(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសស្វាគមន៍ និងគាំទ្រ​ពេញ​ទំហឹងចំពោះការរៀបចំព្រឹត្តិការណ៍ជួបជុំក្បួនរថយន្តអន្តរជាតិ «Gumball 3000 Rally» លើទឹកដី​កម្ពុជា ដែលរៀបចំដោយក្រុមហ៊ុន «Gumball 3000» នៅខែកញ្ញា ឆ្នាំ២០២៤ខាងមុខនេះ។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី០៩ ខែសីហា ឆ្នាំ២០២៤ បានអនុញ្ញាតឱ្យលោក Maximillion Cooper ស្ថាបនិក និងជានាយកប្រតិបត្តិនៃក្រុមហ៊ុន Gumball 3000 ចូលជួបសម្តែង​ការ​គួរសម និងជម្រាបព័ត៌មានមួយចំនួនពាក់ព័ន្ធការរៀបចំព្រឹត្តិការណ៍ជួបជុំក្បួនរថយន្តអន្តរជាតិ​នៅលើ​ទឹកដីកម្ពុជា។

ក្នុងជំនួបសម្តែងការគួរសមនេះ លោក Maximillion Cooper បានបង្ហាញអំពីចំណាប់អារម្មណ៍​ចំពោះ​វប្បធម៌​សម្បូរណ៍បែប ភាពស្រស់ស្អាតនៃប្រាង្គប្រាសាទនានា និងសុខសន្តិភាពនៅកម្ពុជាផងដែរ។

ក្រុមហ៊ុន Gumball 3000 ត្រូវបានបង្កើតឡើងក្នុងឆ្នាំ១៩៩៩ ដោយជនជាតិអង់គ្លេស គឺជាម៉ាកយីហោ​ដ៏ល្បី​ផ្តោត​លើកការរៀបចំព្រឹត្តិការណ៍ ការកម្សាន្ត និងរបៀបរស់នៅបែបប្រណិតភាព។ នៅក្នុងឱកាសខួប២៥ឆ្នាំនៃថ្ងៃកំណើតរបស់ខ្លួន ក្រុមហ៊ុន Gumball 3000 នឹងរៀបចំព្រឹត្តិការណ៍ជួបជុំក្បួន​រថយន្ត​កម្រិតអន្តរជាតិ «Gumball 3000 Rally» ដោយមានអ្នកចូលរួមសុទ្ធសឹងជាបុគ្គលល្បីៗ មកពីជាង​៥០​ប្រទេស។ ព្រឹត្តិការណ៍នេះ នឹងការឆ្លងកាត់នៅប្រទេសកម្ពុជា ក្នុងខែកញ្ញា ឆ្នាំ២០២៤ ខាងមុខ​នេះផងដែរ។

សម្តេចធិបតី ហ៊ុន ម៉ាណែត បានស្វាគមន៍ និងគាំទ្រការរៀបចំព្រឹត្តិការណ៍អន្តរជាតិដ៏ធំនេះនៅកម្ពុជា។ សម្តេចធិបតី បានបញ្ជាក់ថា អាជ្ញាធរ និងដៃគូពាក់ព័ន្ធកម្ពុជាត្រៀមខ្លួនជាស្រេចក្នុងការសម្របសម្រួល និងចូលរួមក្នុងព្រឹត្តិការណ៍នេះ​ ព្រមទាំងត្រៀមបដិសណ្ឋារកិច្ច​ដ៏កក់ក្តៅ និងការស្វាគមន៍យ៉ាងរាក់ទាក់​​របស់ប្រជាជនខ្មែរ​​។

សម្តេចធិបតី ក៏បានអរគុណមូលនិធិ Gumball 3000 Rally ដែលបានចូលរួមចំណែកក្នុងការគាំទ្រ​ដល់​មន្ទីរពេទ្យកុមារអង្គរ និងគ្រោងជួយសាលាបណ្តុះបណ្តាលកីឡានៅកម្ពុជា​។

សូមបញ្ជាក់ថា ព្រឹត្តិការណ៍ Gumball 3000 Rally In Cambodia គឺជាព្រឹត្តិការណ៍អន្តរជាតិមួយដ៏ធំ ដោយមានប្រមូលផ្ដុំរថយន្តទំនើបៗ និងបុគ្គលមានឥទ្ធិពល​ជាច្រើនរូប ដែលធ្វើដំណើរឆ្លងកាត់ពីប្រទេស​មួយ​ទៅប្រទេសមួយ គ្រប់ទ្វីបជុំវិញពិភពលោក។ ចំពោះការមកដល់កម្ពុជា ជាព្រឹត្តិការណ៍ដ៏អស្ចារ្យមិនធ្លាប់មាននោះឡើយ។ ក្នុងព្រឹត្តិការណ៍នេះ នឹង​មាន​ការដាក់តាំងបង្ហាញរថយន្តទំនើបៗ អមជាមួយការប្រគំតន្ត្រីខ្នាតយក្ស ដែលរៀបចំឡើងដោយក្រុមហ៊ុន​យក្ស ជីប ម៉ុង សហការជាមួយក្រសួងទេសចរណ៍កម្ពុជា។

ព្រឹត្តិការណ៍នេះ មានរយៈពេល៣ថ្ងៃ គឺចាប់ពីថ្ងៃទី១៥-១៧ ខែកញ្ញា ឆ្នាំ២០២៤ ដោយរៀបចំឡើង​នៅ​រាជធានីភ្នំពេញ និង ខេត្តសៀមរាប។

ព្រឹត្តិការណ៍កម្រិតអន្តរជាតិមួយនេះ មានក្នុងគោលបំណងសំខាន់ចំនួន៤ គឺ ការជំរុញវិស័យ​ទេសចរណ៍​នៅកម្ពុជា ការចូលរួមចំណែកក្នុងសប្បុរសធម៌ ការបើកឱកាសរវាងអ្នកវិនិយោគទុនឯកជនបរទេស និង​នៅក្នុងស្រុកបានជួបគ្នា និងការបង្កើតកំណត់ត្រាពិភពលោកផងដែរ៕