សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ពានរង្វាន់ត្នោតមាស ឬ Thnot d’Or ដែលបានរៀបចំឡើងដោយសហគ្រាសផលិតឱសថប៉េប៉េអឹម និងក្រុមហ៊ុន ខន់ហ្វីរេល បានរកឃើញម្ចាស់ជ័យលាភីឆ្នើមសម្រាប់ឆ្នាំ ២០២៤ ហើយក៏បានរៀបចំពិធីប្រគល់ពានរង្វាន់ក្រោមអធិបតីភាពឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានសហភាពសហព័ន្ធយុវជនកម្ពុជា រាជធានីភ្នំពេញ នៅរសៀលថ្ងៃទី២៧ ខែកក្កដា ឆ្នាំ២០២៤ ។
បើតាមសេចក្ដីព័ត៌មានរបស់សហគ្រាសប៉េប៉េអឹម បានឱ្យដឹងថា កម្មវិធីប្រកួតប្រជែងពានរង្វាន់ត្នោតមាស ឆ្នាំ២០២៤នេះ មាននិស្សិតចូលជាច្រើនក្រុមហ៊ុន ហើយចុងក្រោយ មាននិស្សិតចំនួន ១១ ក្រុម មកពីវិទ្យាស្ថានបច្ចេកវិទ្យាកម្ពុជា – សាកលវិទ្យាល័យភូមិន្ទភ្នំពេញ – វិទ្យាស្ថានបច្ចេកវិទ្យាកំពង់ស្ពឺ – សាកលវិទ្យាល័យភូមិន្ទកសិកម្ម និងវិទ្យាស្ថានសន្តប៉ូលនៃខេត្តតាកែវចូលរួមប្រកួតដណ្តើមពានរង្វាន់ត្នោតមាស ឬ Thnot d’Or 2024 នៅវគ្គផ្តាច់ព្រ័ត្រនៅព្រឹកថ្ងៃទី២៧ ខែកក្កដា ឆ្នាំ២០២៤ ដែលរៀបចំឡើងដោយមូលនិធិគីណាល់ ។
ប្រធានបទសម្រាប់ប្រកួតប្រជែងពានរង្វាន់ត្នោតមាស ផ្តោតទៅលើ៖ «ការច្នៃប្រឌិតបង្កើនគុណតម្លៃផលិតផលរុក្ខជាតិមានប្រយោជន៍ដល់សុខភាព សម្រាប់ទីផ្សារក្នុងស្រុក និងទីផ្សារអន្តរជាតិ» ។
ស្នាដៃអត្ថបទសិក្សាស្រាវជ្រាវទាំងអស់ត្រូវបានវាយតម្លៃដោយគណៈមេប្រយោគឯករាជ្យដែលរួមមាន ៖ ឯកឧត្តម បណ្ឌិត អៃ សុងហាង ប្រធានមជ្ឈមណ្ឌលអភិវឌ្ឍន៍ការបណ្តុះបណ្តាលវិជ្ជាជីវៈប្រចាំតំបន់នៃក្រសួងអប់រំ យុវជន និងកីឡា ជាប្រធានគណៈមេប្រយោគ ពានរង្វាន់ត្នោតមាស ឬ Thnot d’Or ២០២៤ – លោក សុខ សារ៉ង មកពីស្ថាប័នចេញវិញ្ញបនបត្រសរីរាង្គអន្តរជាតិ ECOCERT -លោក ឡៅ រាសី អនុប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម – លោក Philippe Monnin នាយកក្រុមហ៊ុនចំការកៅស៊ូមេមត់ – លោកបណ្ឌិត ប៊ុនតុង បូរ៉ារិន នាយកផ្នែកស្រាវជ្រាវនៃសាកលវិទ្យាល័យភូមិន្ទកសិកម្ម ។
លោកឧកញ៉ា ឱសថបណ្ឌិត ហៃ លីអ៊ាង ប្រធានមូលនិធិគីណាល់ និងជាប្រធានអគ្គនាយក្រុមហ៊ុន សហគ្រាស ប៉េប៉េអឹម និងខនហ្វីរេល បានពន្យល់ថា ការជ្រើសរើយយកប្រធានបទ៖ «ការច្នៃប្រឌិតបង្កើនគុណតម្លៃផលិតផលរុក្ខជាតិមានប្រយោជន៍ដល់សុខភាព សម្រាប់ទីផ្សារក្នុងស្រុក និងទីផ្សាអន្តរជាតិ»គឺចង់បង្ហាញថា ប្រទេសកម្ពុជាមានភាពសម្បូរបែបផ្នែករុក្ខជាតិឱសថ ។
