ភ្នំពេញ ៖ រាជរដ្ឋាភិបាលកម្ពុជា និងវិស័យឯកជនបាន និងកំពុងយកចិត្តទុកដាក់ និងជំរុញការនាំចេញគ្រាប់ស្វាយចន្ទីឱ្យបានច្រើនជាងគេនៅលើពិភពលោកនាពេលខាងមុខ។ ទន្ទឹមនឹងនេះ សមាគមស្វាយចន្ទីកម្ពុជាក៏រំពឹងថាកម្ពុជានឹងក្លាយជាប្រទេសដែលមានគ្រាប់ស្វាយចន្ទីល្អ និងឆ្ងាញ់ជាងគេផងដែរ។

ក្នុងដំណើរទស្សនកិច្ចរបស់អ្នកសារព័ត៌មានដើម្បីឈ្វេងយល់ពីខ្សែច្រវាក់តម្លៃផលិតកម្មគ្រាប់ស្វាយចន្ទីនៅក្រសួងកសិកម្ម រុក្ខាប្រមាញ់ និងនេសាទ លោក ស៊ុយ កុកធាន អនុប្រធានសមាគម ស្វាយចន្ទី កម្ពុជា បានលើកឡើងថា ការដាក់ផែនការក្លាយជាអធិរាជស្វាយចន្ទី គឺជាចំណុចល្អបំផុត។ តាមរយៈការខិតខំលើកស្ទូយលើវិស័យស្វាយចន្ទី ក៏ដូចជាការចូលរួមទាំងរាជរដ្ឋាភិបាល ជាពិសេសក្រសួងកសិកម្ម រុក្ខាប្រមាញ់ និងនេសាទ, វិស័យឯកជន លោករំពឹងថាកម្ពុជានឹងអាចក្លាយជាប្រទេសដែលមានគុណភាពគ្រាប់ស្វាយចន្ទីល្អជាងគេ និងរសជាតិឆ្ងាញ់ជាងគេក្នុងពិភពលោក។

ទោះបីយ៉ាងណា អនុប្រធានសមាគមស្វាយចន្ទីកម្ពុជារូបនេះលើកឡើងដែរថា ៖

«ទន្ទឹមនឹងកម្ពុជាមានស្វាយចន្ទីល្អ និងគុណភាពល្អជាគេនេះដែរ យើងនៅខ្វះខាតចំណុចតិចតួចមួយគឺកែច្នៃគ្រាប់ចន្ទីដ៏ល្អរបស់យើងនេះឱ្យទៅជាផលិតផលមួយស្តង់ដា និងអាចទទួលយកបានក្នុងទីផ្សារអន្តរជាតិ។ម្យ៉ាងទៀតការប្រែប្រួលអាកាសធាតុ ជាបញ្ហាដែលមិនអាចគ្រប់គ្រង ខណៈ បច្ចេកទេស ដាំដុះមិនមែនជាបញ្ហាចោទឡើយ។ ពេលនេះកម្ពុជាយើងបានចាប់ផ្តើមចេញដំណើរហើយ គឺតាមរយៈកម្ពុជាបានចូលរួមសន្និសីទស្វាយចន្ទីនៅទីក្រុងឌុបបៃគឺ គេអបអរខ្លាំងណាស់ ដោយសារកម្ពុជាបានជាប់ជាប្រទេសដែលមានគ្រាប់ផ្លែចន្ទីដ៏ល្អនៅឆ្នាំ២០២១»។

លោកបន្តថា ៖

«នេះជាជំហ៊ានដ៏ល្អមួយ ហើយវាស្របនឹងរាជរដ្ឋាភិបាល កម្ពុជាអាណត្តិមុន មានមហិច្ឆតា ក្នុងទិស ដៅ លើក ស្ទួយប្រទេសកម្ពុជាដែលមានស្វាយចន្ទីច្រើនជាងគេ និងមានគុណភាពល្អជាងគេលើពិភពលោកផងដែរ។ នាពេលនេះមានការបង្កើនដីចំនួន ៥០ហិកតានៅខេត្តកំពង់ធំទៅជាកន្លែងកសិឧស្សហកម្មស្វាយចន្ទី។ នាពេលនេះគេបានទាក់ទាញអ្នកវិនិយោគទុនពីប្រទេសសិង្ហបុរីដែលបានបោះទុនលើកទី១ ខ្ទង់១២លានដុល្លារ ដើម្បីបង្កើតរោងចក្រកែច្នៃគ្រាប់ចន្ទីឱ្យបាន៤០ម៉ឺនតោនក្នុងមួយថ្ងៃ។ក្រៅពីនេះក៏មានក្រុមហ៊ុនមួយចំនួនទៀតក៏បានកំពុងសហការដើម្បីកែច្នៃគ្រាប់ចន្ទីនេះផងដែរ។ ទន្ទឹមជាមួយគ្នានេះក៏មានឧកញ៉ាជាច្រើននៅកម្ពុជាកំពុងចាប់អារម្មណ៍ វិនិយោគលើស្វាយចន្ទីថែមទៀត»។

លោកជំទាវ អ៊ឹម រចនា មន្រ្តីនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹង គ្រាប់ផ្លែស្វាយចន្ទីកម្ពុជាកំពុងមានការគាំទ្រនៅប្រទេសជប៉ុន។ ជាមួយគ្នានេះ បើតាមការសាកសួរព័ត៌មានបានបង្ហាញថា គ្រាប់ផ្លែស្វាយចន្ទីកម្ពុជាបើប្រៀបធៀបជាមួយគ្រាប់ស្វាយចន្ទីប្រទេសផ្សេងៗទៀតឃើញថាគ្រាប់ស្វាយចន្ទីកម្ពុជាមានរសជាតិឆ្ងាញ់ គ្រាប់ធំគុណភាពល្អ។ គ្រាប់ស្វាយចន្ទីកម្ពុជាចាប់ផ្តើមទទួលការគាំទ្រច្រើនពីសំណាក់ពលរដ្ឋជប៉ុន និងមានដាក់លក់តាមទីផ្សារធំៗនៅជប៉ុនថែមទៀត។

ដោយឡែក ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានថ្លែងថាក្នុងពិធីនេះដែរថា ដំណាំស្វាយចន្ទីកម្ពុជាគឺជាដំណាំមានកេរ្តិ៍ឈ្មោះល្បី និង ជាពិសេសមានការទទួលស្គាល់គុណភាពដ៏ល្អមួយផង។

គួរបញ្ជាក់ថា សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជានាកន្លងមកធ្លាប់បានបញ្ជាក់ថា នាពេលអនាគត សម្តេចចង់ធ្វើឱ្យកម្ពុជាក្លាយទៅជាប្រទេសអធិរាជស្វាយចន្ទី ពោលគឺជាប្រទេសដែលនាំចេញគ្រាប់ស្វាយចន្ទីច្រើនជាងគេនៅលើពិភពលោក៕ ដោយៈញ៉ែម សុផល