សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ នៅក្នុងអំឡុងខែមេសា ដែលជារដូវនៃពិធីបុណ្យចូលឆ្នាំថ្មីប្រពៃណីខ្មែរ ក៏ជារដូវកាលដែលប្រជាពលរដ្ឋនៅតាមសហគមន៍មួយចំនួនទទួលបានចំណូលពីការប្រមូលអនុផលព្រៃឈើផងដែរ ដូចជាការបេះ ផ្លែគុយ សិរមាន់ ផ្លែគូលេនព្រៃ និងផ្លែព្រុសជាដើម។
លោក ឡុង ណេត ជាអនុប្រធានសហគមន៍ភ្នំទ័ពជាង ស្ថិតនៅភូមិព្រះអង្គកែវ និងភូមិបាក់អង្រុត ឃុំដងពែង ស្រុកស្រែអំបិល ខេត្តកោះកុងបានឱ្យដឹងថា សហគមន៍របស់លោកមានសមាជិកប្រមាណជាង១៣ នាក់(៧គ្រួសារ) ដែលប្រមូលអនុផលព្រៃឈើរួមមាន ផ្លែគុយ ផ្លែសិរមាន់ និងផ្លែឈើដទៃទៀត ប៉ុន្តែឆ្នាំនេះ អ្នកប្រមូលទិញត្រូវការតែផ្លែគុយមួយមុខប៉ុណ្ណោះដោយផ្តល់តម្លៃខ្ពស់ជាងអនុផលព្រៃឈើដទៃ។
លោក ឡុង ណេត បានបញ្ជាក់ថា ដោយសារតែផ្លែគុយពិបាករក ប្រជាសហគមន៍មួយចំនួនបានបង្វែរទៅរកផ្លែសំរងវិញ ព្រោះឆ្នាំនេះសំបូរផ្លែសំរងជាងគេ ប៉ុន្តែទោះជាយ៉ាងណាក៏ការប្រមូលផ្លែគុយ គិតចាប់តាំងពីខែកុម្ភៈរហូតមកប្រជាពលរដ្ឋអាចរកបេះបានជាបន្តបន្ទាប់ ដោយម្នាក់អាចប្រមូលបានចំនួនប្រមាណ ៧គីឡូក្នុង១ថ្ងៃ ។
លោក ឡុង ណេត បានឱ្យដឹងទៀតថា ផ្លែគុយដែលប្រជាសហគមន៍ប្រមូលបបាន មានអ្នកមកប្រមូលទិញទាំងអស់ ដោយក្នុង១ គីឡូក្រាម លក់បានប្រមាណ ពី ១៥០០០ រៀល ទៅ ១៧០០០ រៀល សម្រាប់ការបោះដុំ។ បើគិតតែក្នុងខែមីនា សរុបទាំងអស់គ្នាបានប្រមាណជាង២តោន (២៧៣០គីឡូក្រាម) ដែលចំនួននេះមិនបានគិតពីខែកុម្ភៈ និងការប្រមូលនៅតែបន្តដល់ដំណាច់ខែមេសា ។
លោកបានបញ្ជាក់ថា ការទៅរកបេះផ្លែគុយនេះគឺវាមិនងាយស្រួលនោះទេ ជួនកាលផ្សងនឹងគ្រោះថ្នាក់ក៏មានដែរ ចំណែកការធ្វើដំណើរវិញ គឺត្រូវតែក្រោកពីព្រឹក បើមិនដូច្នោះ អ្នកនៅភូមិផ្សេងៗក៏ទៅរកបេះដូចគ្នា។ ក្រៅពីការប្រមូលអនុផលផ្លែឈើទាំងនេះហើយ ពលរដ្ឋសហគមន៍ក៏នៅមានអនុផលផ្សេងទៀត ដូចជា ផ្សិត និងរុក្ខជាតិហូតស្លឹកផ្សេងៗទៀត ដែលប្រជាសហគមន៍អាចប្រមូលបាន និងអាចជួយបន្ថែមចំណូលដល់ជីវភាពរបស់អ្នកស្រុក។
ដោយឡែក នៅឯខេត្តកំពង់ធំវិញ បងប្អូនប្រជាពលរដ្ឋខ្មែរភាគច្រើនក៏និយមចូលចិត្តបរិភោគផ្លែគុយដែរ ខណៈអ្នកលក់ផ្លែគុយនៅតាមដងផ្លូវជាតិលេខ៦ដាក់តាំងលក់ក្នុងតម្លៃចាប់ពី ១៤០០០រៀល ទៅ ១៦ ០០០រៀល ក្នុងមួយគីឡូក្រាម ឬនៅតំបន់ខ្លះលក់ក្នុងតម្លៃ ១៨.០០០រៀល រហូតដល់ ២០.០០០រៀលក្នុងមួយគីឡូក្រាម ក៏មានដែរ។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានប្រាប់ AMS ឱ្យដឹងថា ការទទួលផលពីអនុផលព្រៃឈើនៅតំបន់រមណីយដ្ឋានអង្គរ ប្រជាពលរដ្ឋនៅក្នុងសហគមន៍បានចាប់ផ្តើមលក់តាំងពីខែកុម្ភៈមកម៉្លេះ ដោយអ្នកខ្លះលក់តាមកញ្ច្រែង និងចងភ្ជួរជាចង្កោមៗ នៅតាមផ្លូវក្នុងតំបន់អង្គរ និងតាមផ្លូវកូម៉ៃជាដើម ដោយក្នុង១ គីឡូក្រាម តម្លៃ ៣០ ០០០ រៀល ទៅ ៣៥ ០០០ រៀល ។
យោងតាមក្រសួងបរិស្ថាន ផ្លែគុយ គឺជាឈ្មោះឈើតូចមានដើមជាវល្លិ៍ ផ្លែមានរសផ្អែមលាយជូរ ប្រើជាអាហារបាន។ រុក្ខជាតិ«គុយ» ជារុក្ខជាតិមួយប្រភេទដែលដុះតោងដើមឈើធំៗ ក្នុងព្រៃក្រាស់ ដុះនៅព្រៃស្រោង និងមានតិចតួចនៅតាមព្រៃរបោះ។ វាជារុក្ខជាតិព្រៃដុះដោយឯកឯង មានដុះដោយកន្លែងនៅតាមតំបន់មួយចំនួននៃកម្ពុជាយើង ជាពិសេសគឺតំបន់ភ្នំគូលែនខេត្តសៀមរាប។ ផ្លែឈើព្រៃនេះ ឱ្យផលចាប់ពីខែកុម្ភៈ រហូតដល់ចុងខែមេសា ឬដើមខែឧសភា។ បើទោះបីជាវាជាផ្លែឈើព្រៃ តែវាក៏មានការនិយមចូលចិត្តទាំងបណ្ដាអ្នកនៅតាមជនបទ និងទីក្រុង ព្រោះតែឱជារសឆ្ងាញ់ និងអត្ថប្រយោជន៍ខ្ពស់របស់វារហូតដល់គេហៅវាថាជាស្ដេចនៃផ្លែឈើព្រៃ៕
Account
Security
Favourite Content