សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល៩ខែ ឆ្នាំ២០២៤កន្លងទៅនេះ កម្ពុជាបានធ្វើការនាំចេញផលិតផលកសិកម្មចម្រុះប្រមាណ ៨,៥លានតោន និងមានទំហំទឹកប្រាក់សរុបប្រមាណ ៣០០០លានដុល្លារ មានការកើនឡើង៥៣ភាគរយ បើធៀបនឹងរយៈពេលដូចគ្នាក្នុងឆ្នាំ២០២៣។
ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងកាលពីពេលថ្មីៗនេះថា ផលិតផលកសិកម្មសំខាន់ៗដែលបាននាំចេញក្នុង១ឆ្នាំចុងក្រោយរួមមានដូចជា អង្ករ ដំឡូងមី ស្វាយចន្ទី ចេក ស្វាយ ម្ទេស កៅស៊ូ ហើយក្រៅពីនេះក៏មានជាប្រភេទផលិតផលសាច់ផងដែរ។
ឯកឧត្តម បានគូសបញ្ជាក់ថា ៖
«សមិទ្ធផលដ៏សំខាន់មួយ វាពិតជាមិនងាយសម្រេចនោះទេ ខណៈដែលលទ្ធផលទាំងនេះបានឆ្លុះបញ្ចាំងពីភាពជោគជ័យនៃការបើកទីផ្សារថ្មី និងការបង្កើនសមត្ថភាពប្រកួតប្រជែង ជួយឱ្យផលិតផលកសិកម្មកម្ពុជា ឈានដល់ស្តង់ដារគុណភាពនាំចេញ ហើយការនាំចេញនេះទៀតសោត ភាគច្រើនមានលក្ខណៈផ្លូវការ ដែលជាសញ្ញាវិជ្ជមាន។ យើងលែងនាំចេញក្រៅផ្លូវការទៀតហើយ ការនាំចេញរបស់យើងត្រូវបានទទួលស្គាល់តាមរយៈបណ្តាញផ្លូវការ»។
អ្នកនាំពាក្យរូបនេះបានបន្តលើកឡើងថា ៖
«បច្ចុប្បន្នបើយើងមើលទៅការនាំចេញផលិតផលគ្រាប់ស្វាយចន្ទីសម្រាប់ទិន្នន័យ៩ខែកន្លងមកនេះ រកចំណូលជូនវិស័យកសិកម្មបានប្រមាណ៩០០ លានដុល្លារ។ដំឡូងមី ក៏ជាកសិផលដែលមានទំហំធំដែរ ដោយទំហំដំឡូងមានតម្លៃជាសាច់ប្រាក់ប្រមាណ៥៨០លានដុល្លារ និងតម្លៃស្វាយជាង ២០០ លានដុល្លារអាមេរិក ដែលយើងគ្រាន់តែសរុបផលិតផលពីរបីមុខនេះ យើងទទួលបានតម្លៃធំជាងការនាំចេញស្រូវអង្ករទៅទៀត»។
ឯកឧត្តម ឃឹម ហ្វីណង់ ក៏បានលើកឡើងពីកម្មវិធីគោលនយោបាយអាទិភាពសំខាន់ៗ រួមទាំងគំនិតផ្តួចផ្តើម ផ្តល់ហិរញ្ញប្បទាន ចំនួន១០០លានដុល្លារ សំដៅគាំទ្រការស្រាវជ្រាវទីផ្សារ និងធានាស្ថិរភាពតម្លៃ។ បន្ថែមពីលើនេះ ក្រសួងបានជ្រើសរើសមន្ត្រីកសិកម្មឃុំចំនួន ២៥០នាក់ ហើយគ្រោងនឹងជ្រើសរើសចំនួន ១០០០នាក់បន្ថែមទៀត ដើម្បីដាក់ពង្រាយគ្រប់ឃុំ-សង្កាត់ទូទាំងប្រទេសនៅឆ្នាំក្រោយ។
សូមបញ្ជាក់ដែរថា បច្ចុប្បន្ន កម្ពុជាកំពុងចរចាលក្ខខណ្ឌភូតគាមអនាម័យជាមួយប្រទេសចិន លើការនាំចេញទឹកមាត់ត្រចៀកកាំ ទុរេន ខ្នុរ និងម្នាស់ ដែលជាដំណាំសក្តានុពល ខណៈដែលទីផ្សារប្រទេសចិនកំពុងមានតម្រូវការលើកសិផលទាំងអស់នេះ៕
Account
Security
Favourite Content