ភ្នំពេញ ៖ ក្រសួងសាធារណៈការ និងដឹកជញ្ជូន បានដឹកនាំកិច្ចប្រជុំ ពិនិត្យលទ្ធផលបឋមនៃការ​សិក្សា​សមិទ្ធិលទ្ធភាពលើគម្រោងលើកកម្រិតផ្លូវរថភ្លើងភាគខាងជើង ភ្នំពេញ-ប៉ោយប៉ែត ឱ្យទៅជាផ្លូវរថភ្លើង​ល្បឿនលឿនដំបូងបង្អស់នៅកម្ពុជា។ គម្រោងនេះ គឺជាការលើកកម្ពស់កម្រិតគុណភាពផ្លូវរថភ្លើងរបស់កម្ពុជាដែលមានស្រាប់ឱ្យកាន់តែទំនើប និងងាយស្រួលជាងមុន។

គម្រោងលើកកម្រិតផ្លូវរថភ្លើងល្បឿនលឿនលើកដំបូងបំផុតរបស់កម្ពុជានៅព្រឹកថ្ងៃទី២៤ ខែមករា ឆ្នាំ២០២៣នេះ ត្រូវបានសិក្សាដោយក្រុមហ៊ុនសាជីវកម្មថ្នល់ និងស្ពានចិន (CRBC)។ នៅក្នុងកិច្ចប្រជុំពិភាក្សាខាងលើនេះ តំណាងក្រុមហ៊ុនបានផ្ដល់បទបង្ហាញសំខាន់ៗមួយចំនួនអំពីការសិក្សា​របស់​ខ្លួនទៅកាន់ឯកឧត្តមរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹងជញ្ជូន។

ចំណុចដែលក្រុមហ៊ុនសិក្សាគម្រោងបានបង្ហាញរួមមាន ៖ ទិដ្ឋភាពទូទៅនៃគម្រោង ការវិភាគ​លើទំហំសេដ្ឋកិច្ច និងទំហំចរាចរណ៍ ផែនការនៃការសាងសង់ ស្តង់ដារបច្ចេក​ទេសគោល​នៃខ្សែផ្លូវដែក ការរៀបចំការដឹកជញ្ជូន រយៈពេលនៃការសាងសង់ និងការវិនិយោគ​សរុប ការវាយតម្លៃលើ​ផ្នែក​ហិរញ្ញវត្ថុ និងការបញ្ជាក់អំពីបញ្ហាសំខាន់ៗមួយចំនួនទៀត។

តាមរយៈការសិក្សាបឋមនេះ បានបញ្ជាក់ថា គម្រោងនេះមានប្រវែងសរុបប្រមាណ ៣៨២ គ.ម ត្រូវការទុនវិនិយោគប្រមាណជាង ៤ពាន់លានដុល្លារអាមេរិក ដោយរួមបញ្ចូលទាំងក្បាល និងទូរថ​ភ្លើងសម្រាប់ដំណើរការ និងប្រើប្រាស់រយៈពេលសាងសង់ប្រមាណ ៤ឆ្នាំ។ ផ្លូវរថភ្លើងល្បឿន​លឿន​នេះ មានខ្នាតទទឹងប្រវែង ១.៤៣៥ មម ល្បឿនសម្រាប់ធ្វើចរាចរណ៍គឺ ១៦០គ.ម/ម៉ និងមានស្ថានីយ​សរុបចំនួន៣៣ សម្រាប់ដំណើរការ (ស្ថានីយចំនួន១៩ ក្នុងផែនការ​រយៈពេលខ្លី និងគ្រោងបន្ថែម​ចំនួន ១៤ទៀត ក្នុងផែនការរយៈពេលវែង)។

