ភ្នំពេញ ៖ ផ្តើមចេញពីអាជីវកម្មកែច្នៃត្រីងៀតលក់ជាលក្ខណៈគ្រួសារនៅតាមផ្សារមួយចំនួនក្នុងរាជធានីភ្នំពេញ និងតាមអនឡាញ (បណ្តាញសង្គមហ្វេសប៊ុក) ក្រោមគោលជំហរនៃភាពស្មោះត្រង់ ផលិតផលត្រីងៀតមានរសជាតិឆ្ងាញ់ និងមានតម្លៃសមរម្យ បានជំរុញឱ្យសិប្បកម្មត្រីងៀតទួលគោក មានឱកាសពង្រីកខ្លួនបានកាន់តែធំ វិសាលភាពទីផ្សារទូលំទូលាយរហូតទទួលបានការបញ្ជារទិញពីទីផ្សារនៅក្រៅប្រទេសថែមទៀតផង។

កញ្ញា ជា មួយហូរ ម្ចាស់សិប្បកម្មកែច្នៃត្រីងៀតទួលគោកបានឱ្យដឹងថា កាលពីប៉ុន្មានឆ្នាំមុន អាជីវកម្មកែច្នៃ និងផលិតត្រីងៀតនេះធ្វើឡើងសម្រាប់តែលក់ជាលក្ខណៈគ្រួសារតែប៉ុណ្ណោះ ក្រោយមកដោយសារតែមានការគាំទ្រពីសំណាក់អតិថិជនកាន់តែច្រើន ជាពិសេសក្នុងអំឡុងពេលកូវីដតែម្ដង ដែលមានការកុម្ម៉ង់ទិញតាមអនឡាញច្រើន រហូតមានពេលខ្លះមិនមានត្រីសម្រាប់ភ្ញៀវនោះទេ ព្រោះការកែច្នៃត្រូវបានធ្វើឡើងជាលក្ខណៈគ្រួសារនៅឡើយ ហាលនឹងកំដៅថ្ងៃ មិនមានប្រើម៉ាស៊ីនកំដៅ ឬសម្ងួតនោះឡើយ។

កញ្ញាបានបញ្ជាក់ថា ៖

«ត្រីដែលកែច្នៃជាងៀតទាំងអស់គឺសុទ្ធតែជាត្រីធម្មជាតិដែលខ្ញុំទិញពីប្រជានេសាទនៅបឹងទន្លេសាប ទាំងនៅក្នុងខេត្តកំពង់ឆ្នាំង និងនៅខេត្តកំពង់ធំ។ សម្រាប់ត្រីងៀតនេះទៀតសោតមានប្រភេទងៀតត្រីរ៉ស់ ត្រីឆ្តោ ត្រីកន្ធរ ត្រីអណ្តែង ត្រីឆ្លូញ ត្រីកញ្ចុះ ត្រីកន្ត្រងប្រេង និងត្រីផ្ទោងជាដើម ហើយក្រៅពីត្រីងៀត ខ្ញុំក៏មានធ្វើផ្អក ប្រហុក ម៉ាំ ត្រីឆ្អើរ ត្រីប្រាហើម សាច់ក្រក សាច់ជ្រូកផាត់ និងងៀតគោផងដែរ»។

ម្ចាស់សិប្បកម្មកែច្នៃត្រីរូបនេះបានបន្តឱ្យដឹងទៀតថា ចំពោះអតិថិជនដែលគាំទ្រត្រីងៀត និងត្រីឆ្អើរ ភាគច្រើនជាអ្នករស់នៅរាជធានីភ្នំពេញ ហើយក៏មានការកុម្ម៉ង់ទិញពីបណ្តាខេត្តមួយចំនួនផងដែរ ដូចជា ខេត្តតាកែវ កំពត ព្រះសីហនុ កោះកុង និងកំពង់ស្ពឺ ដែលជាទូទៅ ក្នុងមួយថ្ងៃអាចលក់បានចន្លោះពី ៣០ ទៅ ៤០គីឡូក្រាម ។ ដោយឡែក សម្រាប់ការបញ្ជារទិញនៅក្រៅប្រទេសរួមមាន ប្រទេសជប៉ុន កាណាដា អូស្ត្រាលី កូរ៉េ បារាំង ហើយក៏មានបងប្អូនប្រជាជនខ្មែរដែលរស់នៅសហរដ្ឋអាម៉េរិកផងដែរ។ ចំពោះអតិថិជនដែលកុម្ម៉ង់នៅក្រៅប្រទេស សិប្បកម្មខាងលើនេះមានការវេចខ្ចប់យ៉ាងត្រឹមត្រូវដោយធ្វើការអ៊ុតថង់បឺតខ្យល់ ដែលអាចរក្សាទុកត្រីងៀតបានយូររហូតដល់ទៅ២សប្តាហ៍ ហើយប្រសិនបើអតិជនយកទៅរក្សាទុកនៅក្នុងទូរទឹកកក គឺអាចរក្សាគុណភាពបានរឹតតែយូរថែមទៀតចាប់ពីមួយខែទៅដល់២ខែ។

៕ វិន ឈុនហ៊ាត