
ជាក់ស្ដែង អ្នកស្រី សួស សារ៉េត ជាកសិករក្នុងសហគមន៍កសិកម្ម គុណវុឌ្ឍិល្បើក ស្ថិតនៅភូមិត្រពាំងថ្ម ឃុំល្បើក ស្រុកឈូក ខេត្តកំពត ក៏ជាសមាជិកក្នុងគម្រោងលើកកម្ពស់សន្តិសុខស្បៀងអាហារូបត្ថម្ភ និងជីវភាពដល់គ្រួសារក្រីក្ររបស់អង្គការ Helen Keller បានឱ្យថា តាមរយៈការចូលរួមជាសមាជិកក្នុងគម្រោងនេះ អ្នកស្រីទទួលបានផលចំណេញច្រើន ទាំងផ្នែកច្ចេកទេស រាប់ចាប់ពីការបណ្ដុះបណ្ដាលពីការជ្រើសរើសពូជ ការផលិតជី ការដាំ និងថែទាំបន្លែ ការស្រោចស្រព ទទួលបាននូវពូជបន្លែ ជីធម្មជាតិ ដែលអ្នកស្រីអាចដាំបន្លែហូបខ្លួនឯងបានគ្រប់គ្រាន់ និងអាចលក់កសិផលរកចំណូលបានដោយមិនចាំបាច់ទៅទីក្រុងដើម្បីស៊ីឈ្នួលគេធ្វើការដូចមុននោះទេ។
អ្នកស្រីបញ្ជាក់ថា៖
«ពីមុនដាំជាលក្ខណៈគ្រួសារគ្រាន់សម្រាប់ហូប ទទួលផលបានតិច តែពេលចូលគម្រោងរបស់អង្គការ Helen Keller ទទួលបានផលគ្រាន់បើជាងមុន។ អង្គការនេះមានគ្រូបង្គោលគាត់បង្ហាត់បង្ហាញពីការលាយជី ការដាំ ឥឡូវយើងទទួលបានផលល្អ មានចំណូលចូលរាល់ថ្ងៃ ខណៈដែលគ្រាមុនយើងអត់មានចំណូលទេ ត្រូវចំណាកស្រុកទៅធ្វើការឱ្យគេ តែឥឡូវយើងបាននៅផ្ទះក៏មានចំណូលចូលប្រចាំថ្ងៃ ដោយមានម៉ូយមកទិញដល់ផ្ទះខ្លះ ដឹកឱ្យគេខ្លះ និងលក់ឱ្យអ្នកក្នុងភូមិខ្លះ មួយថ្ងៃអាចបានពី ៨-៩ម៉ឺនរៀល»។
ជាការកត់សម្គាល់ បច្ចុប្បន្ននេះ អ្នកស្រីមានដាំត្រសក់ សណ្ដែកកួរ និងត្រប់ ដោយដាំវិលជុំ ក្រោមការព្រឹក្សារបស់គ្រូបង្គោលពីរដូវកាល ឬខែណាគួរដាំបន្លែអ្វីឱ្យសមស្របតាមអាកាសធាតុ ក៏ដូចជាការស្រោចបន្លែដោយប្រើទុយោតំណក់ដែលអាចសន្សំសំចៃទឹក និងចំណេញពេលវេលា និងអាចប្រមូលផលបន្លែពី ៣០-៥០គីឡូក្រាមប្រចាំថ្ងៃ។
ចំពោះការដាំបន្លែដោយខ្លួនឯងនេះដែរ កសិករខាងលើបន្ថែមថា ការដាំបន្លែខ្លួនឯង ហូបខ្លួនឯងនេះវាល្អចំពោះសុខភាព មិនមានបង្កជាជំងឺផ្សេងៗ ហើយកសិករដទៃទៀតក៏គួរងាកមកដាំបន្លែសុវត្ថិភាពនេះដែរ។ ដោយឡែកការដាំបន្លែមិនមែនចេះតែដាំនោះទេ អ្នកដាំក៏ត្រូវការយល់ដឹងពីបច្ចេកទេស ការជ្រើសរើសពូជ ការបណ្ដុះកូន ក៏ដូចជាស្រោចស្រពទើបអាចទទូលបានផលល្អ។
គួរបញ្ជាក់ដែរថា អ្នកស្រី សារ៉េត បានចូលរួមជាសមាជិកគម្រោងលើកកម្ពស់សន្តិសុខស្បៀង អាហារូបត្ថម្ភ និងជីវភាពដល់គ្រួសារក្រីក្រ កាលពីខែឧសភា ឆ្នាំ២០២៣ ដោយចាប់ផ្ដើមពីការដាំលើទំហំដី ១០x៣០ម៉ែត្រ លុះទទួលបានផលល្អជាបន្តបន្ទាប់ អ្នកស្រីក៏បានពង្រីកទំហំដីបាន ៣០x៣០ម៉ែត្រ ហើយអនាគតអ្នកស្រីក៏មានគម្រោងចង់ពង្រីកការដាំដុះបន្ថែមទៀត ដូចជា ដាំម្ទេស ត្រប់ស្រួយ និងប៉េងប៉ោះថែមទៀតផងដែរ៕
Account
Security
Favourite Content