ថាមពលកកើតឡើងវិញមានសារសំខាន់ណាស់ក្នុងការថែរក្សាបរិស្ថាន ដូច្នេះហើយទើបកម្ពុជាបានអភិវឌ្ឍន៍ថាមពលអគ្គិសនីកកើតឡើងវិញជាបន្តបន្ទាប់ដើម្បីផ្គត់ផ្គង់នៅក្នុងប្រទេសកម្ពុជា
ភ្នំពេញ ៖ ថាមពលកកើតឡើងវិញមានសារសំខាន់ណាស់ក្នុងការថែរក្សាបរិស្ថាន ដូច្នេះហើយទើបកម្ពុជាបានអភិវឌ្ឍន៍ថាមពលអគ្គិសនីកកើតឡើងវិញជាបន្តបន្ទាប់ដើម្បីផ្គត់ផ្គង់នៅក្នុងប្រទេសកម្ពុជា ដែលគិតមកដល់ពេលនេះ កម្ពុជាមានប្រភពអគ្គិសនីកកើតឡើងវិញប្រមាណ៦២ភាគរយ និងតាំងចិត្តសម្ដេចឱ្យបាន៧០ភាគរយនៅឆ្នាំ២០៣០ ។ នេះបើតាមប្រសាសន៍សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីបិទស្ទឹងសាងសង់ទំនប់វារីអគ្គិសនីស្ទឹងតាតៃលើ នៅព្រឹកថ្ងៃទី៣០ ខែវិច្ឆិកា ឆ្នាំ២០២៣។
សម្ដេចធិបតី ហ៊ុន ម៉ាណែត បានមានប្រសាសន៍ថា ក្នុងពេលប្រទេសកម្ពុជាកំពុងអភិវឌ្ឍន៍អគ្គិសនីកកើតឡើងវិញបានកាន់តែច្រើន ប្រទេសមួយចំនួនក្នុងតំបន់មានប្រភពអគ្គិសនីកកើតឡើងវិញតិចតួចនៅឡើយ ។ កម្ពុជាក៏បានសិក្សាអភិវឌ្ឍប្រព័ន្ធស្តុកថាមពលទុក ដើម្បីមានលទ្ធភាពបង្កើនការប្រើប្រាស់ប្រភពថាមពលកកើតឡើងវិញ ដែលប្រែប្រួល និងឡើងចុះលឿនមិនទៀងទាត់ទៅតាមកត្តាធម្មជាតិ ។ ការអភិវឌ្ឍប្រព័ន្ធនេះ ក៏ដើម្បីជំរុញការធ្វើព្យាក្រឹតភាពកាបូនក្នុងវិស័យថាមពល ។
សម្ដេចធិបតីបានបញ្ជាក់ថាសន្តិសុខ និងឯករាជ្យថាមពលអគ្គិសនី គឺជាទិសដៅរបស់រាជរដ្ឋាភិបាលត្រូវតែពង្រឹង និងពង្រីក ។ រាជរដ្ឋាភិបាលបានត្រៀមថវិកា១០០លានដុល្លារអាមេរិក សម្រាប់ជួយទប់ទល់ការឡើងថ្លៃអគ្គិសនី ។
សម្ដេចធបតី បានប្រកាសបញ្ឈប់គម្រោងអភិវឌ្ឍរោងចក្រផលិតអគ្គិសនីដុតធ្យូងថ្ម អានុភាព៧០០មេហ្កាវ៉ាត់ នៅស្រុកបុទុមសាគរ ខេត្តកោះកុង ដោយឱ្យក្រសួងរ៉ែនិងថាមពល ពិភាក្សាជាមួយក្រុមហ៊ុនវិនិយោគ ពិនិត្យលទ្ធភាពប្តូរគម្រោងវិនិយោគផលិតអគ្គិសនីដុតធ្យូងថ្មនេះ ទៅជាគម្រោងផលិតអគ្គិសនីដុតឧស្ម័ន ដែលបំភាយឧស្ម័នកាបូនតិចតួចវិញ។
សម្ដេចក៏បានលើកទឹកចិត្តដល់ប្រជាពលរដ្ឋខ្មែរ ប្រើប្រាស់យានយន្តអគ្គិសនី ព្រោះថាការប្រើប្រាស់យានយន្តអគ្គិសនី ជួយបបង្កើនប្រសិទ្ធភាពនៃការប្រើប្រាស់ថាមពល ដោយសារតែការប្រើម៉ូទ័រអគ្គិសនី គឺមានប្រសិទ្ធភាពជាងការប្រើម៉ូទ័រឥន្ធនៈ ។
សម្ដេចបានលើកទឹកចិត្តដល់វិនិយោគិនឱ្យមកបណ្ដាក់ទុនវិនិយោគបន្ថែមទៀត នៅក្នុងវិស័យថាមពល ជាពិសេសវិស័យថាមពលកកើតឡើងវិញ និងវិនិយោគលើហេដ្ឋារចនាសម្ព័ន្ធគាំទ្រ ដូចជាស្ថានីយ៍បញ្ចូលថាមពលអគ្គិសនីជាដើម ៕