សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ សហរដ្ឋអាមេរិក និងអ៊ីស្រាអែល បានឈានដល់កិច្ចព្រមព្រៀងជាមួយរដ្ឋាភិបាលអន្តរកាលរបស់ប្រទេសស៊ីរី ដើម្បីអនុញ្ញាតឱ្យក្រុមអធិការកិច្ចអន្តរជាតិប្រមូលយកសារធាតុវិទ្យុសកម្មចេញពីទីតាំងនុយក្លេអ៊ែរសម្ងាត់មួយនៅក្នុងប្រទេសនេះ។
បើយោងតាមមន្ត្រីអាមេរិក និងអ៊ីស្រាអែល ដែលត្រូវបានសម្រង់សម្ដីដោយកាសែតរុស្សី RTបានបញ្ជាក់ថា ក្រោមលក្ខខណ្ឌនៃកិច្ចព្រមព្រៀងនេះ ក្រុមអធិការកិច្ចមកពីទីភ្នាក់ងារថាមពលបរមាណូអន្តរជាតិហៅកាត់ថា IAEA នឹងត្រូវបានអនុញ្ញាតឱ្យចូលទៅកាន់ទីតាំងសម្ងាត់មួយដែលគេស្គាល់ថាជា Site 99 មានផ្ទុកនូវសារធាតុដែលពាក់ព័ន្ធនឹងរោងចក្រនុយក្លេអ៊ែរ Al-Kibar ដែលធ្លាប់ត្រូវបានអ៊ីស្រាអែលវាយប្រហារតាមអាកាសកម្ទេចចោលកាលពីអំឡុងឆ្នាំ២០០៧។
សារធាតុដែលត្រូវបានរក្សាទុកនោះ ត្រូវបានរាយការណ៍ថា ជាម្សៅអ៊ុយរ៉ាញ៉ូមលឿង (Yellowcake) ដែលជាម្សៅអ៊ុយរ៉ាញ៉ូមកំហាប់ខ្ពស់ ប្រើប្រាស់ក្នុងដំណាក់កាលដំបូងនៃការផលិតប្រេងឥន្ធនៈនុយក្លេអ៊ែរ។ យ៉ាងណាក៏ដោយ ទោះបីជាម្សៅអ៊ុយរ៉ាញ៉ូមលឿងនេះ មិនអាចយកទៅផលិតជាក្បាលគ្រាប់នុយក្លេអ៊ែរដោយផ្ទាល់ក៏ដោយ តែអ្នកជំនាញបានព្រមានថា វាអាចបង្កឱ្យមានការបំពុលដោយវិទ្យុសកម្មយ៉ាងធ្ងន់ធ្ងរប្រសិនបើវាត្រូវបានបំបែកដោយប្រើប្រាស់រំសេវផ្ទុះធម្មតា ដែលគេស្គាល់ថាជា Dirty Bomb។
ក្តីកង្វល់ផ្នែកសន្តិសុខជុំវិញទីតាំងនេះ បានកើនឡើងយ៉ាងខ្លាំងនៅក្នុងខែធ្នូ ឆ្នាំ២០២៤ បន្ទាប់ពីការដួលរលំនៃរបបដឹកនាំរបស់ប្រធានាធិបតីស៊ីរី លោក Bashar al-Assad ដែលផ្តួលដោយកងកម្លាំងប្រឆាំងរដ្ឋាភិបាលនៅក្នុងប្រទេស។ ភ្លាមៗបន្ទាប់ពីកងកម្លាំងប្រឆាំងបានវាយដណ្តើមយកទីក្រុងដាម៉ាស កងកម្លាំងអ៊ីស្រាអែលបានបើកការវាយប្រហារតាមអាកាសលើផ្លូវចូលទៅកាន់ Site99 ដើម្បីរារាំងកុំឱ្យចូលទៅកាន់ទីតាំងដ៏គ្រោះថ្នាក់នេះ។ បន្ទាប់មក មន្ត្រីអ៊ីស្រាអែលបានព្រមានថា ការវាយប្រហារបន្ថែមនឹងត្រូវធ្វើឡើង ប្រសិនបើមានក្រុមណាមួយព្យាយាមប្រមូលយក ឬប្រើប្រាស់សារធាតុទាំងនោះ។ដូច្នេះ តាមកិច្ចព្រមព្រៀងនេះគេកត់សម្គាល់ឃើញថា ជាការវិវត្តន៍ផ្នែកទូតដ៏សំខាន់មួយសម្រាប់មេដឹកនាំថ្មីរបស់ស៊ីរី គឺលោក Ahmed al-Sharaa។ ជាការកត់សម្គាល់ ចាប់តាំងពីពេលឡើងកាន់អំណាចលោកបានខិតខំប្រឹងប្រែងកសាងទំនាក់ទំនងការទូតឡើងវិញជាមួយបណ្តាប្រទេសលោកខាងលិច និងស្វែងរកជំនួយអន្តរជាតិ ដើម្បីគាំទ្រដល់ការកសាងប្រទេសឡើងវិញក្រោយសង្គ្រាម។ ក្រៅពីកិច្ចសហប្រតិបត្តិការលើសុវត្ថិភាពនុយក្លេអ៊ែរ រដ្ឋបាលថ្មីនៅទីក្រុងដាម៉ាស ក៏ត្រូវបានគេរាយការណ៍ថាកំពុងធ្វើការលើក្របខ័ណ្ឌសន្តិសុខទូលំទូលាយជាមួយអ៊ីស្រាអែលផងដែរ៕
Account
Security
Favourite Content