ក្នុងនោះ ខ្សែររថភ្លើង​ត្រូវបំពាក់ប្រភេទក្បាលរថភ្លើង ដែលដំណើរការដោយថាមពលអគ្គិសនី ដោយ​មានការសាងសង់​ផ្លូវអាកាសរំលងកាត់ទទឹងផ្លូវ​ប្រមាណជាង ៣០០កន្លែង ដើម្បីបញ្ចៀសគ្រោះ​ថ្នាក់​ចរាចរណ៍ត្រង់​ចំណុច​​ប្រសព្វ​ជាមួយផ្លូវថ្នល់ និងមានបែងចែកដាច់ពីគ្នា រវាងស្ថានីយអ្នកដំណើរ និងស្ថានីយ​លើកដាក់ទំនិញ នៅភូមិសាស្ត្ររាជ​ធានីភ្នំពេញ (មួយនៅស្ថានីយភ្នំពេញសម្រាប់​អ្នក​ដំណើរ និងមួយទៀតនៅស្ថានីយសំរោងសម្រាប់​លើកដាក់ទំនិញ)។

ក្រោយពីកិច្ចប្រជុំពិនិត្យលទ្ធផលបឋមនេះទៅ ឯកឧត្តមទេសរដ្ឋមន្ត្រី ស៊ុន ចាន់ថុល នឹងជួប​ពិភាក្សាជាមួយ ឯកឧត្តម​ឧបនាយ​ក​រដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលគ្រោងនឹងធ្វើឡើងនៅថ្ងៃទី៣០ ខែមករា ឆ្នាំ២០២៣ខាងមុខ។

ជំនួបរវាងរដ្ឋមន្ត្រីក្រសួងទាំងពីរ គឺនឹងធ្វើឡើងដើម្បីពិភាក្សាអំពីលទ្ធភាព និងលក្ខខណ្ឌនៃការអនុវត្ត​គម្រោង ព្រមទាំងស្នើសុំ​អនុសាសន៍​ណែនាំបន្ថែមទៀត ដើម្បីជំរុញឱ្យដំណើរការនៃការសិក្សានេះ​មានលក្ខណៈ​លម្អិត និងសព្វជ្រុងជ្រោយ សំដៅឆ្ពោះទៅការអនុវត្តគម្រោងសាងសង់ផ្លូវរថភ្លើង​ល្បឿនលឿននេះ ក្នុងពេល​អនាគតឆាប់ៗ។

គួររំលឹកថា កាលពីខែធ្នូ ឆ្នាំ២០២២កន្លងទៅ សម្ដេចនាយករដ្ឋមន្ត្រីក៏ធ្លាប់បានលើកឡើងដែរអំពីការ​ឈានទៅ​មានផ្លូវដែកល្បឿនលឿនរបស់កម្ពុជា ដើម្បីតភ្ជាប់ផ្ទៃក្នុងប្រទេសឱ្យកាន់តែរឹងមុំា សម្រាប់​បម្រើឱ្យការ​អភិវឌ្ឍសេដ្ឋកិច្ច សង្គម និងកាត់បន្ថយ​ការលំបាករបស់ប្រជាពលរដ្ឋ។

គម្រោងលើកកម្រិតផ្លូវរថភ្លើងភាគខាងជើង ភ្នំពេញ-ប៉ោយប៉ែត ឱ្យទៅជាផ្លូវរថភ្លើងល្បឿនលឿន គឺជាគម្រោងដែលផ្តោតចម្បងលើសេវាដឹកជញ្ជូនអ្នកដំណើរ និងដឹកទំនិញអន្តរជាតិ រវាងប្រទេស​កម្ពុជា និងប្រទេសថៃ ក៏ដូចជាការដឹកជញ្ជូនអ្នកដំណើរ និងទំនិញតាមខ្សែបណ្ដោយ ពីរាជធានី​ភ្នំពេញ ទៅក្រុងប៉ោយប៉ែត ដោយឆ្លងកាត់ខេត្តកណ្តាល កំពង់ឆ្នាំង ពោធិសាត់ បាត់ដំបង និងខេត្តបន្ទាយមានជ័យ។ គម្រោងនេះនឹងក្លាយជាផ្លូវដែកល្បឿនលឿនស្ដង់ដារដំបូងគេបំផុតនៅក្នុងប្រទេសកម្ពុជា ហើយនឹងក្លាយទៅជាខ្សែផ្លូវដឹកជញ្ជូនអ្នកដំណើរ និងដឹកទំនិញ​​ដ៏សំខាន់​ទាំងនៅក្នុងប្រទេស និងភ្ជាប់ទៅក្រៅប្រទេសផងដែរ៕