ភ្នំពេញ ៖ មូលនិធិរូបិយវត្ថុអន្តរជាតិ (IMF) កាលពីសប្តាហ៍កន្លងទៅបានព្យាករណ៍ថា សេដ្ឋកិច្ចប្រទេសកម្ពុជានឹងសម្រេចបានកំណើនក្នុងអត្រាប្រមាណ ៥,៦ ភាគរយនៅឆ្នាំនេះ និង ៦,១ នៅឆ្នាំ២០២៤ ពោលគឺទាបជាងការព្យាករណ៍របស់ខ្លួនបន្តិចកាលពីលើកមុន។

ទន្ទឹមនេះ IMF ក៏បានព្យាករណ៍ផងដែរថា មិនថាតែក្របខណ្ឌប្រទេសកម្ពុជានោះទេ សេដ្ឋកិច្ចក្នុងក្របខណ្ឌតំបន់​អាស៊ានក៏ត្រូវបានព្យាករណ៍ថា នឹងប្រឈមនឹងការថមថយផងដែរ ​ដោយ​សារ​តែ​ភាពមិនប្រាកដប្រជានៃសេដ្ឋកិច្ចពិភពលោក និងតម្រូវការ​ខាងក្រៅចុះ​ខ្សោយ​​។

IMF បានលើកឡើងដូច្នេះថា ៖

“យើងរំពឹងថាអ្វីៗនឹងប្រសើរឡើង ហើយបើទោះបីជាតម្រូវការនៅទីផ្សារសហរដ្ឋអាមេរិក និងអឺរ៉ុប ក៏ដូចជាប្រទេសចិន មានការថមថយ សេដ្ឋកិច្ចកម្ពុជានៅតែបន្តមានកំណើនរឹងមាំខ្លាំង”។

IMF បានឱ្យដឹងទៀតថា កិច្ចព្រមព្រៀងភាព​ជា​ដៃគូ​សេដ្ឋកិច្ច​គ្រប់​ជ្រុងជ្រោយ​ក្នុង​តំបន់​ (RCEP) ពិតជាផ្តល់ពិពិធកម្មសេដ្ឋកិច្ចដល់កម្ពុជា។ ជាក់ស្តែង ការធ្វើសមាហរណកម្មក្នុងប្រទេសកម្ពុជាជាមួយដៃគូពាណិជ្ជកម្មអាស៊ានមានការកើនឡើង។ ដូច្នេះ​ក្នុង​ន័យ​នេះ កិច្ចព្រមព្រៀងនេះពិតជា​ជួយ​​កម្ពុជា​ធ្វើ​ពិពិធកម្មសេដ្ឋកិច្ច។

ធនាគារពិភពលោក (World Bank) កាលពីថ្ងៃទី២ ខែតុលា ឆ្នាំ២០២៣កន្លងទៅបានព្យាករណ៍ថា សេដ្ឋកិច្ចកម្ពុជាថានឹងកើនឡើងដល់ ៥.៥ ភាគរយនៅឆ្នាំ ២០២៣ ដោយសារកំណើននៃវិស័យសេវាកម្ម និងផលិតកម្មកសិកម្ម។ធនាគារពិភពលោក បានព្យាករណ៍ទៀតថា នៅឆ្នាំ ២០២៤ សេដ្ឋកិច្ចកម្ពុជានឹងបន្តមានភាពប្រសើរឡើងបន្ថែមទៀតដោយកើនឡើងក្នុងអត្រា ៦.១ ភាគរយ ខណៈដែលការនាំចេញទំនិញត្រូវបានព្យាករណ៍ថានឹងមានភាពប្រសើរឡើង និងធ្វើពិពិធកម្មប្រសើរឡើងជាងមុន ហើយលំហូរវិនិយោគផ្ទាល់ពីបរទេស (FDI) រំពឹងថានឹងបន្តមានកំណើន ដោយសារកម្ពុជាមានច្បាប់ថ្មីស្តីពីការវិនិយោគ ដែលនឹងក្លាយជាកតាលីករទាក់ទាញការវិនិយោគពីក្រៅប្រទេស។

ដោយសារល្បឿននៃកំណើនសេដ្ឋកិច្ចដ៏លឿន អត្រាភាពក្រីក្រត្រូវបានរំពឹងថានឹងមានការកាត់បន្ថយក្នុងល្បឿនលឿនផងដែរ។ ដោយឡែក ហានិភ័យដែលកម្ពុជាអាចនឹងជួបប្រទះ រួមមានតម្រូវការសកលដែលខ្សោយជាងការរំពឹងទុក ការអូសបន្លាយនៃបញ្ហាហិរញ្ញវត្ថុសកល និងការកើនឡើងវិញនៃតម្លៃប្រេង និងអាហារសកល។

ទោះជាយ៉ាងនេះក្តី ក្នុង​រយៈ​ពេល​មធ្យម សេដ្ឋកិច្ចកម្ពុជា​ត្រូវ​បាន​​រំពឹង​ថា​នឹង​មាន​និន្នាការ​ត្រឡប់​ទៅ​រក​សក្ដានុពល​វិញ ដោយ​កើន​ឡើង​ក្នុង​អត្រា ៧ ភាគរយ។ ទន្ទឹមនេះ កំណើននៃវិស័យទេសចរណ៍ និងបដិសណ្ឋារកិច្ចទំនងជានឹងបង្កើនល្បឿនបន្ថែមទៀត ជាមួយនឹងការកើនឡើងនៃការមកដល់អន្តរជាតិ ខណៈដែលការនាំចេញ និងលំហូរ FDI ត្រូវបានរំពឹងថានឹងកើនឡើង ដោយកិច្ចព្រមព្រៀងពាណិជ្ជកម្មសេរី ការកើនឡើងយ៉ាងច្រើននៃការវិនិយោគឯកជន និងសាធារណៈនៅក្នុងហេដ្ឋារចនាសម្ព័ន្ធរូបវន្តសំខាន់ៗ និងកំណែទម្រង់រចនាសម្ព័ន្ធ និងតាមវិស័យសំខាន់ៗ។

ក្រសួងសេដ្ឋកិច្ច និងហិរញ្ញវត្ថុ បានឱ្យដឹងផងដែរថា ផ្អែកលើក្របខណ្ឌគោលនយោបាយម៉ាក្រូសេដ្ឋកិច្ចឆ្នាំ២០២៤ សេដ្ឋកិច្ចកម្ពុជាឆ្នាំ២០២៣ ត្រូវបានវាយតម្លៃថានឹងសម្រេចបានកំណើនសេដ្ឋកិច្ច ក្នុងរង្វង់ ៥,៦ ភាគរយ។ កំណើននេះ ត្រូវបានទ្រទ្រង់ដោយការបន្តងើបឡើងវិញលឿនជារំពឹងទុកនៃវិស័យទេសចរណ៍ និងសេវាកម្មគាំទ្រផ្សេងៗទៀត ដូចជា លក់ដុំ-រាយ និងដឹកជញ្ជូនជាដើម។ ការត្រឡប់ទៅរកប្រក្រតីភាពវិញនៃសង្គម-សេដ្ឋកិច្ចសកល បានធ្វើឱ្យមានការបន្តកើនឡើងនៃរំហូរមនុស្សទាំងក្នុងកម្រិតសកល តំបន់ និងក្នុងស្រុក៕