សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងស្ថានភាពនៃវិស័យអចលនទ្រព្យនៅកម្ពុជា មិនទាន់មានភាពប្រសើរឡើង និងដើម្បីសម្រួលបន្ទុកដល់ប្រជាពលរដ្ឋ ក៏ដូចជាការសម្រួលដល់ការធ្វើបណ្ណកម្មសិទ្ធិ រាជរដ្ឋាភិបាលបានសម្រេចលើកលែង និងអនុគ្រោះពន្ធលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យទៅតាមលក្ខខណ្ឌមួយចំនួន។ នេះបើតាមសេចក្ដីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុនៅថ្ងៃទី ០៤ ខេសីហា ឆ្នាំ២០២៦ ។
យោងតាមសេចក្ដីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុ បានបង្ហាញពីវិធានការរបស់រាជរដ្ឋាភិបាល តាមរយៈការលើកលែង និងអនុគ្រោះផ្នែកពន្ធដារ ដោយក្នុងនោះរួមមាន ផ្ដល់ការអនុគ្រោះព្យួរការអនុវត្តពន្ធបន្ថែមចំពោះការយឺតយ៉ាវក្នុងការបង់ពន្ធប្រថាប់ត្រា ដែលត្រូវទទួលរងពិន័យស្មើនឹង១០០% នៃប្រាក់ពន្ធដែលត្រូវបង់ ចំពោះដីកាអម ឬដីកាបញ្ជូនហួសរយៈពេល៣ខែនៃកាលបរិច្ឆេទដែលចេញពីមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានី-ខេត្តរហូតដល់ដំណាច់ឆ្នាំ២០២៧ ។
ក្នុងសេចក្ដីជូនដំណឹងដដែលនេះ រាជរដ្ឋាភិបាលក៏បានអនុញ្ញាតពន្យារសុពលភាពនៃសេចក្ដីដំណឹងលេខ ៣៦៧ សជណ ចុះថ្ងៃទី០២ ខែឧសភា ២០១៧ របស់ទីស្ដីការគណៈរដ្ឋមន្ត្រី ដោយអនុញ្ញាតឱ្យបង់ពន្ធប្រថាប់ត្រាតែមួយដងលើកចុងក្រោយ ចំពោះករណីអចលនទ្រព្យដែលមានសាវតារផ្ទេរសិទ្ធិកាន់កាប់បន្តដៃគ្នាច្រើនដង ត្រឹមដំណាចខែកក្កដា ឆ្នាំ ២០២៦ ។ រដ្ឋាភិបាលក៏បានអនុញ្ញាតឱ្យបង់ពន្ធប្រថាប់ត្រា និងពន្ធលើអចលនទ្រព្យលើសំណង់ចុងក្រោយ ដោយគ្រាន់តែមានលិខិតអនុញ្ញាតសាងសង់ដោយអាជ្ញាធរមានសមត្ថកិច្ចពាក់ព័ន្ធលើកាលបរិច្ឆេទសាងសង់ ។ លើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យដែលម្ចាស់កម្មសិទ្ធិជាយោធិន និងនគរបាលជាតិ ដែលចូលរួមក្នុងសមរភូមិជួរមុខ ដោយមានការបញ្ជាក់អត្តសញ្ញាណ និងតួនាទីភារកិច្ចពីអង្គភាពសាមី ។
ក្រសួងសេដ្ឋកិច្ច និងហិរញ្ញវត្ថុក៏បានអំពាវនាវឱ្យប្រជាពលរដ្ឋទាំងអស់ដែលជាម្ចាស់អចលនទ្រព្យ មានឯកសារកំពុងដំណើរការនៅមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានី-ខេត្ត ឬនៅរដ្ឋបាលសារពើពន្ធ សូមមេត្តារួសរាន់ទៅបំពេញបែបបទ និងនីតិវិធីនៃការចុះបញ្ជីដីធ្លី និងបង់ពន្ធប្រថាប់ត្រាលើការផ្ទេរសកម្មសិទ្ធិ ឬសិទ្ធិកាន់កាប់អចលនទ្រព្យ ឬពន្ធលើអចលនទ្រព្យដើម្បីអាចទទួលបានបណ្ណកម្មសិទ្ធិបានឆាប់រហ័ស ។
លោក វ៉ា វណ្ណា អគ្គនាយកក្រុមហ៊ុនអចលនទ្រព្យ Propertydia បានប្រាប់បណ្ដាញព័ត៌មាន AMS ឱ្យដឹងថា យោងតាមលិខិតរបស់ក្រសួងសេដ្ឋកិច្ច និងហិរញ្ញវត្ថុ បានបង្ហាញថា ការបង់ពន្ធប្រថាប់ត្រា និងពន្ធមួយចំនួនដែលចែងនៅក្នុងលិខិត គឺនៅតែបន្តបង់ ពោល គឺលើកលែងក្នុងករណីតិចតួចប៉ុណ្ណោះ ។
លោកបន្តថា ៖
«អ្វីដែលសំខាន់នៅក្នុងលិខិតនេះ គឺលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យតែចំពោះយោធិន ឬនគរបាលជាតិ ដែលចូលរួមក្នុងសមរភូមិជួរមុខប៉ុណ្ណោះ ដោយឡែក សម្រាប់ប្រជាពលរដ្ឋទូទៅផ្សេងទៀត ត្រូវបំពេញកាតព្វកិច្ចដដែល»។
លោកបានបញ្ជាក់ឱ្យដឹងទៀតថា ការអនុគ្រោះរបស់រាជរដ្ឋាភិបាលដែលបានចែងក្នុងសេចក្ដីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុ គឺដើម្បីពន្លឿនដល់ពលរដ្ឋដែលនៅជាប់ឯកសារនៅមន្ទីររៀបចំដែនដី នគរូបនីយកម្ម សំណង់ និងសុរិយោដី អាចទៅដកឯកសាររបស់ខ្លួន ហើយយកទៅបង់ពន្ធនៅអគ្គនាយកដ្ឋានពន្ធដារ និងត្រូវបានលើកលែងមិនមានការផាកពិន័យនោះទេ » ៕
Account
Security
Favourite Content