ភ្នំពេញ ៖ នាព្រឹកថ្ងៃទី ២៨ ខែវិច្ឆិកា ឆ្នាំ២០២៤នេះ ក្រសួងសាធារណៈការ និងដឹកជញ្ជូន រួមជាមួយអង្គការ Energy Lab បានសហការគ្នាដើម្បីរៀបចំនូវពិធី “តាំងពិព័រណ៍យានយន្តអគ្គិសនី​”។ នៅក្នុងឱកាសនេះ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណៈការ ​និងដឹកជញ្ជូន បាន​មានប្រសាសន៍ថា វេទិកាពិព័រណ៍នេះគឺធ្វើឡើងក្នុងគោល​បំណង​បញ្ជ្រាបការយល់ដឹង​ដល់​សាធារណជនអំពីបច្ចេកវិទ្យា ឧបករណ៍បរិក្ខារ និងអត្ថប្រយោជន៍​នានានៃយានយន្តអគ្គិសនី​ សំដៅលើកកម្ពស់ការប្រើប្រាស់យានយន្តអគ្គិសនីនៅ​កម្ពុជាឱ្យកាន់តែ​ទូលំ​ទូលាយថែ​ម​ទៀត។

បើតាមឯកឧត្តមរដ្ឋមន្ត្រី ប៉េង ពោធិ៍នា បច្ចុប្បន្ននេះ ការបំភាយឧស្ម័នកាបូនឌីអុកស៊ីត (CO2) ចេញពីយានយន្ត​ចំហេះក្នុង គឺជាកត្តាដ៏ចំបងមួយនៃការកើនឡើងនូវឧស្ម័នផ្ទះកញ្ចក់ (GHG) ដែលបណ្តាលឱ្យមានការ​ឡើងកំដៅផែនដី ការប្រែប្រួល អាកាសធាតុ ការធ្លាក់ចុះនូវគុណភាពខ្យល់ និងការបំពុលបរិស្ថាន​ពិភព​លោកទាំង​មូល។ ដូច្នេះ ដើម្បីឆ្លើយតបទៅនឹងបញ្ហាខាងលើ ប្រទេសនានានៅក្នុងពិភពលោក និងតំបន់ បានបង្វែរការ​យក​ចិត្តទុកដាក់ពីការប្រើប្រាស់យានយន្តដើរដោយប្រេងឥន្ធនៈ ទៅជាការប្រើប្រាស់យានយន្ត​អគ្គិសនី ដែលមានការកើនឡើងជាលំដាប់ពីមួយថ្ងៃទៅមួយថ្ងៃ។

ឯកឧត្តមបានបន្តមានប្រសាសន៍យ៉ាងដូច្នេះថា៖

«ក្រសួងសាធារណការ និងដឹកជញ្ជូន ដែលជា​ស្ថាប័ន​មានសមត្ថកិច្ចគ្រប់គ្រង និងអភិវឌ្ឍវិស័យដឹក​ជញ្ជូន នឹងត្រូវដឹកនាំការងាររៀបចំ និងអនុវត្ត​គោលនយោបាយ ផែនការយុទ្ធសាស្ត្រ និងវិធាន​ការណ៍​ចាំបាច់នានាដើម្បីឈានទៅ​សម្រេចបាននូវការប្រើប្រាស់រថយន្តអគ្គិសនីក្នុងអត្រា៤០% និងទោចក្រយានយន្ត (ម៉ូតូ) អគ្គិសនីក្នុងអត្រា៧០% នៅឆ្នាំ ២០៥០»។

