សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពាង ជាឧបករណ៍សម្រាប់ដាក់ទឹកដែលគេនិយមប្រើប្រាស់នៅតាមលំនៅដ្ឋានកាលពីជំនាន់មុន ជាពិសេសនៅតាមបណ្តាខេត្ត និងតាមទីជនបទ ដោយសារវាមានភាពធន់ អាចបន្លាស់ទីបាន។ ប៉ុន្តែនៅពេលបច្ចុប្បន្ន ភាពនិយមប្រើប្រាស់ពាងទឹកនៅតាមលំនៅដ្ឋានរបស់ប្រជាជនខ្មែរ ហាក់មានការផ្លាស់ប្ដូរ ដោយសារមានឧបករណ៍ជំនួស ដូចជាធុងជ័រសម្រាប់ដាក់ទឹកដែលមានទម្ងន់ស្រាល និងកាន់តែងាយស្រួលក្នុងការផ្លាស់ប្ដូរទីតាំង។ យ៉ាងណាក៏ដោយ បើទោះជាការប្រើប្រាស់របស់ប្រជាជនត្រូវបានកាត់បន្ថយ ប៉ុន្តែទីផ្សារពាងទឹកនៅតែមាន ជាពិសេសក្នុងរដូវក្ដៅ ឬរដូវបុណ្យទានប្រពៃណីជាតិខ្មែរ ដែលភាគច្រើនគេតែងទិញសម្រាប់ផ្ទុកទឹក និងដាក់នៅតាមដងផ្លូវសាធារណៈក្នុងតំបន់ទេសចរណ៍នានា។
ជាក់ស្ដែង សម្រាប់រដូវបុណ្យចូលឆ្នាំថ្មីប្រពៃណីជាតិខ្មែរដែលទើបតែកន្លងផុតទៅថ្មីៗនេះ ពាងទឹកជាច្រើន ត្រូវបានអាជ្ញាធរមូលដ្ឋាន ក៏ដូចជាប្រជាជនរស់នៅក្នុងតំបន់យកមកដាក់ទឹក ហើយតម្រៀបគ្នាជាជួរនៅតាមដងផ្លូវសាធារណៈ លម្អដោយការលាបពណ៌ចម្រុះ និងអនុញ្ញាតឱ្យអ្នកធ្វើដំណើរឆ្លងកាត់ រួមទាំងទេសចរផងដែរ ប្រើប្រាស់នៅពេលថ្ងៃក្ដៅ ឬលេងនៅក្នុងតំបន់ត្រជាក់ (ល្បែងប្រជាប្រិយស្រោចទឹក ឬក្នុងពិធីស្រង់ព្រះថ្ងៃទី៣នៃពិធីបុណ្យចូលឆ្នាំខ្មែរ) ។
លោក ម៉ែន រតនា ជាអ្នកផលិត និងលក់ពាងទឹក ស្ថិតនៅភូមិក្រោលគោ ឃុំក្រោលគោ ស្រុកស្វាយជ្រំ ខេត្តស្វាយរៀងបានមានប្រសាសន៍ប្រាប់ AMS Economy យ៉ាងដូច្នេះថា ៖
«សម្រាប់ខែប្រាំង ដែលមានអាកាសធាតុក្ដៅ ហើយក៏ជារដូវបុណ្យចូលឆ្នាំថ្មីប្រពៃណីជាតិខ្មែរផងនោះ ខ្ញុំអាចលក់បានច្រើនជាងខែធម្មតា ជាក់ស្ដែង នៅក្នុងខែមេសា ឆ្នាំនេះ ខ្ញុំអាចលក់បានប្រមាណ ១០០ពាង ដែលភាគច្រើនគេទិញយកទៅដាក់នៅតាមវត្តអារាម តាមទីសាធារណៈ និងទីកន្លែងរៀបចំសង្ក្រាន្តចូលឆ្នាំថ្មី »។
លោកបានបន្តថា ចំពោះតម្លៃវិញ ជាធម្មតាពាងមួយអាចលក់បានជាមធ្យម ៦ម៉ឺនរៀល ឬអាចថ្លៃជាងនេះ អាស្រ័យលើការដឹកជញ្ជូនទៅកន្លែងឆ្ងាយ ឬជិត ហើយអ្នកដែលទិញពាងរបស់លោកភាគច្រើនជាអ្នកក្នុងតំបន់ដែលស្គាល់តៗគ្នានៅក្នុងខេត្តនេះផ្ទាល់តែម្ដង។
លោកបញ្ជាក់ទៀតថា បច្ចុប្បន្ននេះ ត្បិតតម្រូវការមានការធ្លាក់ចុះ ប៉ុន្តែសិប្បកម្មផលិតពាងទឹករបស់លោកនៅតែបន្តសកម្មភាពជាប់ជាប្រចាំ ដោយក្នុងមួយថ្ងៃអាចផលិតបានយ៉ាងហោចណាស់ ៦ ទៅ ៨ ពាង ខណៈដែលដែលទម្រាំអាចទទួលបានពាងទឹកដែលមានគុណភាព ប្រើបានយូរ ត្រូវឆ្លងកាត់ដំណាក់កាលជាច្រើន រាប់ទាំងការដំឡើងពុម្ព ការលាយបាយអស៊ីម៉ង់ត៏សម្រាប់ចាក់ក្នុងពុម្ព រហូតដល់ការដាក់ហាលសម្ងួត រួចអាចដោះពុម្ពចេញ និងដាក់លក់។
គួររំឭកផងដែរថា លោក ម៉ែន រតនា បានប្រកបមុខរបរផលិតពាងនេះតាំងពីឆ្នាំ២០១៤ ដោយសារគ្រានោះពាងទឹកនៅមានអ្នកនិយមប្រើប្រាស់ច្រើននៅឡើយ ដែលយ៉ាងហោចណាស់ក្នុងមួយថ្ងៃលោកអាចលក់បានចាប់ពី៤ឡើងទៅ ដែលអាចទទួលបានចំណូលគួរសម ខុសប្លែកនឹងពេលបច្ចុប្បន្ន ដែលអ្នកប្រើប្រាស់អាចមានជម្រើស ទាំងការប្រើប្រាស់ធុងជ័រ ឬធុនប្លាស្ទិក ក៏ដូចជាការប្រើស៊ីទែនទឹកដែកអ៊ីណុកជាដើម៕
Account
Security
Favourite Content