ស្ពៃក្រញាញ់ ជាប្រភេទបន្លែបៃតងមួយដែលផ្ទុកទៅដោយជីវជាតិល្អៗ និងត្រូវបានដាំដោយប្រជាកសិករជាច្រើនស្ទើរទូទាំងប្រទេស។ ដោយឡែកកាលពីពេលថ្មីៗ ទីផ្សារស្ពៃក្រញាញ់បានជួបនឹងបញ្ហាជន់ច្រើនលើសពីតម្រូវការជាក់ស្ដែង ដែលធ្វើឱ្យតម្លៃធ្លាក់ចុះមកនៅត្រឹមប្រមាណ ៥០០រៀល ក្នុងមួយគីឡូក្រាម ដែលជាតម្លៃទាបបំផុតមិនធ្លាប់មាន ដែលធ្វើឱ្យប្រជាកសិករជាអ្នកដាំដុះទទួលរងនូវការខាតបង់យ៉ាងខ្លាំង។ ដោយមើលឃើញពីបញ្ហាប្រឈមទាំងនេះ មានក្រុមហ៊ុនក្នុងស្រុកមួយបានសិក្សាពីលទ្ធភាព និងបច្ចេកទេសកែច្នៃ ដោយយកស្ពៃក្រញាញ់ទាំងនោះទៅចម្រាញ់ និងផលិតជាសាប៊ូជាច្រើនប្រភេទ ដែលមានគុណប្រយោជន៍ក្នុងការប្រើប្រាស់ប្រចាំថ្ងៃ ប្រកបដោយគុណភាពខ្ពស់ ស្របតាមស្តង់ដារត្រឹមត្រូវ ជាពិសេស បានចូលរួមកាត់បន្ថយការខាតបង់របស់កសិករដោយផ្ទាល់។  

អ្នកស្រី នុត សម្ផស្ស ជាអគ្គនាយិការក្រុមហ៊ុន LSV Industry ដែលគេស្គាល់ដំបូងគឺផលិតផលសាប៊ូ OKA ហើយថ្មីៗនេះ បានដាក់ចេញនូវផលិតផលថ្មីលក់នៅលើទីផ្សារ គឺសាប៊ូផលិតចេញពីស្ពៃក្រញាញ់ ក្រោមយីហោ Empress។

អ្នកស្រីបានបញ្ជាក់ថា​​៖

«គម្រោងផលិតសាប៊ូច្នៃចេញពីស្ពៃក្រញាញ់នេះកើតឡើងដោយចៃដន្យ ពោលគឺនៅពេលដែលបងប្អូនកសិករជួបប្រទះបញ្ហាទីផ្សារ ហើយឃើញថា កសិផលទាំងនោះអាចច្នៃជាផលិតផលថែរក្សារាង្គកាយបាន យើងក៏ប្រមូលទិញស្ពៃដែលគ្មានទីផ្សារទាំងនោះមកកែច្នៃឱ្យទៅជាផលិតផលថ្មី មានប្រយោជន៍ចំពោះសុខភាពស្បែក ដូចជា សាប៊ូដែលអាចប្រើប្រាស់ប្រចាំថ្ងៃបាន និងចៀសវាងការបោះស្ពៃចោលផងដែរ»។

អ្នកស្រីបន្ថែមថា៖

«ជំហានដំបូងយើងទិញស្ពៃពីកសិករប្រមាណ ១៥តោន យកមកពីតាមបណ្តាភូមិមួយចំនួន និងតាមសហគមន៍នានាដើម្បីសាកល្បងកែច្នៃ ចម្រាញ់ និងផលិតជាសាប៊ូទឹកដុសខ្លួន សាប៊ូកក់សក់ និងសាប៊ូលាងមុខ។ ជាលទ្ធផលឃើញថា មានភាពវិជ្ជមាន ហើយក៏បន្តទិញកសិកផលស្ពៃក្រញាញ់ពីកសិករជាដើម្បីបង្កើនការផលិតឱ្យក្លាយជាផលិតផលធម្មជាតិដោយរោងចក្រកូនខ្មែរ អិលអេសវី អ៊ិនដាស់ស្ទ្រី ដែលមានស្តង់ដា ISO, GMP & HALAL »។

