បាត់ដំបង៖ ដំណាំននោងជ្រុងកំពុងបង្ហាញពីសក្តានុពលជាបន្លែសេដ្ឋកិច្ចមួយសម្រាប់កសិករ ដោយសារងាយស្រួលដាំដុះ ថែទាំមិនស្មុគស្មាញ អាចដាំបានគ្រប់រដូវកាល និងឆាប់ទទួលបានផល ដែលអាចជួយបង្កើតប្រាក់ចំណូលជាប្រចាំសម្រាប់គ្រួសារកសិករ។
តាមបទពិសោធន៍របស់កសិករនៅខេត្តបាត់ដំបង ននោងជ្រុងជាប្រភេទដំណាំវល្លិដែលមានភាពបត់បែនខ្ពស់ អាចដាំបានទាំងរដូវប្រាំង និងរដូវវស្សា។ ការធ្វើរោង ឬបង្អោងសម្រាប់ឱ្យវល្លិតោងឡើង ស្រដៀងនឹងទ្រើងម្រេច អាចជួយសន្សំសំចៃថ្លៃដើម ងាយស្រួលក្នុងការថែទាំ និងប្រមូលផល។
ដំណាំនេះចាប់ផ្តើមបោះដៃនៅអាយុប្រហែល ២០ថ្ងៃក្រោយដាំ និងអាចប្រមូលផលដំបូងនៅអាយុប្រហែល ១ខែ ហើយបន្តផ្តល់ផលជាបន្តបន្ទាប់អស់រយៈពេលជាង ១ខែ។
អ្នកស្រី ឆុំ ភ័ណ កសិករដាំបន្លែននោងជ្រុង រស់នៅភូមិកាប់ព្រិច ឃុំព្រះផុស ស្រុកគាស់ក្រឡ ខេត្តបាត់ដំបង បានប្រាប់បណ្តាញព័ត៌មាន AMS ថា ដំណាំនេះអាចផ្តល់ប្រាក់ចំណូលគួរឱ្យកត់សម្គាល់ ដោយអ្នកស្រីដាំលើផ្ទៃដី ៧៥អា ស្មើនឹង ៧,៥០០ម៉ែត្រការ៉េ និងមានប្រមាណ ៦,២៥០គុម្ព។ ជាទូទៅ ននោងអាចផ្តល់ទិន្នផលជាមធ្យមពី ១៥ ទៅ ២៥តោនក្នុងមួយហិកតា។
អ្នកស្រីបញ្ជាក់ថា ការប្រមូលផលជាមធ្យមអាចទទួលបានប្រមាណ ៥០០គីឡូក្រាមក្នុងរយៈពេល ២ថ្ងៃម្តង ដោយមានតម្លៃលក់ដុំប្រមាណ ១,៥០០រៀលក្នុងមួយគីឡូក្រាម។ ដូច្នេះ កសិករអាចទទួលបានចំណូលប្រមាណ ៧៥ម៉ឺនរៀលក្នុងការប្រមូលផលមួយលើក ដែលអាចជួយទ្រទ្រង់ការចំណាយប្រចាំថ្ងៃរបស់គ្រួសារ។
អ្នកស្រីបានគណនាថា ប្រសិនបើប្រមូលផលបានជាមធ្យម ១៣តោន ឬ ១៣,០០០គីឡូក្រាម លើផ្ទៃដី ៧៥អា ហើយលក់ក្នុងតម្លៃបោះដុំ ១,៥០០រៀលក្នុងមួយគីឡូក្រាម នោះចំណូលសរុបអាចមានប្រមាណ ១៩លាន ៥សែនរៀល ដែលអាចទូទាត់ថ្លៃដើមផលិតកម្មទាំងអស់ និងនៅសល់ប្រាក់ចំណេញសុទ្ធគួរសម។
ទាក់ទងនឹងការថែទាំ អ្នកស្រី ឆុំ ភ័ណ ឱ្យដឹងថា ននោងជ្រុងមិនត្រូវការការថែទាំស្មុគស្មាញនោះទេ ប៉ុន្តែកសិករត្រូវដាក់ជីបំប៉ន ការពារសត្វល្អិត និងស្រោចទឹកឱ្យបានទៀងទាត់មួយថ្ងៃម្តងនៅពេលល្ងាច ដើម្បីជួយឱ្យដំណាំលូតលាស់ និងផ្តល់ផលបានល្អ។
អ្នកស្រីបន្ថែមថា កសិករគួរដាំននោងជ្រុងក្នុងបរិមាណសមល្មម ដើម្បីងាយស្រួលក្នុងការថែទាំ និងប្រមូលផល ព្រមទាំងអាចដាំរួមជាមួយដំណាំផ្សេងៗទៀត ដើម្បីធ្វើពិពិធកម្មប្រភពចំណូលគ្រួសារ។
គួរបញ្ជាក់ថា ននោងជ្រុងជាបន្លែដែលត្រូវបានដាំដុះនៅតាមតំបន់ជាច្រើនជុំវិញពិភពលោក រួមមាន អាមេរិកខាងជើង អូស្ត្រាលី និងអឺរ៉ុប ព្រមទាំងមានប្រជាប្រិយភាពនៅក្នុងប្រទេសឥណ្ឌា ចិន នេប៉ាល់ ប៊ូតង់ បង់ក្លាដែស វៀតណាម និងកម្ពុជា។ ផ្លែននោងនៅពេលទុំពេញលេញមានសរសៃច្រើន។
ចំពោះសមាសធាតុអាហារ ននោងជ្រុងមានជាតិសរសៃ ទឹក វីតាមីន A វីតាមីន C ជាតិដែក ម៉ាញ៉េស្យូម និងវីតាមីន B6 ព្រមទាំងមានកាឡូរី និងកូលេស្តេរ៉ុលទាប៕






វិថីហិរញ្ញវត្ថុ






























































Account
Security
Favourite Content