ទោះជាយ៉ាងណា ដើម្បីសម្រេចបាននូវគោលដៅនេះ គឺទាមទារឱ្យមានការចូលរួមពីក្រសួង ស្ថាប័ននិងភាគីពាក់ព័ន្ធទាំងអស់ក្នុងការរៀបចំ និងអនុវត្តគោលនយោបាយ ផែនការយុទ្ធសាស្ត្រ និងវិធានការណ៍នានា ក្នុងការជម្រុញការគាំទ្រ លើកទឹកចិត្ត និងជំរុញការប្រើប្រាស់​យានយន្ត​អគ្គិសនី ដែលក្នុងនោះ កត្តាចាំបាច់គឺផ្តោតទៅលើយុទ្ធសាស្ត្រទាក់ទាញឱ្យមានកំណើន​នៃការប្រើ​ប្រាស់​យានយន្តអគ្គិសនី និងការបង្កើតស្ថានីយបញ្ចូលថាមពលយានយន្តទៅ​តាមផែនការ​ដែល​បានដាក់ចេញ និងការគ្រប់គ្រងការកែច្នៃនិងការបោះបង់សំណល់អាគុយប្រកបដោយ​សុវត្ថិភាព។

ឯកឧត្តមរដ្ឋមន្ត្រីបានបង្ហាញនូវការជឿជាក់ថា ការតាំងពិព័រណ៍យានយន្ដអគ្គិសនីថ្ងៃនេះ នឹងជំរុញ​ឱ្យពលរដ្ឋទាំងអស់គ្នាកាន់តែយល់ដឹង​ និងយកចិត្តទុកដាក់បន្ថែមទៀតក្នុងការចូលរួមអភិវឌ្ឍន៍ និងលើកកម្ពស់ការប្រើប្រាស់​យានយន្ដអគ្គិសនីនៅកម្ពុជា រួមចំណែកជាមួយរាជរដ្ឋាភិបាល និងពិភពលោក ក្នុងការកាត់បន្ថយ​ការបំភាយឧស្ម័នកាបូនឌីអុកស៊ីត (CO2) ចេញពីវិស័យយានយន្ត ជាផ្នែកមួយនៃការកើនឡើងនូវ​ឧស្ម័នផ្ទះកញ្ចក់ (GHG) ដែលបណ្តាលឱ្យមានការឡើងកំដៅផែនដី បម្រែបម្រួលអាកាសធាតុ ការធ្លាក់ចុះនូវគុណភាពខ្យល់ និងការបំពុលបរិស្ថាន។

ជាមួយគ្នានេះ លោក ណត្តារុន ង៉ោ សឺន នាយកប្រចាំប្រទេសរបស់អង្គការអេននីជីឡេប បានមាន​ប្រសាសន៍ថា ៖

«កម្ពុជាបន្តទាក់ទាញការវិនិយោគលើការផលិត ការដំឡើង និងចែកចាយ​យានយន្ត​អគ្គិសនី ដោយផ្លាស់ប្តូរពីការផ្តោតលើរថយន្តធុនធ្ងន់ មកយានយន្ត​ដែលអតិថិជនភាគច្រើន​និយមដោយក្នុងនោះរួមមានរថយន្ត ត្រីចក្រយានយន្ត និងទោចក្រយានយន្ត»។

លោកបន្តឱ្យដឹងទៀតថា ភាពជាដៃគូរវាងអង្គការ Energy Lab  ជាមួយនឹងក្រសួងនាពេលនេះ គឺមានសារៈសំខាន់សម្រាប់ការកសាងប្រព័ន្ធ​អេកូឡូស៊ី​យានយន្តប្រកបដោយនិរន្តរភាព និងប្រកបដោយបរិយាបន្ននៅក្នុងប្រទេសកម្ពុជា។

គួរបញ្ជាក់ដែរថា គិតមកដល់ពេលនេះ កម្ពុជាបានប្រារព្ធវេទិកាយានយន្ដអគ្គិសនីប្រចាំឆ្នាំ ចំនួន៥ លើកហើយ។​ រីឯប្រធានបទសំខាន់ពីពិព័រណ៍យានយន្តអគ្គិសនីឆ្នាំ ២០២៤ នេះ គឺការសម្រេចបាននូវ​មហិច្ឆតា​យានយន្តអគ្គិសនីរបស់ប្រទេសកម្ពុជា ដែលទាមទារឱ្យ​មាន​សកម្មភាព​សម្របសម្រួល​រវាងរដ្ឋាភិបាល ឧស្សាហកម្ម នឹងដៃគូអន្តរជាតិ៕