អ្នកស្រីបានបន្តឱ្យដឹងថា សម្រាប់ទីផ្សារ និងការគាំទ្រវិញឃើញថាសាប៊ូស្ពៃក្រញាញ់នេះមានទីផ្សារល្អ ក្រោមការគាំទ្រពីបងប្អូនប្រជាជនខ្មែរក្នុងស្រុកច្រើនគួរសម ហើយបច្ចុប្បន្ន ក្រុមហ៊ុនក៏កំពុងរៀបចំដំណើរការចែកចាយឱ្យបានរៀបរយនៅតាមបណ្តាទីផ្សារ ក៏ដូចជាហាងលក់ទំនិញនានានៅទូទាំងប្រទេស។ នៅពេលដែលផលិតផលធម្មជាតិ សាប៊ូ ស្ពៃក្រញាញ់នេះទទួលបានការគាំទ្រកាន់តែច្រើន នោះនឹងជួយលើកកម្រិតជីវភាពរបស់ប្រជាកសិករដែលជាអ្នកដាំដុះ ក៏ដូចជាក្រុមការងារដែលធ្វើការនៅក្នុងរោងចក្រកែច្នៃសាប៊ូស្ពៃក្រញាញ់ផងដែរ។

ឆ្លៀតនៅក្នុងឱកាសជាមួយគ្នានេះ អ្នកស្រី នុត សម្ផស្ស ជាអគ្គនាយិការក្រុមហ៊ុន LSV Industry បានលើកឡោះងដែរថា ចំពោះបច្ចេកទេសនៃការផលិត វាមិនមែនជារឿងលំបាកសម្រាប់ក្រុមហ៊ុនខាងលើនេះទេ ដោយសារមានអ្នកបច្ចេកទេស និងជំនាញក្នុងការកែច្នៃច្បាស់លាស់ ជាពិសេសមានឧបករណ៍ និងម៉ាស៊ីនត្រឹមត្រូវដែលអាចធានាបាននូវគុណភាពរបស់ផលិតផលបានយ៉ាងប្រាកដ។  

គួរបញ្ជាក់ដែរថា ផលិតផលសាប៊ូស្ពៃនេះមានអត្ថប្រយោជន៍ជាច្រើន ព្រោះស្ពៃក្រញាញ់មានផ្ទុកទៅដោយវីតាមីនចម្រុះ និងសារធាតុរ៉ែ ដែលជួយជំនួយដល់ស្បែក ព្យាបាលការរលាក ហើយការយកវត្ថុធាតុដើមល្អៗមកកែច្នៃជាផលិតផលប្រើជាប្រយោជន៍ដល់ស្បែកនេះក៏អាចចាត់ទុកជាការដាក់អាហារល្អៗជំនួយស្បែកផងដែរ។ ដោយឡែក ពាក់ព័ន្ធនឹងគម្រោងនាពេលអនាគត អ្នកស្រី នុត សម្ផស្ស ក៏បានប្រាប់ដែរថា ក្រុមហ៊ុននឹងបង្កើនការផលិតនូវផលិតផលផ្សេងទៀត ដូចជា ហ្វូមលាងមុខ និងម៉ាសបិតមុខ ដែលច្នៃចេញពីស្ពៃក្រញាញ់នេះតែម្ដង ព្រោះក្រៅពីបានចូលរួមចំណែកក្នុងការបង្កើនការងារ ក៏ដូចជាជួយដល់កសិករដែលជាអ្នកដាំដុះ ថែមទាំងអាចបង្ហាញពីលទ្ធភាពរបស់ក្រុមហ៊ុនក្នុងស្រុកដែលអាចរកែច្នៃកសិផលទៅជាផលិតផលសម្រេចដាក់លក់នៅលើទីផ្សារ និងឈានទៅរកការប្រកួតប្រជែងជាមួយផលិតផលដែលនាំចូលផងដែរ៕