លោកឧកញ៉ាបានមានប្រសាសន៍ថា ក្នុងសម័យកាលដែលជំងឺបេះដូង ជំងឺលើសឈាម និងជំងឺទឹកនោមផ្អែមកំពុងតែរីករាលដាលនៅកម្ពុជាដោយសាររបបអាហារសម្បូរសារជាតិខ្លាញ់ និងស្ករច្រើនពេក ដែលបណ្តាលមកពីទំនោរទៅរក អាហារបែបលោកខាងលិច តាមរយៈការបង្កើតប្រធានបទ ផ្ដល់តម្លៃរុក្ខជាតិដែលមានអត្ថប្រយោជន៍សម្រាប់សុខភាព គឺចង់លើកកម្ពស់គោលការណ៍មួយដែលអាចដឹកនាំយើងទាំងអស់គ្នាឈានទៅរកការរស់នៅប្រកបដោយនិរន្តភាព និងសុខភាពល្អ។ គោលការណ៍នោះគឺសុំឱ្យចំណីអាហាររបស់អ្នកក្លាយជាឱសថទីមួយសម្រាប់សុខភាពអ្នក» ដោយសារប្រទេសយើងសម្បូរទៅដោយរុក្ខជាតិឱសថជាច្រើន ហើយការថែរក្សាសុខភាព និងការព្យាបាលដោយប្រើឱសថបុរាណ បានចាក់ប្ញសយ៉ាងជ្រៅនៅប្រទេសកម្ពុជារាប់សិបសតវត្សរ៍មកហើយ»។
ជាមួយគ្នានេះ ដើម្បីលើកកម្ពស់បេតិកភណ្ឌជាតិតាមរយៈការច្នៃប្រឌិត គឺជាបញ្ហាប្រឈមផ្នែកវប្បធម៌ និងសេដ្ឋកិច្ច ហើយមូលនិធិគីណាល់ប្រាថ្នាចង់ឱ្យការចូលរួមប្រកួតប្រជែងស្នាដៃតាមរយៈពានរង្វាន់ត្នោតមាស ដើម្បីជាការបង្ហាញពីភាពចាំបាច់ដែលត្រូវចូលរួមធ្វើទាំងអស់គ្នា។
ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានសហភាពសហព័ន្ធយុវជនកម្ពុជា រាជធានីភ្នំពេញ បានកោតសរសើរ និងវាយតម្លៃខ្ពស់ចំពោះលោកឧកញ៉ា ហៃ លីអ៊ាង ដែលបានបង្កើតកម្មវិធីមួយផ្ដល់ឱកាសដល់យុវជន និស្សិតអាចបញ្ចេញស្នាដៃ និងគំនិតច្នៃ ប្រឌិតក្នុងការកែច្នៃនូវអ្វីដែលថ្មី សម្រាប់ជារបស់ខ្មែរ ។
ឯកឧត្តមបន្តថា កម្ពុជាមានធនធានធម្មជាតិច្រើន ដែលអាចយកមកកែច្នៃ ហើយបើសិនជាថ្ងៃណាមួយមានអ្នកណាម្នាក់អាចកែច្នៃរបស់ដែលមានតម្លៃបាន និងមានការទទួលស្គាល់នៅទូទាំងពិភពលោកបាន អ្នកនោះនឹងក្លាយជាអ្នកមាន និងជាបុគ្គលឆ្នើមសម្រាប់ជាតិ ព្រមទាំងពិភពលោកទាំងមូលផងដែរ ។
គួរបញ្ជាក់ថា មូលនិធីគីណាល់បានរៀបចំឱ្យមានការប្រកួតប្រជែងស្នាដៃអត្ថបទស្រាវជ្រាវសម្រាប់ពានរង្វាន់ត្នោតមាសនេះ ចាប់តាំងពីឆ្នាំ ២០១៧ មក ដើម្បីបញ្ជាក់ពីគោលនយោបាយទំនួលខុសត្រូវសង្គម និងសេដ្ឋកិច្ច (CSR) របស់ក្រុមហ៊ុន-សហគ្រាស PPM-Confirel Group ដែលបង្កើតឡើង និងដឹកនាំដោយលោកឧកញ៉ា ឱសថបណ្ឌិត ហៃ លីអ៊ាង ហើយកម្មវិធីពានរង្វាន់ ត្នោតមាស ឬ Thnot d’Or នេះ មានគោលបំណងលើកទឹកចិត្តបណ្តុះគំនិតដល់និស្សិតកម្ពុជាផ្នែកក្សេត្រសាស្រ្ត និងកសិ-ចំណីអាហារ កម្ពុជា ចូលរួមក្នុងការស្រាវជ្រាវ និងការបង្កើតថ្មី ដើម្បីក្លាយជាតួអង្គយ៉ាងពិតប្រាកដក្នុងការចូលរួមអភិវឌ្ឍន៍ជនបទនៃប្រទេសកម្ពុជា៕
Account
Security
Favourite Content